Profile
Blog
Photos
Videos
Aloha !!!!
Mittlerwyle hani scho zwei Schueldääg hinter mir und es goht mr immer no guet! hi,hi. Aber föhn mr vo vorne a... Schrieb bitz usfiehrlicher, will ich weiss, dass die einte oder andere ALLES ganz genau wän wüsse vo mine erschte Idrück und Erfahrige etc.... :o)
Nacheme feine und letschte gmeinsame Znacht an unserem Geburtstag hän sich am Sunntig dr Arno und dr Michi nach nur rund öbbe 5 Stund Schloof ufe Wäg an Flughafe gmacht. Nachdäm i uscheckt ha bini loos zoge, um mir Waikiki an hand vonere Karte azluege - bi nämlich die letschte Mol immer nur em Michi und em Arno hinte dri gloffe und ha so natürlich nit sehr viel zu mim Orientierigssinn, wo eigentlich sowieso nit bestoht, bitrage.
Uf jede Fall het das erstunlich guet klappt (hi,hi) und i ha somit scho genau gwüsst wo mini Schuel isch, wo sich d Busshaltestell befindet und wo die wichtigschte Eckpünkt wie Shopping-Strosse und Stränd sind. So hani mi denn beruhigt mol ufe Wäg in Richtig mim neue Däheim gmacht. Und do kumi bereits scho zu minere erschte sehr prägende Erfahrig in Honolulu: D BUS FAHRE MEEEGA SÄLTE UND HET ME GRAD EIN VERPASST - WAS ME UNTER UMSTÄND GAR NIT WIRKLICH WEISS - MUESS ME HALT EIFACH UFE NEXTE WARTE... Wo amene Sunntig by the way nur 1x in dr Stund fahrt! Will ich anschienend grad dr Bus verpasst kha ha, bini denn ändlich nachere Stund im Bus Nummer 23 Richtig Hawaii Kai ghöcklet. Und do kömme mr grad zu dr zweite sehr wichtige Feststellig; wie z erwarte in Amerika isches a...kalt in de Bus - au z Honolulu. Vo dört a hani IMMER e Pulli, e Schal und ab hüt sogar e Päärli Socke derbi! hi,hi.
Nachere halbe Ewigkeit und eme Fuessmarsch vo 20 Minute hani denn mis neue Däheim an dr Opihikao Way 219 erreicht. E mega schöni, wohlhabendi aber au familiäri Gegend mit eigener Security!
D Pat, mini Gastmuetter (ursprünglich vo Singapore) und ihri Mitbewohnerin Lisa hän mi empfange und mir zerscht mol mis Zimmerli zeigt und alles erklärt wo was isch etc. Dass no zwei mega härzigi Hünd do wohne macht s ganze no sympatischer und persönlicher! :) D Pat wie au d Lisa sind Lehrerinne und beidi sehr geduldig und total lieb. I ha bereits beidi scho in mis Härz gschlosse und s Ässe vo dr Pat wirdi sicher vermisse... das isch nämlich super mega fein und s beschte - sehr gsund wills asiatischs Ässe isch (unfritiert natürlich!)
"Morgenstund hat Gold im Mund"...! Dr nexti Daag het scho am halb 6i am Morge startet, will ich gnueg Zyt ha wölle ha für mi Parat mache und zur Busstation laufe. Dr Bus isch sogar pünktlich uf die halb 7i ko (erneut e Lektion: in Honolulu sött me öbbe 10 Minute friehner an dr Station si, wills au ka vorko, dass er z frieh isch und denn het me Päch kha...!) Wills um die Zyt nonig sooo viel Verkehr het schaffts dr Bus in rund 40 Minute bis nach Waikiki ine. Wenn me spöter würd go denn stoht me garantiert im Stau und das ka in Honolulu ächt miehsam wärde, will eifach jede mit sim eigene Auto in d Stadt muess fahre unds dorum voll viel Verkehr het zur Arbetszyt. Es git sogar e spezielli Fahrbahn wo nur für die Fahrzüg bestimmt isch, wo mehr als 1 Person im Auto sitzt. Aber nütze dued die Art vo "Erziehig" anschienend nit wirklich viel... ok, irgendwie kanis scho no verstoh - solang das Busnetzt nit besser und regelmässig wird, isch d Verlockig zum Auto scho sehr gross, gib i zue!!
Morn schrieb ich witer, i muess jetzt go schlöfele will ich morn wieder frieh use muess (mittlerwyle standi erscht am viertel vor 6i uf)... ;o) Yeah, 15 Minute mehr Schlof!!
Liebi Griessli
Nicole
- comments