Aloha!

Sorry, dassi scho laenger nuem gschriebe ha. Aber i kum irgendwie nit so huefig derzue... Has ebe sooo straeng! hi,hi.

Letscht Sunntig bini jo mit dr Silvia, Steffi und Lara in dr beruehmte Hanauma Bay gsi. Die Bucht isch (logischerwys) us vulkanischem Ursprung, und het e schoens Koralleriff. Leider isches aber so, dass s Riff vorne ab scho ziemlich kaputt isch und s fascht keini Farbe me het. D Luet laufe staendig druf ume, will sie nit checke dass sie grad ufem Riff stoehn oder will sie halt eifach z bloed sind! ;o)

Will jetzt nonig Hochsaison isch, hets zum Glueck au nonig viel Touriste. Zwar scho gnueg ;o) aber me findet no guet ruhigi Flaecke.

Au wenn s Riff nit so schoen isch in dr Noechi vom Strand hets trotzdaem mega viel tolli Fisch in allne Farbe und Groessene. Isch super gsi! Dae Daag het aecht Spass gmacht und d Lara het Vollgas geh im bruun warde (schliesslich fliegt sie jo morn Heime, dorum muess sie jetzt no alles geh). hi,hi.

D Wuchene goen mittlerwyle meeega schnaell ume. I kum maengisch gar nuem nooche und weiss gar nit oeb jetzt scho Dunnschtig oder Fritig isch... hi,hi. Es lauft staendig oebbis! Aentwaeder unternaehme mr saelber oebbis oder me ka au jede Obe oebbis mit dr Schuel unterneh. Das isch aecht lessig. Je nach daem koschtets nur 5 Dollar oder wenns oebbis qualitativ bessers isch denn koschtets zwuesche 20 und 30 Dollar. Bis jetzt laebi raecht guenschtig do, willi fascht jede Obe Daeheime Znacht iss und s Zmittagaesse kaufi meischtens fuer 5-10 Dollar (Sushi oder e Sandwiche oder Fruecht). Isch halt cool, me het bi dere Waermi gar nit so Hunger :o)

Huet nach dr Schuel gangi ins China Town mit dr Silvia und dr Lara und aesse denn doert grad oebbis Zmittag. Bi gspannt, es soell schienz sehr authentisch si... Und morn!!!! Morn gangi go e Baseball Match luege mit dr Schuel. Freu mi meeega!

Was gits no z verzelle... dr Hatch isch geschter kastriert worde dae Armi... hoffentlich gohts ihm huet besser, geschter ischer ganz ruhig im Eckeli glaege... Er isch so haerzig, er begruesst mi sunscht immer wenni Heime kum und freut sich mega wenn ich ihn striechle due. Ihn wirdi sicher fescht vermisse... Aber das goht jo no e Zytli...

So, jetzt muessi in d Klass. Bi mittlerwyle mitem Patrick us Arlesheim elleige in dr Klass. Dr Alessandro het ins First gwaechslet (nachdaem er immer gseit het er heig s First, haen sie jetzt use gfunde dass ers doch nit het... und au wenn ers vellicht nit will igseh, isch er im First definitiv besser ufghobe als im Advanced)!!

Wuensch euch e tolls Weekend und umarm euch alli!

Nici