So, wie vrsproche kunnt dFortsetzig.

Bi also nach em Memorial Day heime ko und am nöggschte Daag go schaffe. Am Obe hani au scho wiedr schnäll mi Köfferli paggt und bi zum Flughafe - nach D.C.! Sobaldi ako bi hett mi dHitz e kli wiene Schlag troffe, bi überhaupt nüm dr gwöhnt gsi! Aber sooo schön ändligg mol in kurze Hose oder im Röggli umelaufe zkönne!

Zobe hani au scho dLivia troffe, wo mit dr Uni dört gsi isch. Ha mi so gfreut di wiedr zgseh!! So toll wiedr Dütsch rede zkönne und mit öbberem Sache teile zkönne, wo meh guet kennt! Mir hän immer wiedr gwitzlet, dass das unseri kleine Summerferie sin, es isch nämmligg so warm gsi, mir hän könne in Shorts und Flipflops umelaufe, Sehenswürdigkeite besichtige, guet ässe, in Usgang go, alles nach Luscht und Luune - eifach Ferie! Am Mittwuch hani zerscht dr Botanischi Garte besichtigt und denn e guets Schlöfli uf dr Mall ufm Raase gmacht. Drvor bini eifach no übermieded vo de paar Stündli Schlof im Flugzüüg gsi und dr Hitz. Bi wie neugebore! Bi denn voller neuer Enerigie ind National Art Gallery (e Traum!) und ins National Museum of the American Indian (spannend, ha gar nid gwüsst, dass es so vieli ganz unterschedlichi Indianerstämm gäh hett) gange. Und denn hani ändligg dLivi träffe könne, juhu! Sin denn no gmietligg mit paarne vo ihrem Projäkt inere ganz härzige Gegend näbe dr Gorgetown University go ässe. Natürligg dusse, ach, traumhaft! Am nöggschte Daag sin bi mir denn dMemorials agseit gsi, es isch würkligg spannend gsi, bsunders sVietnam War Memorial hett mi beidruggt. Ha denn dört in däm Park vo dr Mall e Ranger troffe (bi jo sooo ne Fan vo de Rangers, si sin sooo cool), wo mir alles übers Memorial verzellt hett. So lieb! Bi so froh gsi, ha nämligg kei Reisefüehrer drbi ka. Spöter hani wiedr dLivi troffe und mir sin no einigi Botschafte go aluege, wo alli uf dr gliche Stross sin. Es isch ächt witzig gsi, die ganze Länder vo de Fahne här vrsueche zerrote, mir sin zimmligg schlächt gsi;) Ha e paar Flaggene zum erschte mol in mim Läbe gseh. Am nöggschte Daag ischs mit Sightseeing witergange, sCapitol, dr Eastern Market und dört hani au zum erschte mol sit Ewigkeite wiedr italiänisch gässe. Es hett so guet do! Ha realisiert, dassi so sehr Mozzarella vermisst ha. Do gits nur sehr wenig, völlig übertüürt und nid so gueti... Und denn sin mir no ane Ballett gange. Has so gnosse! Am letschte Daag hän mir Souvenirs gshoppt und no e paar Summersache kauft, ich hoff ganz fescht, dass es in Seattle au mol warm wird;) Denn sin mir zum Pentagon gfahre. Sehr idrüggligg vo usse, es isch riiiiiesig! Und meh dörf keini Föteli mache:( Hän uns denn zimligg miesse ufraffe zum zum Arlington Cementery zlaufe, sin scho zimligg erschöpft gsi. Aber es hett sich sooo glohnt! Und grad im däm warme Spotnomidaagsliecht ischs eifach schön gsi. Und die Sicht ufd Stadt! E letschts wunderbars Znacht und paar Drinks und denn ab ins Bett. Am nöggschte Daag hän mir uns denn leider scho wiedr miesse vrabschiiede. Ha sone Momänt ka, woni am liebschte mit heime gange wär, vermiss euch alli so fescht!!

Jetzt bini wieder e paar Dääg in Seattle. Am Afang wiedr sehr rägnerisch aber hütt schiint dSunne *yesss*

Schigg euch e Schmutz übere Ozean