Hallo mini Liebe...

Sorry dass mi zweiti Blogg so lang duurt het... Aber i ha jede Daag e ziemlich volls Programm und Zobe bini amigs todmied.

Mittlerwyle hani e amerikanischi Nummere - bitte also abspeichere, do ich unter dr schwyzer Nummere nüm z erreiche bi: 01 808 258 66 33.

Das mitem Busfahre funktioniert au scho um einiges besser und i ha scho einigi verschiedeni Verbindige dörfe/miesse usprobiere. Fakt isch, dassi nach de 11i Zobe fascht nüm Heime kum, was ächt doof isch. Aber zum Glück isch mini Klassekameradin, d Lara, so lieb und nimmt mi amigs bi sich im Zimmer uf. Sie wohnt in dr Residänz zmittst in dr Stadt und wenni nüm Heime kum, denn schlofi bi ihre uf dr Luftmatratze (isch eigentlich e Matratze für ins Wasser, goht aber au zum druf Schloofe... hi,hi).

Aber unter dr Wuche gangi sowieso immer Heime (Dinner at half past 6) :o) Denn sind sowieso Husi und alli andere Ufgobe woni muess mache für d Schuel agseit, also gross in Usgang unter dr Wuche liegt sowieso nit drin. Aber das isch völlig ok, solangs für 1-2 Stund Beach pro Daag längt bini zfriede!

A pro pros Stränd: in Honolulu hets jede Menge! I kenn nonig viel, aber d Uswahl isch riesig und me muess sich nit an Waikiki Beach quätsche (dä isch nämlich mittlerwyle au scho unter dr Wuche rächt voll - unvorstellbar dasses im Juli no mehr Lüüt ha wird...). Mi Favorit im Momänt isch dr Army Beach. Dört hets au viel Iheimischi und es het näbst Strand au e Wieseflächi.

Und falls ihr euch jetzt frooget, öb ich scho bi go Surfe... NEI HAS NONIG GWOGT! Bi irgendwie eifach nonig derzue ko bzw. im Momänt gniessi eifach s Sünnele und s Quatsche mit mine neue Fründinne am Strand... Aber gluschte dueds mi scho... Wirds sicher in de nexte Wuche mol probiere und euch denn brichte wie ich mi agstellt ha ;o) hi,hi. D Lara het e gopro-Kamera, hui das git denn sicher luschtigi Föteli...

Mini Klass bestoht übrigens nur us 4 Schüeler, 2 Type und 2 Girls (d Lara und ich). Unsere Lehrer heisst Robert und isch e sehr agnähme und nätte Lehrer. Leider isch d Stimmig während em Unterricht nit so toll bzw. die zwei Type mache nit viel... Hocke meischtens ziemlich glangwylt oder miteme Hangover dört und hoffe, dass d Zyt verfliegt... Eine heisst Alexandro - ehrlichgseit e ziemliche Idiot! Er meint er sig dr Hängscht, derbi findet ihn jede doof... Und dr Patrick (übrigens us Arlesheim), isch eigentlich e sehr nätte und intelligänte, aber er isch bitz fuul... Mol luege wie das no witer goht. Sie sind nämlich beidi scho ziemlich uf dr Kippi will sie zum eine d Husi nit erledige und zum andere teilwys scho z viel gfehtl hän... und das in dr erschte Wuche! Vellicht sind also d Lara und ich bald elleige in dr Klass! Mir händs uf jede Fall toll zämme und mir mache au guet mit in dr Klass - i mein, nur so kas jo au Spass mache und me lernt au viel mehr eso. Bi also voll dr Sträber wie ihr sehnt ;o)

D Schuel sälber isch nit gross, aber d Rüüm sind rächt verwinklet, was alles bitz grösser erschiene losst. D Laag isch halt dr Hammer - diräkt bim Army Beach und nur 5 Minute vom Waikiki Beach entfärnt. Alli Lehrer und au alli Studänte sind sehr ufgstellt und nätt. Hautsächlich simmer Schwyzer und Japaner (e paar Koreaner, Belgier, Dütschi und kei ahnig no was...) Mir mien immer alli englisch räde zämme sunscht gits gäli Karte und wenns mehrmols passiert denn wirdsch us dr Schuel gschosse... sie sind ziemlich sträng, aber nur so ka das au funktioniere - bi sooooo viel Schwyzer! hi,hi.

Was toll isch sind d Aktivitäte wo d Schuel organisiert. Teils sind sie gratis (wie s Yoga immer am Mittwuch - isch toll gsi) oder koschte nur sehr wenig (wie s Barbecue am vergangene Fritig für 5 Dollar). Isch ächt witzig. Dört hani denn au grad d Eloise us Belgie, d Manon us Lausanne und d Julia us Bayern kenneglernt. Jetzt simmer, zämme mit dr Marion us dr andere Schuel in Honolulu, meischtens e Grüppli vo 7-8 Girls. Händs bereits scho mega toll zämme und i bi dorum überhaupt nie elleige. Usser wennis will, wie hüt zum Bispiel :o)

Hoff euch gohts allne guet und dass dr Winter nit allzu krass zruck ko isch...

I schigg euch e paar Sunnestrahle vom warme Waikiki!

Grosse Schmutz und e gueti Wuche...

Nici