hmm, weiss gar nid so rächt wo afo. Es isch so vieles passiert sit mim letschte Itrag! Also zerscht mol isch mi dKatja go bsueche ko. Mir hän sooo viel Spass ka! Ha mi so gfreut ändligg wiedr e vertrauts Gsicht um mi ume zha und öbberem alles z zeige, won ich do so erläb. Hän au so ne mega luschtigi Fahrt gmcht uf somne Bus, wo glichzytig e Boot gsi isch. Hän also e Tour in dr Stadt in verschiedene Quartier gmacht und ufm Lake Union. Und dr Fahrer hett so doofi Perrückene und Hüet treit und d Kinder an Bord hän so Pfifene ka, wo so ne Äntegrüsch gmacht hän. So typisch Ami. Aber es ghört do eifach drzue und mir häns luschtig ka hehe. Leider hani die ganz Zyt miesse schaffe und si isch am Sa wiedr abgfloge, drum hän mir nur zobe würkligg Sache könne unternäh. Ah und mir hän tatsächligg no öbbis richtig kulturells gmacht: es hett do nämligg e super schöni Gaugin-Usstellig! Vermiss di, Bella!

Die nöggschti Wuche isch sehr kurz gsi, bi nämligg scho am Mittwuch nach Ottawa. DReis isch kli umständligg gsi, ha zerscht e Zug nach Vancouver, Canada, gnoh und denn vo dört us e Flug nach Ottawa. D Zugfahrt und die ganzi Organisation isch no spannend gsi, meh muess do praktisch wie am Flughafe "ichecke" und dr Kondukteur muess eim persönligg e Platz zuewiise. Woni nachmne ganze Daag reise ändligg ako bi hani mi soooo gfreut, dass mi d Yesim, mini kanadischi Kollegin, go abhole isch! Es isch super gsi, mir sin sogar 2 Dääg uf Montréal gange. Also eigentligg isch d Stadt sälber würkligg nütt speziells. Abr alli schwärme sooo vo Montréal! Es isch eifach, wils dört meh zUnternäh, zShoppe git, meh cooli Restaurants, Bars und Clubs git. Ha dört zum erschte Mol so ne Art jüdischs Fast-Food (mega zarts Fleisch) probiert und wiedr mol e Nespresso ka (fascht wie daheim). Und es hett e Mango ka, mi Lieblings-Laade:))) Denn hän mir no Ottawa downtown besichtigt, das hett mir super guet gfalle! SParlamänt isch so schön! Und Chinatown! So ne guets Dim Sum! Und die ganz Zyt über Sunneschiin, bi scho gar nüm dra gwöhnt gsi. Nachdäm ich au no Maple Butter und Icewine probiert ka ha, bini total happy wiedr zrugg nach Seattle.

Letscht We bini mit minere Kollegin Marianne ane Abschieds-Ässe (Sushi mmhh!) und aschliessendi Party vomne Kolleg vo ihre gange. D Bar isch au sehr schön gsi, mit sicht ufm Lake Washington (samt Jachte) und em belüchtete Space-Needle. Und sit langem hani wieder sooo viel tanzt. Eifach super!

Am Sunntig obe hett denn e Kolleg vo mine Mitbewohner sini Geburtsdaags-Party ka. Und do är dr Grillmeischter Nr.1 isch, hetts WAHNSINNIG gueti Ribs gäh. Und die Sauce drzue! Und drnäbe "Fritopie", e typisch südweschtamerikanischs Gricht. Es sin Bohne, Zwibele, Tortillachips und Käs, alles in dere Reihefolg ufschichtet und im Ofe backe bis dr Käs so rischtig schmilzt. So richtig Ami-Food hehe. Und zum Dessert hani mit mine Mitbewohner Glace gmacht. Ha gar nid gwüsst, dass es so Maschienene git wo meh vo Hand dreihe muess bis es igfriehrt (Foti). Do hän mir uns alli abgwäggslet. Isch no luschtig gsi.

Denn muessi no öbbis vom Schaffe vrzelle... Mir hän welle afo d Bilder aluege. Und dodrfür hän mir si ane bsunderi Workstation (PC) mitmne bestimmte, fürd Läbere bsunders guete, Programm miesse schicke. Und so effiziänt ich zsi vrsuech, hani natürligg grad öbbe 30 MRIs (Magnetic Resonance Imaging) gschickt. Do isch abr eifach nütt ako, über 2 Dääg!! Do hani em IT aglütte. Und die Typin hett zerschtmol usgruefe ("holy cow"), warum ich denn über 100'000 Bilder glichzytig schigge würd (Anm: en MRI hett 500-3000 Bilder). Ha das doch nid könne wüsse. Naja. Denn hän si zum Glück die Wartelischte glöscht. Jetzt dörfi halt nur 1 Untersuechig (MRI) alli 10min schigge, so ne seich... Und zu allem ahne hän si dr Chef informiere welle bevor si öbbis lösche. Bi jedefalls froh, dass das mol glöst isch. Jetzt muessis nur no schaffe mit mim Mentor ändligg e Besprächig zha. Sit öbbe 2 Wuche mien mir einiges bespräche, jetzt ischs langsam dringend. Abr wie das im Spital so isch, wird meh immer wiedr vo Patiänte und anderne Ärzt unterbroche. Bi abr ganz optimistisch für morn.

Puh, das isch glaub mol sWichtigschte vo de letschte Wuche gsi. Vermiss euch alli mega! Baciiiii übere Teich!