Z'allererscht möcht ich euch mini neuschti Aschaffig vorschtelle: E Thermos. Das isch do in Seattle essentiell. Alli laufe drmit ume und alli sin koffeinabhängig. Wien ich mittlerwili au. Es isch im Winter eifach kalt und nass und do ka meh sich wunderbar mit Kaffi odr Tee ufwärme. Usserdäm ka mehs überall uffülle, es wimmlet nur so vor Coffeeshops (nid nur Starbucks). Und dank emne wärtvolle Rotschlag vo dr Rahel vor emne Zytli hani au könne die richtigi Enscheidig träffe. E Thermos vo dr Marke Thermos. Si sin ihres Gäld würkligg wärt! Puuri Qualität, Isolierig und es tropft nid! Bi begeischteret!

Denn hani euch natürligg nid d Plän vo minere vergangene Wuche welle vorenthalte:

Am Mittwuch bini nach em Schaffe mit ere Kollegin, d Linnaea, öbbis go trinke. D Amis trinke die ganz zyt unterschiedlichschti Cocktails. Jedi Baar hett mindischtens öbbe 5-10 eigeni Kreatione und denn natürligg alli klassische Cocktails (wo unzählig sin). Drnoch hett mir en anderi Kollegin, d Marianne, aglütte si und no anderi würde go Salsa tanze go, ich miessi unbedingt mitko. D Linnaea hett heim welle, drum bini elei zu dr Marianne gange. Mir sin in sone Salsa-Lokal gange, wo zu minere Überraschig extrem voll gsi isch - und das amne Mittwuch zobe! Ha zum erschte mol sit Ewigkeite Salsa tanzt, usserdäm au no Merengue, Chachacha und Bachata. S isch mega luschtig gsi!

Am nögschte Daag ischs natürligg trotz Kaffi weniger witzig gsi. Ha im Spital au mini lang ersehnti Patiänte-Lischte beko. Bi sit denn jede Daag studelang mit Tabälle usfülle beschäftigt. Muess alli Informatione zu de Patiänte in 1 Tabälle zämme bringe (und d Patiänte sin öbbe 3000).

Nach em Schaffe sin mir am Donnschtig no an sone Meeting gange vo Forscher, wo Kontakt hän mit Italie odr Italiäner sin. Es isch wahnsinnig langwilig gsi. Abr drnoch hetts en Ässe imne italiänische Restaurant gäh, wo usgezeichnet gsi isch. Es hett Vorschpiis, 3 Gäng Pasta, Fleisch und Dessert gäh. Zum Dessert e Cannolo. Dr Hammer! Abr drnoch hätti könne heimrolle...

Geschtr zobe bini no mit dr Linnaea und ihrne Kollege furt gsi, si hett ebe ihre "Match" ka, d.h. si hett en Wahlstudiejoor- und Assistänzarztstell beko. Die wärde in de USA zentral vrteilt. Und drum zittere alli bis si e Stell uf sicher hän und au bis si wüsse, dass si au die Stell beko hän, wo si welle hän. Mir sin mexikanisch go ässe und drnoch no öbbis go trinke. S isch luschtig gsi und es hett mi gfreut ihri Kollege kenne zlerne.

Hütt hani mi leider erscht mol paar Stund um mini Doktorarbet miesse kümmere. Mitmne riese Kaffi hani mi and Arbet gmacht...

In de USA isch hütt dr irischi St. Patricks Day gross gfyyrt gworde. Ha mit dr Marianne und ihrne Kollege abgmacht. Zerscht bini zu ihne heime. Mir hän gschlageni 2 Stund brucht bis alli parat gsi sin, sich e paar mol umzoge hän etc. Abr drbi hän mir Musik gloost, Föteli agluegt, Tee trunke... Drnoch sin mir no so Takeaway Thai Ässe (dört muessi wiedr mol ahne, es isch sooo guet gsi!) go hole und hän uns ufe Wäg gmacht ins Zentrum. Unsers Ziel isch natürligg e Pub gsi mit Livemusik und viiiel Bier. Drnoch sin mir no ine Salsa-Disco gange. Es isch super gsi. Abr ehrligg gseit bini scho so kaputt gsi, dassi scho vo mim Bett träumt ha.

Ufm Heimwäg hän mir no die beriehmte Seattle Hotdogs gholt. Die klassischi Usfiehrig isch mit so weichem Brot, wo sitlich ufgschnitte wird (also nid bloss e Loch) und mit dr Wurscht und Cream Cheese gfüllt wird. Es dönt so grusig, aber es isch soooo guet! Mir hän zwar dr Texas-, California- und NY-Hotdog ka, also anderi Variantene drvo, abr jetzt bini mega neugierig ufs Original!

So, jetzt muessi unbedingt go schlofe... Stell mir vor wie dir alli in dr Schwiz grad e super Brunch mit Zopf hän. Bi grad kli niedisch;) Bis gli!