Nach em letschte Itrag bini wiedr kli frustriert gsi: es hett sooo viel grägnet! Es isch wiedr richtig kalt gworde gsi! Ha mit minere Kollegin Nicole geschter (Samschtig) zum golfe abgmacht ka. Ha mi scho uf Rägejagge und Wanderhose und viiiiel Schlamm igschtellt ka. Aber oh Wunder, dSunne isch pünktligg zum Wuchenänd wieder füüreko, juhu! Sin drnoch denn au no go Burgers ässe in dr Red Mill, agäbligg dr beschti Burger vo de States (Foti). Es isch mi erschte Burger in Seattle gsi.

Zobe bini mit dr Anna und em Ike (mini Mitbewohner) zu de Eltere vo ihre gange. Ihre Papi isch 65 worde, mir hän Geburtsdaag und Pensionierig grad in eim gfyyrt. Es sin au ihre Brueder und sini Frau und die zwei kleine Meitli drbi gsi. Es isch so härzig vo ihne gsi, dass si mi iglade hän! Ha mi richtig Teil vo dr Familie gfühlt. Au wenn e Teil vo mir natürligg grad mini eigene Familiefyyrtige vermisst hett. Dr Geburtsdaagskueche isch e Cheesecake New York style gsi, d Oberkaloriebombe unter de Cheesecakes, aber würkligg usgezeichnet. D Anna und ich hän en "arrosto di maiale con salsa al marsala" gmacht ka, en italiänische Brote mit Marsala-Sauce. Dodrfür hän mit miesse im Fleisch kleini Löcher mache, wo mir Späck drigstopft hän. Do hani grad e kli dNeih-Arbet ufm Notfall vermisst hehe. Dä Brote muessi jedefalls wiedr mol mache, so guet!

Drnoch bini denn zu minere Kollegin Marianne heimgange. Es hett en Apéro stattgfunde ka, won ich mehr odr weniger wägem Ässe verpasst ka ha. Und do hani mi vo dr Lori, d Mitbewohnerin vo dr Marianne, zu Shots überrede loh. Denn isch die ganzi Truppe (öbbe 8 lütt) fröhligg zunere Bar bim Greenlake gspaziert. Dört hett sone fiesta de 5 de mayo stattgfunde. Das isch so ne Nationalfyyrtig in Mexico. Do wird ächt jedi Glägeheit zum Partymache gnutzt. Bi mir sicher, dass viel meh do als in Mexico sälber gffyyrt wird hehe.

Hütt bini nomol ufd Driving Range, ha das Wätter miesse usnutze. Ud drnoch no samt de 4 Schläger unterem Arm go Shoppe. Ha nämmligg ächt keini Kleider fürs wärmere Wätter mitgnoh ka und bi froh dassi jetzt doch no paar helleri Summerfarbe in mim Kleiderkaschte ha.

Ah, do falle mir no paar typisch amerikanischi Situatione i: Do seit dr Fründ vo dr Marianne über en andere Typ "Dä kenni vo irgendneume" *nochedänggliggs Gsicht* Do wär denn dFortsetzig in dr Schwiz: "Ah jo, bi mit däm im Militär gsi". Das isch d Ami-Version: "Ah jo, mir sin mit paar Kollege go jage". Es jage do praktisch alli Männer. Samt Riese-Usrüschtig in dr Garage. E verbreiteti Art Ferie zmache sin hunting cruises, also Jag-Krüzfahrte. Weiss immerninig genau wieni mir das vorstelle söll. Ob meh do jede Daag amne andere Ort usstigt und go umeballere got. Mah. Nomol so ne fixi Idee sin d Marathon Läuf. Alli Amerikaner mache mind eimol im Läbe an eim mit. Und zwar au lütt, wo schunsch nid regelmässig go jogge gön. Die rackere sich monatelang ab zum dä Marathon zmache und drnoch höre si meischtens wiedr uf mitm renne. Ah und es sin meischtens so Wohltätigkeitsrenne. Meh muess also meischtens um die 50- paar Hundert Dollar zahle zum mitmache zkönne. Apropos Spände: vieli spände au de Präsidäntschaftskandidate für dr Wahlkampf. Ha immer dänggt dass die vo irgendwelche Firmene und Millionäre unterstützt wärde, abr ich ha nid gwüsst, dass einigi Johns und Jeffs au kleini Summene schängge. In unserer Kuchi hängt au so ne Dankeskarte vo dr Michelle samt Famiiefoti hehe.

Freu mi übrigens immer riesig über all Euri Mails und Postkartene:) Ha scho lang mol welle sage, das das so guet duet vo Euch zghöre!