Puh, das isch e langs WE mit viiiiel Party gsi! Das ganze hett eigentligg sogar am letschte Mittwuch agfange. Ich ha aber anderi Plän ka, bi mit paar Kolleginne go Dirty Dancing im Kino go luege. S letschte Mol isch jo en Ewigkeit här gsi! Mir häns so luschtig ka! Und denn ischs mit de pre-wedding Fiierliggkeite am Donnschtig so richtig losgange. Es hett e riese Barbecue in de Golden Gardens gäh, am Strand. Sunnigs Wätter gsi, meh hett d Olympics Bärge-Ketti könne gseh, sooo schön! Es hett Schwins gäh, natürligg alles in de typische "buns", also so Brötli, mit Gmies, Gurke und viiiel Sauce, so guet! Und denn hani Banane-Schiffli gmacht, die sin so guet ako! Leider ischs scho spot gsi bis si parat gsi sin, sodass nüm sooo viel lütt ume gsi sin. Aber alli häns super gfunde, juhu! Drnoch sin mir ine Country Bar go fyyre, es sin würkligg alli mit Stiefel und Cowboy Huet umegloffe und das zmitzt in Seattle, unglaubligg! Am Frytig bini denn doch no go schaffe und ha sogar e zimligg produktive Daag ka (zum Glück, am WE hätti würkligg nütt meh könne mache). Am Frytig obe isch dr rehersal dinner gsi, wo nur ganz wenigi (wie so übligg) yglade gsi sin. Mir anderi sin scho mol ine Irish Pub go vorglüeh. Es isch denn e zimligg langi und wildi Nacht worde. Ha mir am Samschtig e ruhige und erholsame Daag gmacht. D Jungs sin denn irgendwenn itrudlet, also dr Brütigam und all sini Züüge und si hän sich parat gmacht und amüsiert. Währenddesse hani no ne power nap ka. Drnoch hani mi denn au no parat gmacht und bi denn ind Stadt gfahre. Es isch wieder strahlend blaue Himmel gsi - perfeggt! Ufm Forti gsehn dir die schöni Ussicht ufs Meer und dOlympics. D Zeremonie hett imne Park mit paar Innerüümliggkeite stattgfunde. S Motto isch e schiggs Picknick gsi. Sehr entspannt und schön. Und so vieli Kollege sin dört gsi, häns wiedr Mol würkligg guet ka alli zämme. Es hett denn e kline peinliche Momänt gäh, wo dr Vater vo dr Brut vor luter Angscht vor em tanze sich e bitzli zu locker gmacht hett mit de Drinks - dementsprächend isch dRed usgfalle. Es hett jedefalls aber würkligg (fascht) alles so wie plant klappt, glaub dass mini Mitbewohner ächt happy gsi sin. Mir sin denn spöter no in e extrem heisse (dr erschti nid tiefküehlti) Club und denn no ine Bar und hän dr Obe usklinge loh. Am nöggschte morge sin mir denn knapp rächtzytig ufgwache zum rächtzytig zum Brunch zgo. Es sin alli licht verkateret gsi, aber es isch schön gsi nomol alli gseh und in Rueh zplaudere. Denn ab heime zumne Mittagsschlöfli.

Hütt zobe hetts no e fröhliggs Räschte-Ässe (no vom Barbecue) bimne Kolleg daheim gäh und ich ha zum erschte Mol in mim Läbe S'mores ka. Das sin süessi Cracker Sandwiches. In dr Mitti hetts licht gschmolzeni Schoggi und brötleti Marshmellows. Das dönt so komisch, aber es isch sooo guet gsi, ha grad 3 ka hihi.

Und jetzt schnäll ab ins Bett. Vermiss Euch!