Ha euch kli öbbis vo mim WÄ welle vrzelle.

Am Samschtig bini an somne Tanzmarathon im Unisport gsi.S Yoga (warum au immer das unter Tanze got) isch die reinschti Katastrophe gsi. Es isch eher Altersheimturne gsi. Nur, dass die zwei ältere Lehrerinne alles mögliche gmacht hän zum alli Glänk falsch zbelaschte... Drnoch hetts Zumba gäh, das isch ächt witzig gsi! DLehrerin isch vorne voll abgange. E richtigs Energiebündel. Und dMusik hett au voll gueti Stimmig gmacht!

Drnoch hett mi e Kollegin abgholt. Voll härzig, ha dMarianne amne Obe mit mine roommates kenneglernt. Wo si ghört hett, dass ich vom Usland kumm hett si gseit si hegi au scho en ähnlichi Erfahrig gmacht und si wüssi wie schwer s isch lütt kennezlerne und hett mir grad ihri Nummere gäh. Ha ihre denn au aglütte, drum hett si mi denn am Samschtig abgholt und isch mit mir go Chowder ässe. Chowder isch so ne Suppe mit Rahm, Meeresfrücht, Rahm und no meh Rahm. Si isch wiss (oder mit Tomate au rot) und isch eher dick. Also e richtigi Kaloriebombe. Aber guet isch es:) Ha mi au sehr gfreut Chowder ändligg zprobiere, do das überall usgschilderet isch. Vieli Restaurants bietes ah.

Drnoch hett si mi zu 2 verschiedene Parks brocht. Beidi mitere wunderschöne Ussicht über dr Lake Union und Downtown! Und es isch sogar sunnig gsi, was füre Glügg!

Am Sunntig isch mir übrigens öbbis luschtigs passiert. Ha irgendwie nur wenig zmörgelet ka und es isch zimligg spot worde bisi usm Huus bi. Im Bus hani denn gmerkt, dassi so Kopfweh ka ha - dr Hunger! Bi denn ufe Märt und ha mir in somne beriehmte Ort so ne meatloaf sandwich bschtellt, anschienend wird das in jedem Reisefüehrer empfohle. S Sandwich isch riiiiiesig gsi! Do hett mir dr Källner grad gseit är könni mir d Hälfti ipacke zum mit heime znäh. Has abr natürligg ganz gässe. Dä hett sine Auge fascht nid traut! Es isch würkligg guet gsi! Aber ich muess sage mi favourite isch immerno dä sensationelli Lachs wos do git. Ganz anderscht als dä wo mir daheim ässe. Mmmmh!

Bi übrigens kürzligg mit mine Mitbewohner in somne art CC gsi, es heisst Coxco. Do hetts Chips-Packige gäh wo fascht so gross gsi sin wien ich! Muess unbedingt mol Föteli uffelaade.

Ah und dos hütt scho so viel um Ässe got: Ha hütt mi erschte Donut ka, im Spital amne Tumorboard (für nid-Mediziner: e Konferänz us verschiedenschte Spezialischte, wo gmeinsami Patiänte bespräche). Ha ganz vergässe ka wie langwilig die Sitzige sin. Es isch stolzi 2h gange. Und das halte si 2x wüchentligg ab und es got nur um läberchirurgischi Fäll!

Muess jetzt schnäll ins Bett...

Vermiss euch ganz fescht!