Woni ako bi, hett mi mini Mitbewohnerin abgholt und schomol fescht druggt. Das hett so guet do nach sonere lange Reis und ich bi soooo froh gsi wäge all mim Gepäck!

Mittlerwili bini scho paar Dääg do. Die erschte Dääg hani vor allem s Stadtzentrum besichtigt. D "Altstadt", dr höggschti Turm, dr Märt, dr erschti Starbucks vo dr Wält, s Aquarium, d Spaceneedle.

Ha so Glück ka, dass es schöns Wätter gsi isch! Mittlerwili ischs nämmligg eher rägnerisch. Aber das isch nid so schlimm, sit em Zyschtig sitz ich im Käller im Dunkle. Jäjä, wie kann ich das nur als Traumjob bezeichne?

Mini Mitbewohner sin super. Si hän mi die erschte Dääg oft mitgnoh - in Usgang, zu Kollege heim und so.

Versuech jetzt aber mögliggscht au kli lütt sälber kennezlerne, möcht schliessligg au kli sälbständig si.

In dr Uni und im Spital sin die erschte Dääg zimligg müehsam gsi zum alles z organisiere, z beko etc. Do gits e eigenes Büro für alles. Für die usländische Studänte, für die Studänte wo das Programm mache won ich mach (ha bis vor kurzem nid emol gwüsst, dassi an däm Programm teilnimm), für d Studie-Gebühre, fürd Legi, für dr Buspass vo dr Uni, für dr Unisport etc etc etc. Und kei Mensch weiss wär für was zueständig isch. Si wüsse ame nume, dass sis sälber nid sin. Oder ganz oft wüsse si nid emol für was ihres eigene Büro zueständig isch. Aber es sin immer alli fründlich und gän eim e Nummere odr en Adrässe ah zum witerfroge (wo sich ame als falsch usestellt)...

Im Spital gits 1000 Sicherheitsvorkehrige. Ha öbbe 3h lang (und gfühlti 100h) e Datesicherheitstraining miesse absolviere. Do isch mir in aller Breiti und Längi erklärt worde, dassi z.B. keini Patiente-Aglägeheite im Lift odr im Wartezimmer bespräche dörf.

Drfür wird meh au in aller Breiti und Längi ind Computerprogrämm igfüehrt. Ha no nie e sone gueti Ifüehrig ka, bzw grad 3!

Was au super isch, sin d AA-Fortbildige. 2-3x tägligg. Ich gang immer an die am 7.30 und am 12. Und natürligg wird wie übligg in de USA kräftig drzue Kaffi (vom eigene Thermos) trunke und gässe. z Ässe gits entweder öbbis wome sälber mitgnoh hett odr meh ka so fürchterlichi Sache vo dr Cafeteria hole (wo nur so vo Patiänte und Chirurge samt Maske wimmlet). Dört gits gaaanz viel Ungsunds. Zum Glück gits au e kleins Salatbüffet und so Tagesmenüs, wo nid emol so schlächt sin. Aber ich muess zerscht usefinde weli das sin, bevor ich blind bstell...

Hmm, das isch erscht mol alles, wo mir so ifallt. Bis bald!