Profile
Blog
Photos
Videos
Hallo mini Liebe!
Es het sich viel do in dere Wuche! Muess euch also unbedingt update! ;o)
Also mini Wuche het nit wirklich guet gstartet - ha nämlich im all-wöchentliche Test verseit und e mega schlächte Score kha... mi Lehrer isch natürlich nit grad begeischteret gsi, aber i ha eifach mega Päch kha und es isch wohl nit so mi Daag gsi... Uf jede Fall glaubi eigentlich ziemlich dra, dassi bim nexte Test wieder zu minere "Form" zruck find und i hoff natürlich, dass ich sogar wird besser si.... Grundsätzlich merki jo, dassi immer wie sälbstsicherer wird in de Test, isch jo schliesslich viel Üebigssach.
Will ich dä Mäntig nach Pearl Harbour gang mit dr Schuel (jupie), muess ich dr next Test am Mittwuch Nomidaag mache. Drugget mir alli dr Duume! :o)
Am Mäntig isches wie immer nach dr Schuel an Army Beach gange.
Am Zischtig hämmer beschlosse, wieder go z surfe, will das die letschti Möglichkeit gsi isch vo dr Angelina (dr Russin), do sie hüt wieder Heime gflooge isch. Uf jede Fall sind d Wälle leider nit so das Wahre gsi und d Angelina isch am Schluss gar nit ufs Brätt - ich aber scho! ;o) Au wenn me mängisch lang ufe Wälle muess warte, isches mega gmietlich bitz z schwätze und d Sunne z gniesse (und e rooti Nase z beko!...) hi,hi.
Am Mittwuch bini mit dr Schuel ufe Katamaran gange zum go Schnorchle. Dr letscht Katamaran-Usflug hani jo nit so speziell gfunde (do isches eigentlich nur ums Suffe gange und weniger um d Natur), und dorum bini zerscht bitz skeptisch gsi wo's ums Amälde gange isch. Aber woni denn vo dr Manon (us Lausanne) und dr Eloise (us Belgie) ghört ha, dass sie s letscht mol mit 5 Schildkröt gschnorchlet sind, hani mi denn agmäldet! Zum Glück, mir hän nämllich 4 Turtles gseh und es isch suuuuper gsi!! Ha mr so e Wägwärf-Unterwasser-Kamera kauft kha für 15 Dollar und jetzt hani doch e paar schöni Bilder vo däm tolle Schnorchel-Usflug (Föteli folge spöter)...
Am Donnschtig Obe bini zu dr Überraschigs-Geburtstags-Party vo dr Manon iglade gsi. Die liebi Yuki (us Tokio) het alles organisiert und flissig Pasta und Lasagne kocht und d Manon het sich sehr über d Überraschig gfreut. Hän gmietlich gässe, am (oder au im) Whirlpool gschwätzt und s luschtig kha. Miteme gmeinsame Taxi isches denn Heime gange.
Am Fritig Obe, also geschter, simmer nach dr Schuel wieder an Waikiki go Surfe. Gescht sind Wälle zwar grösser gsi und me het dänggt "oh, e super Daag zum Surfe", aber d Wälle sind tatsächlich sehr schwach gsi und sobald me uf dr Wälle gsi isch, het sie an Kraft verlore und me het kum könne druf stoh bliebe... Aber dr Sylvain (us Paris) het mir und de andere mängsich e Schüppsli geh, denn hani doch wenigshtens e paar Mol könne Wälleritte :o)
Zum Abschied vom Nicolas (us Herisau, er isch leider nur 3 Wuche do gsi) simmer demm im Yard House go ässe. Mhhh dört gits mega feini Onion Rings (woni s nexte mol zur Happy Hour muess ane goh, denn sind alli Appetizer zum halbe Pryys! hi,hi) und super mega ober gigantisch tolli Pasta (Vodka Shrip Pasta)! Mhhhh so fein!! Und dr Vodka schmeckt me übrigens nit!
Denn simmer mitem Bus nach China Town (Downtown) gfahre, wo immer am erschte Fritig im Monet e grossi Party stattfindet. Wo mr denn dört ako sind, hämmer miesse feststelle, dass das eigentlich rächt klei isch, aber d Stimmig isch guet gsi, viel Lüüt (vor allem viiieeeel komischi Lüüt!!....) und mir sind denn au in zwei Clubs gange. Aber bi ziemlich k.o. gsi und dorum hämmer denn au nur bis am 1 gmacht.
Übrigens hani öbber Neus kenneglernt, d Eda us dr Schwyz (ebefalls in Herisau ufgwachse, wohnt jetzt aber in Züri und isch Türkin). Mir händs super zämme und sie isch ganz e ufgstellti und quirligi (Türkin halt) ;o) he,he. Leider isch sie nur no zwei Wuche do - aber besser wie nüt!
Hüt hani wiedermol usgschloofe (wenn nur mi Bett bequemer wär...) und gang nochär ufe Bus Richtig Waikiki. Triff mi mit dr Eda am Army Beach und i möcht hüt unbedingt mini Poschtkarte schriebe woni scho sitere Wuche mit mir ume schlepp...
Morn gohts an Lanicai Beach (wo mr vorere Wuche e Stop gmacht hän mitem Mietauto) - isch eine vo de schönschte Stränd vo Oahu (Corinne, notiere!!) hi,hi.
Sodeli, jetzt muessi mi mol parat mache!
Wünsch euch e schöne Sunntig und schigg euch e paar Sunnestrahle! Ha nämlich ghört in dr Schwyz isch s Wätter wieder schlächt...
Vermiss euch alli und schigg euch ganz viel Schmützli!!!
Nici
- comments
Corinne Lanicai Beach: notiert ;-)))