Unglaubligg, bi scho über 2 Wuche do! Es kunnt mir so vor als wäri erscht geschtr ako...

Die letschte Dääg bini vor allem mit Schaffe beschäftigt gsi. Dr Spitalalldaag bi de Radiologe fot do am 7:30 mit dr AA-Fortbildig ah und got bis öbbe am 17:30. Leider hett s Ethikkomitee do erscht geschtr obe unseri Studie bewilligt. Und drum bini vor allem drmit beschäftigt worde mitm MRI-PC-Programm "umezspiele" und mit dr Literatursuechi. Bi ganz froh gsi drzwüsche immerwiedr mol e Fortbildig zha, wos um anderi Theme gange isch. Bi leider anere Fortbildig au scho dragnoh worde mit ere Frog, das isch zimligg peinligg gsi. Für alli nid-Mediziner muessi erkläre, dass es in dr Magnetresonanz Tomographie, kurz MRI odr MRT, verschiedeni sogenannti Sequänze git. Im Studium lernt meh knapp T1 und T2 (die heisse eifach so) kenne. Aber es git mittlerwili öbbe mind e Duzend anderi. Und natürligg hani bi dere Fortbildig kei Ahnig ka weli Sequänz die ufm Bild gsi isch (das muess meh am Afang immer sage). Oje.

Ansonschte sin leider d AAs nid umbedingt bsunders kontaktfreudig, si gön irgendwie nie öbbis zämme go trinke odr so.

Drfür isch die älteri Generation umso fründlicher. Mi Tutor, und zwei witeri Kollege vo mim Tutor hän mi scho zu sich iglade (samt Frau und Kinder) oder hän mi scho go öbbis mit Kollege go tringge mitgnoh. Mega lieb vo ihne. Abr ich hoff glich immer no, dass ich au irgendwenn mit dr jüngere Generation öbbis unternäh ka. Ham mir au scho überleggt, öbs dra liggt, dass alli die 3 obegenannte lütt nid-Amerikaner sin, eine isch Griech, eine Chilen und dr dritti Italiäner. Kei Ahnig. Vilicht ischs au nur Zuefall.

Langsam gwöhn ich mi au dra, dass alli ständig am ässe sin und immer e Thermos mit Kaffi drbi hän. Au sZmittagässe findet während dr Fortbildig am Mittag statt. Oft ischs e Konferänzschaltig vomne andere Spital. D AAs ässe, loose zue und schwätze mit enander drbi glichzytig. Ich bi do fascht kli überforderet... Vor luter Kaffithermos bini au scho total koffeinabhängig worde.

Ah und hütt am morge hän mir mit mine Mitbewohner meeeega gueti Eggs Benedict gmacht *mmmhh* und so Gmies drzue woni no nie kocht ka ha (im Bild). Bekumm grad no Kochstunde mit drzue:)

Hütt zobe sin mir bi Kollege vo mine Mitbewohner zum Znacht iglade, dr Gaschtgäber isch anschinend so öbbis wiene Grillkönig. Freu mi druf!

Und am Mäntig muessi dringend wiedr Sport mache...

Haus mi go parat mache, bis gli wiedr