Die letscht Wuche isch vor allem vo Arbet prägt gsi. Ha lang immer im Spital miesse si, möcht gärn kli mitm Projäkt vorako.

Ha jetzt au e Zuegang für dr Vorläsigsstundeplan beko. Das isch super, jetzt muessi d AAs nid ständig drmit närve mir zsage wenn mir wo Vorläsige hän. Mini pünktlichi Awäseheit 2-mol täglich an dene Witerbildige hett sich wohl au glohnt. Ha sGfühl langsam, dass mi d AAs langsam kenne und ich e kli drzueghör. Die einti Assistäntin hett mir au Komplimänt gmacht ich wüssi scho so viel. Ich sigi nämligg abgfrogt worde. Drzue muess meh sage, dass ich genau so wit ko bi zsage, dass es axiali Ufnahme vomne CT mit Kontraschtmittel im Weichteilfänschter sin. Sorry an alli nid Mediziner, es isch grad kli technisch. Es isch uf jede Fall seeeehr elementars Züüg woni gseit ha. Abr natürligg hani mi trotzdäm meeega übers Komplimänt gfreut:)))

Am Fritig zObe bini amne Konzärt gsi vo Kaiser Chiefs. An alli, wo dä Name nid kenne: umbedingt google, die Songs laufe so oft im Radio! Es isch voll günschtig gsi imne kleine Saal, mega toll!!

Am Samschtig isch sWätter sooo schön gsi, do bini in dr Volunteer Park gange. Es hett e alte Wasserturm dört. Meh ka ufestige und e 360° Sicht gniesse. An däm Daag hett meh au alli Bärge so schön könne gseh, fascht wie z Luzärn;) Drnoch bini im Park inne no ine Orchidee-Garte gange (Otti ho pensato a te), so schön. Und denn hani no e guets Wili Hunger Games in dr Sunne ufm Rase gläse.

Hütt binni mit dr Linnaea go wandere. Zum Glück hett mir mini Mitbewohnerin Wanderschueh könne uslehne. Mir sin in 4h öbbe 10km bärguf und wiedr -ab gange. D Linnaea isch so gross und dra gwöhnt dass es für sie wohrschins e gmietliche Spaziergang gsi isch. Ich bi zimmligg kaputt gsi. Aber es isch eifach traumhaft gsi. Um uns umme dr Piniewald, untr unserne Fiess dr Schnee und ab und zue e Blick uf die schöne Bärge - fascht wie in dr Schwiz!

Hütt zobe hett mi no dMarianne abgholt. Mir sin im University District go vietnamesisch ässe. SLokal hett e kli schäbig usgseh (no schäbiger als üblich do). Aber es isch phantastisch gsi! Und zur Abwägsligg mega gsund! So ne art kalti, rohi Friehligsrolle und denn So Bouillionsuppe mit Glasnudle, Rindfleisch und Krütli (unter anderem au Koriander;). Es isch super gsi. Und drnoch kunnt dr Höhepunkt: Ha Bubble-Tea probiert! Es en Art asiatische Tee. Meischtens kalt mit Iiswürfel. Mine isch Jasmintee mit Milch gsi (ich weiss es tönt voll hässligg abr es isch soo guet). Drin hetts so schwarzi Bölleli. Es sin wiene Art Gelatine-Bölleli. Si schmecke kuum nach öbbisem. Vilicht exrem dezänt nach Lakritze. Es fühlt sich eifach voll luschtig im Muul ah. Soooo cool! Was für en Entdeckig!

Uuuund morn kunnt d Katja, bi so ufgregt! Ha scho so vieli Idee was mir alles mache könnte.

Bis gli