... in Lanai ako simmer miteme Shuttlebus zur Hauptstadt Lanai City ufe gfahre worde - ufe, will Lanai City als einzigi Hauptstadt vonere Hawaiianische Insle in dr Mitti vo dr Insle und ufeme Hügel befindet. Bi Dollar hämmer denn unser 4x4 Cheap könne abhole und sind wieder zruck zum Hafe gfahre. Dört hämmer nämlich unbedingt dr Strand Hulopo'e wölle aluege und mir hän ghört, dasses dört ab und zue Delfin het. Mir hän denn zwar keini gseh, aber derfür simmer bitz an Strand gläge und hän relaxt. Hän uns denn au grad no erkundet, wie das isch mit Campe, wills bim Strand grad e Campingplatz kha het. Leider hämmer ziemlich schnäll use gfunde, dasses genau an däm Weekend nit gstattet gsi sich z campe bzw. im Auto z schloofe... Ups! Also hämmer uns wieder zruck Richtig Stadt begeh wo mr e paar Unterkünft abklapperet hän - aber mir hän jo gwüsst, dass sie usbuecht sind und so isches au immer no gsi! Naja, versueche ka mes jo gäll! hi,hi.

Nachere Stärkig und eme grosse Lunch im Cafi Blue Ginger simmer bitz in dr Gegend ume kurvt (dos afoh rägne het und me in Lanai nit viel mehr het könne mache) ;o) D Stross zum Schiffswrack hämmer schlussändlich nit gmacht, wills mr eifach bitz unwohl gsi isch uf dere 4x4-Piste. Zum eine simmer nit 100% sicher gsi, öb me no e spezielle Gang für dr 4x4 het miesse ischalte (hän drum kei Gang oder spezielle Knopf derfür gfunde) und zum andere hets kurz vorhär heftig grägnet kha und mir hän gwüsst, dasses au wieder schnäll ka go rägne und denn wärs uf dr Sandpiste relativ schnäll mol ungmietlich worde... Dorum simmer denn zruck gfahre und hän uns in Lanai City mit Ässe ideckt. Mittlerwyle hämmer denn au ganz sälbstbewusst entschiede, dass mr das Abentüür igöhn und irgendwo usserhalb vo dr "Stadt" im Auto dien übernachte. Hän jo eh kei anderi Wahl kha!! Will am folgende Daag Memorial Daag gsi isch und alli Läde zue kha hän, hämmer näbst Wasser grad s Ässe für dr nexti Daag kauft - was us Toastbrot, Philadelphia Früschkääs, Kracker und Joghurt bestande het!

Nach unserer Shoppingtour hets zum Glück ufghört rägne und mir hän uns am Strand unde umzoge. Hän unseri beschte Kleider azoge und sind ins Four Seasons go e Apero neh mit kleine Häppli ("Pupu's" uf Hawaiianisch). Isch witzig gsi und mir hän innerlich miesse schmunzle. Sind ganz sälbstverständlich durch s Hotel gloffe, schnurstraggs zur Hotelbar und niemerz het gmerkt, dass mr quasi "Obdachlosi" sind wo nit in däm oberchicke Hotel übernachte! Die hämmer ganz schön ustrickst kha! he,he.

Genau bevors dunkel worde isch hämmer unser Übernachtigsdomizil gfunde kha und denn au bis am 4i am Morge dört gschloofe. Isch guet gange und es isch au nüt passiert oder so! Denn simmer an Strand abe gfahre (hän dänggt, dass sie um die Zyt wohl kei Kontrolle meh mache) und hän nomol zwei Stund gschlöfelet. Am 6i am Morge simmer denn mehr oder weniger wach gsi wills scho hell und warm gsi isch. E Typ wo d Abfallkübel am Beach leert het no gmeint kha, er muess blöd due und uns e Strofzettel geh will mr am Strand übernachtet hän - i ha ihm denn erklärt, dass mr no am glyche Daag wärde d Insle verloh und dass er quasi "nit so blöd söll due"... Er hets denn si gloh.. tssss!

Dr Hulopo'e Strand isch am 6i am Morge ganz idyllisch gsi und mir hän denn uf unserne tolle Luftmatraze no e bitz könne schlöfele.... Denn hets unser bereits scho ikaufts Zmorge geh und au die witere Stund hämmer am Strand mit Bädele und Sünnele verbrocht. Isch super gsi! Delfin hämmer denn au no gseh kha, aber nur vo witem und nur ganz kurz...

Am 2 hämmer s Auti abgeh und sind mit dr Hawaiian Airlines zruck nach Oahu gflooge.

Zämmegfasst: es isch e interessants, authentischs und ziemlich abentürlichs Weekend gsi!! hi,hi.

Am 8. Juni fliege mr nach Kauai für 5 Dääg und hän somit denn fascht alli Insle vo Hawaii bsuecht! :o)

Liebi Griessli!!!

Nici