Letschts Wuchenänd hett mir zeigt warum d Seattleites ihri Stadt so liebe: Wenn s Wätter schön isch, ischs würkligg paradiesisch! Am Samschtig bini zerscht go Golf spiele mit dr Nicole, enere Kollegin. Bis zum Platz ischs e kleiners Abentüür gsi, wil ich samt Bag und Schläger mitm Bus ha miesse dört ahneko. Ha denn no einiges miesse laufe (wie immer hetts uf dr Karte sooo noch usgseh ka). Jedefalls ischs hän mirs luschtig ka. Es isch e super eifache Platz gsi, genau richtig für mis Niveau;) Denn sin mir go thailändischs Ässe hole, wo köschtlich gsi isch, und sin an Strand ässe. Genau, an Strand:)) Es isch scho nid ganz so südländisch und warm gsi, wien ich mir das vom Strand gwöhnt bi. Halt eher e nordische Strand. Aber so schön! Und sogar agnähm warm mit lange Ärmel und Hosebei. Spöter bini ane mexikanischi Party. Es isch eher e Verarschig vo de mexikanische Iwanderer gsi. Und es isch vo lütt mit mexikanischer Abstammig organisiert worde *hilarious* Ha sogar bimne Spiel e Kueche gwunne *juhu* Es isch glaub s erschte Mol in mim Läbe, dassi irgendöbbis gwünn...

Am Sunntig sin mir, dMarianne, e paar anderi Kolleginne und ich go wandere bzw eher spaziere, do zwei spöter abgmacht ka hän und kei Zyt ka hän für e richtigi Wanderig. Zobe isch ursprüngligg e Grillobe am Greenlake, dr meischtbsuechte Freizytlandschaft do in Seattle, plant gsi. Leider ischs kurzfrischtig ins Wasser gfalle. Jetzt hani alles daheime füre Hörnlisalat, wo nur uf dr nöggschti Grillobe wartet... Zum Glück hani ihn nid scho gmacht ka. Es hett sich denn spontan ergäh, dass die einti Kollegin, Dallilah, und ihri Schwöschter und ich Fischtacos gmacht hän, Jamba Juice Smoothies gholt hän und amne Ussichtspunkt go picknicke sin. Ha no nie Fisch Tacos ka, so guet. Und mir hän e wunderbare Sunneuntergang gseh mit Downtown Seattle in dr Färni und em Profil vo de Olimpic Mountains! Das gsehn dir ufm Bild, unte links isch Downtown.

Geschter hani no en absolute Erfolgsmomänt ka. Nachdäm ich mi zimligg vor unserem Ober-Guru-Chef vo dr Radio blamiert ka ha (hani das scho verzellt?), hani mi binere Fortbildig freiwillig gmolde zum en Ultraschall zbefunde. Bzw ha eifach losgschwätzt bevors en andere Assistänt gmacht hett. Es isch e Niere gsi, also wenigschtens en Organ woni sit minere Doktorarbet kli kenn. Trotzdäm hani jo no nie im Untraschall gschafft und ha dorum kei Erfahrig ka. Ha alli Befund gfunde uf de Bilder. Es hett mim Sälbschtwärtgfühl ächt guet do zgseh, dassi im entscheidende Momänt doch kli meh als gar nütt weiss hehe. Nach dr Beschribig hett denn d Referäntin en andere dragnoh zum s MRI zum Fall zbefunde und d Diagnose z stelle (ich ha paar Differentialdiagnosene gäh ka). Bi froh gsi, ha nämmligg no nie e xanthogranulomatösi Pyelonephritis (fürd Mediziner), e sälteni Art vo Entzündig vo de Niere, gseh ka.

Ansonschte kanni jetzt im Spital ändligg mini Mässige mache. Es got eigentligg guet vora, aber ich bruch trotzdäm immer wieder Hilf. Amigs kanni die Tumore ufm MRI eifach nid finde. D Diagnose isch ebe amigs mitm CT gstellt worde, dört isch är amigs besser sichtbar. Mi Mentor isch immer sehr beschäftigt, abr all paar Dääg findet är zum Glück kli Zyt.

Hoffentligg wirds das Wuchenänd nomol so schön...