Hehe, geschtr ischs super gsi! Es sin meeeega viel lütt do gsi fürd Iweihig! Aber es isch alles sehr entspannt vor sich gange, es hett lütt in jedem Alter ka, vo 3jöhrige zu Ältere. Mir hän so viel zässe gmacht ka. Dr Ike hett Würscht grilliert und meh hett sich wie so typisch do, drus e Sandwich könne mache. Was meh alles drimache ka? Suurgurke, Suurkrut, Zwiebele, kochti Paperoni, cream cheese, Ketchup, Sänf... Würd grad nid alles glichzytig näh, aber jede kas ganz so mache wies eim am beschte schmeckt! Drzue hetts verschiedeni Salat ka, ich ha no Swiss style Hörnli-Salat vorbereitet ka;) Und denn hän mir wieder mol sälber Glace gmacht ka und d Anna hett cookies backe. Ha mis erschte Peanut Butter cookie ka, grauehaft süess, aber dr Ärdnuss-Gschmack isch garn nid mol so schlächt gsi...

Hütt bini denn wieder go schaffe. Dr Morge isch eigentligg ganz guet verloffe, aber woni nach em Ässe wiedr zu mim Arbetsplatz ko bi isch die bösi Überraschig ko: Mini Datei mit dr riesige Tabälle mit allne Patiänte und de Mässige isch defäkt gsi! Bi do druf ca 3h mit de IT lütt am Telefon gsi. 2 verschiedeni lütt hän mi berote und es isch scho no überraschend gsi, si hän völlig gegesätzligi Meinige ka! Dr erschti hett mir sehr aschtändig versuecht bizbringe, dassi alles falsch gmacht heg mit Excel. Ich hegi s Programm völlig überforderet. Es hett en öbbe 1stündige Access Kurs mit drzue gäh. Ha drnoch usegfunde, dass mi Mentor Access nid so mag und drum isch das denn au erledigt gsi. Usserdäm leider die neu erschtellte Dateie au dr Geischt ufgäh und dr neui IT-Mensch hett uf mis Dränge nach sinere Meinig übers Ganze gmeint är würdi alles genau glich witer mache wienis bishär gmacht ha. Naja. Abgseh drvo sin würkligg d Date vo de letschte 2 Dääg verlore gange, wird morn mol kli ufruume und luege was jetzt die gschiidschti Lösig isch in däm ganze Chaos.

Hütt zobe hetts no ne fröhliggs Räschte-Ässe mit paar Kollege vom Ike gäh. Ich bi jetzt aber au froh ins Bett zgo, es isch e lange Daag gsi...

Ufm Foti gsehn dir übrigens die orange agschtricheni Space Needle. Gseht mehs?

Vermiss euch!!!!