Profile
Blog
Photos
Videos
Live your dream - d Nici uf Hawaii
Aloha, we're back from Big Island!! Es isch e genial Weekend gsi- was mir alles gseh und erläbt hän in so kurzer Zyt isch unglaublich! S Wätter wie au dr Verkehr und alles andere het voll mitgspielt und alles isch perfekt ufgange. Dangg minere guete Co-Pilotin, dr Silvia, hämmer au immer alli Sehenswürdigkeite etc. guet und relativ schnäll gfunde und mir händs ächt toll kha zämme. Also vo Vorne: Am Donnschtig (nacheme ganze Schueldaag mit Privatunterricht!) simmer diräggt nach dr Schuel mit Sack und Pack an Flughafe gfahre. Nachere gfühlte halbe Ewigkeit (dr Bus het öbbe e Stund kha), simmer denn ändlich z Honolulu Airport ako. Do mir nur mi Rucksagg ufgeh hän, isch das au scho sehr schnäll erledigt gsi und mir hän uns in aller Rueh dr Zollkontrolle und em Drogetescht vo dr Silvia könne widme... ;o) Sie isch ganz gschockt gsi, dass sie het miesse ihri Händli ane hebe und die vo dr Security halt e Drogetest gmacht hän. Aber das isch in Amerika jo ganz "normal" und so simmer denn wenig spöter voller riiieeesiger Vorfreud ins Flugi igstiege. Nach nur 40 Minute Flug und eme kleine Fruchtdringg spöter simmer in Hilo uf Big Island ako. Am Avis Schalter hämmer uns für e Upgrade entschiede (was sich spöter als sehr gueti Entscheidig usegstellt het) und sind denn mit unserem Luxus-Wage (eme schwarze Nissan - extrem chick) zu unserem buechte 4-Stärn-Hotel gfahre. Es isch e günschtigs Agebot gsi und wo mr denn dört ako sind und unser Zimmer bezoge hän, hämmer denn au gwüsst worum... ;o) hi,hi. I bi mr vorko wie in Asie imene super guete Hotel, wo sich zwar alli irgendwie Mieh gän, aber dr Standart nie und nimmer ane bekömme. Isch irgendwie härzig gsi und uns isches jo egal gsi, hauptsach mir hän e Dach überem Kopf kha... Unser Zimmer isch suber gsi und mir hän beidi e riese Freud an unserem eigene Queensize-Bett mit gaaanz tollem Kopfküssi kha! Die nexte drei Nächt hämmer herrlich pfüüselet... seufz. Nacheme Znacht im Café Pesto (mit Pizza) simmer denn zum Hotel zruck. Im Café Pesto hani e Bild entdeckt wo me ka kaufe... bi mr schwer am überlege, öb ichs soll wooge... Es goht mr nüm usem Kopf. Aber zerscht muessi use finde, wie viel s Bild überhaupt koschtet - halt euch ufem Laufende! ;o) Am Fritig Morge simmer grad als erschts zum Black Sand Beach gfahre (Punalu'u) wo mr denn schnäll mit Turtles sind go schnorchle!... hi,hi. Nei ohni Seich, wenn me am Morge (so um die 9i) dört isch, denn isches glaub scho fascht garantiert dass me Green Turtles gseht. Die ruhe sich jewiels am Morge am Strand us bevor sie denn gege dr Nomidaag wieder ins Meer zruck gön go frässe. D Silvia und ich sind natürlich ganz usem Hüüsli gsi! Nach däm grandiose Erläbnis simmer witer nach South Point gfahre (agäblich dr südlichschti Punkt vo Amerika) - nur seht me und merkt me irgendwie nüt vo däm... Also Corinne, das kasch getroscht usloh! Denn simmer uf d Mission "Green Sand Beach"! huuu, e griene Strand, wie cool isch das denn! Das hämmer natürlich nit wölle misse und hän die 1-stündigi Wanderig zu däm Strand mit voller Vorfreud uf uns gnoh. Und denn... simmer bitz enttüscht gsi wo mr denn ako sind! Er isch so klei und irgendwie hämmer uns dä anderscht vorgstellt. Aber grien isch er wirklich, was ächt faszinierend gsi isch! Will mr no e grosses Programm vor uns kha hän, hämmer beschlosse, uns e Taxi "der besonderen Art" z leischte. Unser Chauffeur het JUNIOR gheisse und mit sim Flitzerli simmer in kürzeschter Zyt zruck bim Parkplatz gsi. Isch witzig gsi! D Fahrt nach South Kona isch sehr gschön und erscht rächt wenns so wenig Verkehr het wie mir hän dörfe erläbe! Kurz vorem Ziel hets no e Shave Ice geh (gäll Silvia) und denn simmer au scho bim Place of Refuge ako (Pu'uhonua O). Das isch eine vo zwei traditionell hawaiianische Tämpelalage, wo no guet erhalte sind. E geniale Ort und tolls Fotisujet - muess me unbedingt gmacht ha wenn me uf Big Island isch! Pünktlich uf d Dunkelheit am 7i simmer zruck im Vulcano NP gsi, wo mr e urze Blick uf dr aktivi Vulkan oder besser gseit ufs färne Räuchne und Glimmere gworfe hän. Zum Abschluss vom Daag simmer ins Lava Rock und hän e Burger verdruggt. Zruck im Hotel simmer relativ schnäll ins Land der Träume gheit...
Fortsetzung folgt...
- comments