Mini Liebe, es isch wiedr mol sooo viel passiert und zuuu lang här sit isch s letscht mol gschriebe ha!

Vorletschs Wuchenänd hän mini Kollegin Nicole und ich en Usflug zum Shi Shi Beach gmacht. Es hett nid bsunders optimal agfange. Si hätt mi sölle am 5:30 am morge abhole damit mir uf die erschti Fähri könne. Wo sNatel glütte hett und mi gweckt hett hani scho gseh, dass es dusse hell isch und dass es unmögligg 4i si ka, d Uhrzit für mi Wecker. Ha also in 10min duscht, dHoor gwäsche (ha gwüsst, dassi nid so bald wiedr drzue ko würd), mi azoge und mi Rucksagg mit nach usegnoh. Zum guete Glügg hani scho am Vorobe fertig paggt ka! Denn hän mirs tatsächligg uf die erschti Fähri gschafft! Sobald mir uf Brainbridge Island usgstige sin (samt Auto), sin mir witer gfahre, ab dr Insle und nach Poulsbo, wo mir inere Bäckerei ändligg unsers zmorge und dr obligatorischi "latte" gholt hän. Drnoch sin mir witer gfahre, hän bi Sequim wunderschöni Lavändelfälder bsuecht. Denn Zmittag imne Hotel, wo idyllisch amne See und bi de Bärge (ganz wie z'Interlake) gläge isch. Denn sin mir denn au scho in dr Olympic National Park iträtte. Mir hän miesse in Port Angeles e Bear Can hole, das sin so Riesebüchsene mitmne spezielle Verschlussmechanismus, wo d Bääre nid ufbekömme. Die losst meh denn samt em ganze(!) Ässe dinne immer schön usserhalb vom Zält. Für alli Twilight-Läser: Genau, Port Angeles! Mir sin im Gebiet gsi, wo die ganzi Twilight-Gschicht verzellt wird. Das hani übrigens erscht realisiert, wo mir dört gsi sin. Ha immer dänggt es sige erfundeni Ortschafte. Denn hän mir no so Bewilligunge brucht zum ins Indianer-Reservat izträtte brucht. Hän unser Auto imne Garte parkiert, es git Indianer, wo sich so e schöns Extragehalt verdiene. Und denn sin mir losgwanderet. Ihne in Rägewald. E nordische Rägewald, also kei Dschungel odr so. Dr wäg isch zimmligg schlammig gsi, aber es isch alles guet gange. Und denn sin mir am Shi Shi Beach ako, was für e magische Ort! Wunderschön! So nordisch-schön. Meh dörf sich kei Strand mit Sunneschiin vorstelle. Eher mit so Näbel. Halt wie in de Twilight-Büecher beschriebe. Und denn hän mir sZält ufgstellt und e Füür gmacht, was gar nid so eifach gsi isch, es isch bestimmt e 90%igi Füechtigkeit gsi. Alli Zündhölzli sin grad wiedr erlosche. Jedefalls hän mirs gschafft. Hän Würscht brötlet. Die hän mir denn in Brötli gleggt. Würscht eleige kenne si do nid, es git immer grad Hotdogs. Und drzue Gmies, Hummus und Chips. Ha denn minere Kollegin zeigt wie meh Banane-Schiffli ufm Füür macht mit Schoggi dinne, si isch ganz begeischteret gsi! Drnoch no ne Verdauuingsspaziergang und ab ins Bett. Am nöggschte morge hän mir grad nomol e Füür gmacht (bi scho kli stolz druf;) und es hett Oatmeal, Tee und Scones vom vorhärige Daag gäh. Schön satt hän mir uns ufe Wäg zu de Wasserbecke gmacht. Wenn Ebbe isch, entstöhn natürlichi Wasserbecke. Drin hän mir so viele Anemone, riesigi Seestärne und unzähligi Muschle, woni zum Teil no nie so gseh ka ha, bewunderet und gfötelet. Ach, muess umbedingt wiedr Zyt finde zum Föteli ufelaade. Denn hän mir alli unseri Sache packt, sin zruggwanderet und rächtzytig zum Auto ko, es hett wenig spöter afo rägne. Typisch pacific north west Klima. Sin denn nach Forks gfahre, genau so wie in de Büecher. Hän e kleini Rundi dreiht, es hett dört im Grund gnoh nütt bsunders. Drnoch sin mir no zumne andere Wald gfahre, wo eher so e nordische Wald wie mir si öbbe kenne, gsi isch. Dört hetts e super schöne Wasserfall zbewundere ka! Sin denn nach Port Angeles gfahre, wo mir ändligg e agnähm warmi Duschi hän könne näh. Hän uns no zum zNacht ufgrafft, das Chinesische Restaurat isch würkligg guet gsi! No ne Wyy inere Winebar am Hafe und mir sin todmied ins Bett gfalle. Am nöggschte Daag hän mir e kli Port Angeles besichtigt, es git vor allem e Hauptstross, wo no härzig isch, und die ganzi Strecki an dr Küschte entlang. Ufm Wäg zrugg sin mir in Port Townsend go ässe. Das Städtli isch sooo härzig! Hän e Rundi dreiht, hän usgezeichneti Crabcakes und Lachs-Tacos gässe und imne total typische amerikanische Glace-Laade Glace ka und Lieder glost. Sin denn wiedr mit dr Fähri nach Seattle gfahre. Es isch genial gsi!!!

Ha no sooo vieles meh zverzelle, muess jetzt aber dringend schnäll go schlofe, muess morn wieder frieh ufstoh. Wird sobald wie mögligg wiedr schriibe. Und natürligg Föteli uffelaade.

Bacioneeee