Soooo, jetzt muessi euch allne unbedingt alles vom letschte WÄ vrzelle! Mir sin am Donnschtig morge losgfahre. Bi mitm Ray, em Fründ vo dr Marianne, em Luke und dr Marianne richtig Oregon State in Süde gfahre. Es isch immer wärmer und naturricher gworde. Sin denn nach ca 6 Stund Fahrt ändligg am Mecca Flats Campground ako, wo alli andere scho uf uns gwartet hän. Mir sin 16 lütt gsi im ganze. Sobald mir ako sin hetts zerscht mol e Willkommensbierli gäh und mir hän unseri Zält ufgschtellt. Do ich mis Zält mit anderne 2 teilt ha, isch es scho gschtande, juhu! Es isch eifach schön gsi dört in de Wärmi zsitze, zentspanne und dr untergehende Sunne zuezluege. SKlima isch ganz wie inere Savanne gsi, öbbe 35 grad am Daag, küehl in dr Nacht und schön trocke. Am nögschte Daag hän mir all unseri Zält zämmepackt, unseri gmieteti Boot, Küehlboxe und Lifejackets gfasst und sin ab ufe Deschutes Fluss go River Rafte (ganz genau!). Bi irgendwie die vorhärgehende Dääg kli nervös gsi, bi nämligg vorhär no nie gsi und ich ha nid genau gwüsst wie das wird und so. Aber dAnna, mini Mitbewohnerin, hett mir denn erklärt, dass si dä Usflug sit 15 Joor mache, um die glichi Zyt, ufm glyche Fluss und es machi eifach sooo viel Spass und sigi nur e bitzli "scarry" am letschte Daag. Und es sigi au no nie öbbis würkligg Schlimms passiert. Leider hän dAnna und dr Ike sälber nid könne mitko, wil si eifach zue viel ztue ka hän mit all ihre Hochzytsvorbereitige. Zrugg zum Fluss. Die erschte 2 Dääg sin eifach nur gmietligg gsi. Mir hän uns mehr odr weniger eifach dr ganz Daag triibe loh. D Captains vo unserne 3 Boot hän je e paar Rueder ka, womit si dBoot gstüürt hän und si hän ihre Job eifach super gmacht. Mir anderi häns eifach nur in dr Sunne gnosse und seinte oder andere Bierli trunke. Zum zMorge hetts jewils en Uswahl an Bagels mit Cream Cheese, Lachs, Muffins, Banana Bread, exotischem Fruchtsalat und Kaffi gäh. Do mir natürligg kei Milch hän könne mitnäh, hetts amigs kli Baileys gäh;) Am letschte Morge sin leider unseri Zmorge Tacos entfalle, do dr Ofe kaputt gange isch. Und die unglaubligge Znacht. Grillierts Fleisch, natürligg imne Sandwich-Brot inne (sin jo schliessligg in de States), verschiedenschti Salat, Cookies, Brownies... Sreinschte Gourmet-Paradies! Zobe sin mir eifach gmietligg uf Camping-Stüehl umeghoggt und häns uns guet go loh. Füür hett meh keini könne mache (usser emne Grillofe, wo mir mitgnoh hän), wäge Brandgfahr. Was mir aber überhaupt nid vermisst hän, bi dene perfeggte Temperature. Vor em letschte Daag hani kli Respäkt ka, aber es isch überhaupt nid schlimm gsi! Mir hän zum erschte mol e paar Stromschnellene ka, aber würkligg nütt beängschtigends. Und sGanze Wuchenänd über hän mirs eifach sooo luschtig ka! Bi völlig überrascht und happy gsi, wie schnäll und ohni Problem ich ha könne lütt finde zum überhaupt ahne und zrugg zfahre, die Einti hett mir ihre Platz im Zält abgäh, damit ich mit lütt ha könne im Zält si, woni zumindescht e paar mol gseh ha. Und si hän mi ufs Boot gnoh, wo eifach am meischte Spass gmacht hett! Bi mit 2 anderne Girls, woni scho kennt ha, zämme gsi und si hän so witzigi Stärnli-Sunnebrülle kauft ka (FB lässt grüssen) und si hän eifach au e Paar für mi ka! Bi erscht sit paar Mönet im Land und ha mi so integriert gfühlt. Was für e Gaschtfründschaft! Huet ab and Amis! Was für e wunderbars Wuchenänd, ha mi wie in de Ferie gfühlt! Am Mäntig bini zwar völlig erschlage gsi und ha en Usschlag beko (bi bi witem nid die einzig), aber es hett sich sooooo glohnt! RAFT TRIIIIP!!!

Wohl oder übel hett snormale Läbe wieder agfange. Vrsuech flissig z schriibe. Und es isch tatsächligg warm im Momänt, dr Summer foht do würkligg erscht mitm Nationalfyyrdaag, 4th of July ah;)