Sletschte Wuchenänd hani nid viel unternoh. Bi kli dusse gsi, bim schöne Wätter wos ka hett e "Muss". Denn bini an Märt und ha e Foti in Grossformat kauft vom Märt im Räge. Ha unbedingt öbbis zum daheim ufzhängge brucht;) Denn hani Stunde mit Packe verbrocht, ha welle teschte öb alles überhaupt ind Koffere passt. Ha natürligg denn doch nid ganz alles scho drimache könne. Es könnti sehr knapp wärde, aber zumindescht hoffi, dassi nüt wichtigs do loh muess. Zobe hani denn bi dr Marianne und dr Lori daheim kocht, ha zum erschte Mol Pasta alle vongole gmacht und zum erschte mol dMuschle au gässe (bi immer nonig 100%ig sicher öbi si gärn ha, hehe).

Am Zyschtig bini denn mit dr Lori go wandere. Mir sin uf Granite Mountain uffe. Zum Glück hani mi nid im vorus informiert ka wie lang und steil dWanderig isch, schunsch weissi nid öbi gange wär. Es isch uf jede Fall strahlend blaue Himmel gsi und sooo e klari Sicht! Wo mir denn öbbe 2/3 vom Ufstieg hinter uns ka hän hetts ganz vieli Büsch mit wilde Heidelbeeri ka, sooo guet! Mi Mitbewohner hett mir zumne spötere Zytpunkt verrote, dass meh deswäge dört Obe au Bääre aträffe ka. Nomol en Info, woni zum Glück erscht drnoch beko ha. Zrugg zur Wanderig. Wo mir denn höher gstiege sin als die unmittelbar umliegende Bärge isch är plätzligg füüreko: Mount Rainier! Und in voller Pracht! Dir könned ihn ufm Foti gseh. Das isch eins vo de einzige Mol gsi, wo meh dr ganzi Bärg bis zum Fuess und ohni Wolke gseh hett! Mir häns denn tatsächligg no bis zum Gipfel und wieder abegschafft. Zobe sin mir denn go "authentisch" mexikanisch ässe. Anschiinend sin die meischte Restaurants do "ami-mexikanisch". Das vom Zyschtig sigi seinzig "richtig" mexikanische. Es isch würkligg usgezeichnet gsi. Gegenüber hetts denn e Puerto Ricanischi Bar ka mit Mango-Mojitos, mmhh!

Hütt hani mi Mentor zum letschte Mol gseh, wil är jetzt ind Ferie got und zwar ind Schwiz(!). Jedefalls hän mir no kli mitm Statistiker Züüg besproche. Und denn hani mi Arbetszügnis no beko *juhu* und mir hän uns verabschiedet. Bi würkligg bitz grüehrt gsi. Es isch scho e langi Zyt gsi uns jetzt wirds immer wie realer, dassi gli gang.

Morn kunnt dLisa, mini Kollegin vo Vancouver, mi go bsueche. Freu mi druf! Sin ane Wohnigsiweihig iglade und wärde am Sa bestimmt no in Usgang, ka Euch denn gli meh verzelle. Am Mäntig isch mi letschte Daag im Spital und am Zyschtig zobe hani e grosse Tisch in mim Lieblingsrestaurant reserviert (Nicole, dört, wo mir Sushi ka hän) und denn wirds Drinks, Sushi und good byes gäh.

Wird versueche Euch au in dene letschte crazy Dääg ufm Laufende zhalte. Drugged mir dDüüme, dass dLufthansa nid usgrächnet am Mittwuch und Donnschtig streikt. Kas kuum erwarte Euch alli zdrugge.