Ha grad e richtig lange Daag im Spital hinter mir. Dr Chef vo mim Chef hett unseri Studie zimligg usenand gnoh. Oje, jetzt bini komplett wieder vo Arbet überschüttet und ich bi gar nüm lang do! Wenigschtens isch ärs gsi und nid erscht d Reviewer bim Ischigge an die erschti Zytschrift... Drnoch bini kurz ufd Driving Range zum entspanne und denn hani fascht e Kilo Kirsi ufm Heimwäg verputzt, wie sehr wirdi d Washington cherries vermisse!

Letscht Wuche bini uf Mount Rainier go wandere - ändligg!! Das isch für mi so öbbis wichtigs gsi, woni scho sit em Afang ha welle mache! Es isch sooo schön gsi! Mir hän unzähligi Blueme gseh und e paar Hirsch! Hän denn nach em zmittag nomol e Kleini Wanderig an ganz vielne Wasserfäll vrbi gmacht, eifach traumhaft. Das isch eine vo mine schönschte Dääg in Washington (State) gsi! Obwohl mir jetzt grad einigi anderi Sache in Sinn kömme. Dir wüssed jo alli scho beschtens Bscheid;)

S letschte WE bini in Portland gsi, bi mit dr Marianne zämme zu ihrne Eltere gfahre, si wohne nämligg dört. Nach 3h fahrt sin mir ändligg ako. Ha ihri Schwöschter au kenneglernt, wo grad 6 Mönet in Europa verbrocht hett. Es isch immer so witzig dEltere vo Kollege kennezlerne. Do wird eim klar warum si so sin wie si sin hehe. Am Samschtig sin mir die ganz Familie samt Grossvater (ha scho lang nüm kei so richtigs Familie-Ässe meh erläbt ka) Chinesisch go ässe. Es isch so guet gsi! Ha bishär schinesische Ässe immer nur als sehr fettig und frittiert erläbt ka und das ischs überhaupt nid gsi! Sehr gschmacksriich, abwäggsliggsriich und überhaupt nid frittiert, mmmhh! Denn sin mir ind Stadt gfahre, an Wuchenänd-Märt, wo riiiiesig isch. Mir hän so viel Ständ gseh mit allerhand Kunschthandwärk, Ässensbuudene etc. Denn ischs witergange zum Shoppe and 23rd St. Es isch so ne Quartierstross mit ganz vielne Boutique Kaffis und Restaurant. So ne Hippie-Version vom Palermo-Quartier im Buenos-Aires oder Georgetown in D.C.. Denn sin mir in die berüehmti und RIESIGI Powells library. Si nimmt e ganze Hüüserblock i! Aschliessend sin mir no zum Vodoo Donut, dr wohl alternativschti Donut Laade wos überhaupt git. Ihri Spezialität sin Donuts mit Maple Glaze und Bacon. Ah und meh ka e Sarg samt 60 donuts für 100$ bschtelle. Kan ich mir nur für e Halloween-Party vorstelle, bi mir aber sicher, dass sich die in Portland au schunsch verkaufe lön. Portland isch en enspannteri und Hippie Version vo Seattle (tatsächligg, es git no hippier und relaxter). Zur Krönig sin mir no go Sushi ässe und daheim bini denn zu Bride and Prejudice, e Bollywood Version vo dr Verfilmig vom Jane Austen Wärk, igschlofe. Am Sunntig sin mir denn ans Meer gfahre. Und ich ha usegfunde warum dMarianne mi so usglache hett woni gfrogt ha öbi e Bikini azieh söll. Es isch kalt, extreeem windig und rägnerisch gsi! Und so sigs an 98% vo de Dääg vom Joor, also nütt mit bruun wärde... Und denn hän mir e würkligg wahnsinnige Chowder (Fischsuppe) gässe. Das hani nie meh bschtellt ka sit ich usegfunde ka ha, dass es eifach so rahmig isch und s eim scho nach dr Hälfti fascht schlächt wird. Aber das Mol ischs würkligg usgezeichnet gsi! Denn sin mir no go so Sugus artigi Täfeli go kaufe wos anschinend immer nur in so Stranddörfli zkaufe git. Und denn ab wieder nach Portland, wo mir alles packt hän und nach Seattle zruggfahre sin.

Ha hütt gmerkt, dassi do nur no 1 ganz volli Wuche ha. Isch scho no komisch, nach all dene Mönet kann ich mir gar nonig vorschtelle dassi soo gli wieder in dr Schwiz bi! Ha scho mit mim Mentor amigs Schwierigkeite Dütsch zrede... Hehe. Aber ich freu mi soooo uf Euch!