So... witer gohts :o)

Hän ächt Glück kha mitem Wätter - die ganz Nacht duure hets nämlich ziemlich heftig grägnet kha (was in unserem Hüttli jo scho sehr gmietlich gsi isch) und am Morge hets no immer gschifft... Aber pünktlich wo mr abgfahre sind isch s schöne Wätter ko! Jupie!!

Nach Hana sinds nur no 8 Meile gsi und mir sind beidi ziemlich überrascht gsi, wo mr in dere "Grossstadt" ako sind... Usser e paar Hüsli und ere Tankstell findet me nit viel mehr in Hana ;o) Isch witzig gsi: mir hän wölle dr Tanz fülle für d Hana Stross und sind zerscht zunere ganz kleine Tankstell ko. I ha denn dr Silvia gseit "ah nei, loss uns doch zunere grosse Tankstell fahre, an de kleine isch s Benzin meischtens tüürer" - sie het denn nur gseit "es git do kei grösseri Tankstell, das isch die einzigi wit und breit"! hi,hi. Also hämmer denn natürlich an dere Tankstell tankt und sind denn zur Kirche gfahre. Dört hämmer nämlich unser Auto abgstellt und hän unseri "Sand-Mission" wölle fortsetze und an Red Sand Beach go. Leider het uns Niemerz wölle dr Wäg beschriebe, will dä anschienend gföhrlich isch und dorum hämmer uns denn derzue entschiede, das lieber si z loh und uns uf d Stross "Way to Hana" konzentriere. Schliesslich hämmer am Obe am Ziel MIESSE si wäge unserem Flug... Isch zwar schad gsi, jetzt wo mr doch scho e kleini Kollektion an diveräse farbige Stränd bsuecht kha hän, aber lieber nüt riskiere! Spöter hämmer denn erfahre, dass dr Wäg eigentlich guet machbar isch, aber wenn me nit weiss wo dure, do dr Wäg sehr versteckt sig, denn kas je nach däm scho bitz gföhrlich gsi...

Uf jede Fall hämmer somit gnueg Zyt kha zum die kurvigi aber sehr schöni Stross "Way to Hana" z befahre. Unterwägs hämmer immer wieder mol aghalte, Fotis gmacht etc. Wie ihr uf de Föteli sehnt, isch Maui mega grien und die schönschte Blueme wachse dört. D Stross het uns super guet gfalle und nach dr Stross vom Vortag isch das grad e Spaziergang gsi, denn alli änge Partie (vor allem eispurigi Bruckene) sind imemr agschriebe si. Nit so wie uf dr Stross am Vortag... ;o)

Im kleine härzige Ort Pa'ia hämmer denn no e kleine Shopping-Halt gmacht bevor mr an Flughafe gfahre sind.

Au das Weekend isch super gsi und es het alles klappt und mir sind wieder glücklich und zfriede in unserem gliebte Waikiki ako