Die letschte Wuchene sin wie im Flug vergange. Dr Sebi, dNicole und dr Davy (dr Fründ vo dr Nicole) sin uf Bsuech ko. Mir hän soooo viel Sight-Seeing gmacht! Und en obligatorische pacific northwest crab gässe:) Soooo guet!

Drnoch ischs sehr ruhig gworde. Ha versuecht bim Schaffe bitzli ufzhole und wieder bitz Sport ztriibe, das hett guet do. Und langsam versuechi no paar Sache zorganisiere, es got nüm so lang und ich kumm heim, z.b. paar Infos zhole über Formular woni no usfülle muess etc. Und ich wird mi U.S.-Konto ufgäh miesse, es graut mi jetzt scho drvor wieni ame mini Kaffi und so zahle wird. Ha mi so dra gwöhnt, Bargäld kunnt mir so umständlich vor, hehe.

Und sletschte Wuchenänd bini mit paar Arbetskollege go dSnoqualmie Falls go besichtige, es isch beidruggend gsi. Und es isch zimligg heiss gsi! Ich würd aber sage, dass mir in dr Schwiz doch einigi sonigi Dääg pro Joor hän, wenn nid sogar no kli wärmer. Do isch es schiinbar e Rekord-Hitz sit 1977 gsi! So hani dr Ventilator, wo mir mini Mitbewohner gäh hän doch no könne bruuche. Ha ehrligg gseit am Afang ghofft ka, dass es vilicht au e Wärmeknopf git...

Hütt ischs denn wieder gschätzti 18 Grad gsi und lichte Seattle-Nieselräge, isch no agnähm gsi zur Abwäggsligg.

Uuuuund am Samschtig hüürote mini Mitbewohne - bi soooo exciteeeeeeed!! SMami vo ihre isch jetzt fascht jede Daag paar Stunde bi uns, so ufgregt isch si scho, jööö. Und mini Mitbewohner baschtle flissig. Si mache e huffe Sache Sälber, z.b. Dekos und so. Muess sage es gseht richtig guet us, überhaupt nid billig odr so. Aber es isch so viel Arbet, ich bewundere si richtig! Es wird e riese Hochzyt, es hän sich 180 Gäscht agmolde. Bi gspannt. Und am Donnschtig gits e Vor-Party. Barbecue in the Golden Gardens, das isch e Strand. Ich wird typisch Schwizerischi Banane-Schiffli mit Schoggi gfüllt füre Grill mache.

Wird Euch brichte wies gsi isch. Bis glihiiiiii!