Sletschte Wuchenänd bin ich in Vancouver gsi, es isch grossartig gsi!! Ha mi sooo druf gfreut ka, wenn mini Kollegin Lisa ändligg nach Vancouver zruggkehrt zum si go bsueche zgo! Do muessi vilicht no ne Erklärig ahängge. Ha d Lisa in Buenos Aires im Hostel kenne glernt. Dört hani eifach super Zimmergenosse atroffe ka. Was nid immer sälbschtverständligg isch imne Hostel. Mir sin mir irgendwie e super Gruppe gsi, hän die ganze Daag zämme vrbrocht, sin zämme in Usgang etc. D Lisa isch denn irgendwie au mol mitko und sit denn isch si immer au drbi gsi (bi e ganzi Wuche in BS AS gsi). Und do si vo Vancouver isch und ich gwüsst ha, dass ich nach Seattle ko wär, hän mir gseit ka, dass mir uns unbedingt träffe mien sobald mir beidi dört sin. Und so bini drzueko am Samschtig ganz freih am morge ufe Zug zgo. Si isch mi denn go abhole ko und mir hän zerscht mini Sache zu ihrne Grosseltere brocht (wo mir au übernachtet hän). Ha denn usegfunde, dass ihri Grosseltere Italiäner sin, sone luschtige Zuefall! Und denn hän mir am Samschtig fascht sämtlichi Quartier vo Vancouver zFuess besichtigt, es isch eifach genial gsi! Ha au Caesars probiert, dass isch e Drink, wo meh nur in Kanada kennt. Es isch ähnligg wie Bloody Mary, nur dass ich Bloody Mary nid so gärn ha und Caesars ächt super schmeckt! Und usserdäm sin anschienend die kanadische Drinks nid so abartig stark wie die amerikanische. Denn sin mir völlig erschöpft heime und wäre fascht ufm Sofa igschlofe. Mir hän uns denn aber zämmegrisse, es isch schliesslig mi einzige Obe in Vancouver gsi und sin no in Usgang. Ha e paar vo ihrne Kollege kenneglernt. Allli super sympathisch, e kli Hippies vo dr Art här. Ha aber d Isicht ka, dass eigentligg alli Kanadier e kli so sin, zumindescht alli woni je kenneglernt ha. Es hett nüt mitm Usgseh ztue, es isch eifach e kli dr Läbensstil in ihrer Freizyt. Am Sunntig sin mir denn go brunche, es isch soo guet gsi. Denn kli go shoppe und an Strand. Es isch so schön gsi in dr Sunne zhöggle! Es isch natürligg e sehr nordische Strand gsi, also nid grad heiss. Aber eifach grossartig dBärge und glichzytig sMeer mit de riesige Schiff zgseh. Richtig idrüggligg. Denn hän mir no dr Märt bsuecht. Würklgg riesig. Mit enere riesige Fischuswahl. Und ich ha Maplefudge probiert und Maplebutter kauft (bi scho süchtig). Denn wäri fascht scho zspot zum Bus zrugg nach Seattle ko. Ha denn mit mim härzerwärmendschte Lächle dr Buschauffeur bittet uf mi zwarte währenddäm ich no schnäll zum MacDonald grennt bi und no öbbis zässe gholt ha, dFahrt got nämmligg 4h. Mir sin denn paar min zspot abgfahre, aber ich bi würkligg froh gsi öbbis zässe zha. Bi kurz vor de 10ne heimko, grad rächtzytig bevors ganz dunkel worde isch. Hoff, dass ichs gli wider schaff nach Vancouver zgo, Kanada gfallt mir würkligg sehr!

Die Wuche hani no zimmligg viel gschafft, mi Mentor hett ebe meischtens erscht zobe Zyt für mi und drum blibi meischtens so lang wie alli andere, wenn nid amigs länger.

Das Wuchenänd wärde mir e Housewarming Party ha, mini Mitbewohner sin ebe erscht kurz bevor ich ako bi izoge. Und langsam isch alles richtig igrichtet... Bi gspannt, es hän 50-60(!) lütt zuegseit. Kenn vieli vo ihrne Kollege und Verwandte aber natürligg länggscht nonig alli. Und ich ha sälber au no 4 lütt iglade. Ha mi nid getraut meh izlade, weiss ächt nid, wo all die lütt Platz ha wärde hehe. Aber es wird bestimmt luschtig, freu mi scho mega druf!