Aloha together! Am Sunntig simmer miteme Mietwage rund umd Insle gfahre - ÄNDLICH hämmer mol die berüehmti North Shore gseh! Im Winter hets dört riiieeese Wälle, aber jetzt - wos langsam em Summer zue goht- sind sie nüm so hoch... Besser für uns, sunscht hätte mr d Stränd gar nit könne gniesse! hi,hi. Unsere Trip het am Morge gstartet und het uns zerscht zum wunderschöne Lanikai Beach gfüehrt. S Wätter isch nonig sooo toll gsi (zumindescht hets nit grägnet, aber es het rächt gwindet und es isch bewölkt gsi). Egal - dr Strand isch au so schön gsi und nacheme kurze Spaziergang und e paar Föteli simmer denn witer nach Kailua. Das isch e ächt härzigs Örtli (übrigens wohnt mit Lehrer, dr Robert, dört). Nachdäm mr uns mit Getränk im Supermarkt ideckt hän simmer denn au scho witer gfahre n Richtig Norde. Unsere nexte Stop isch in Valley of the Temples gsi. Das het mr super guet gfalle und durch d Lag zmittst im griene tropische Tal, het alles rächt mystisch gwirkt... Witer isches denn an die "wirklichi" North Shore gange!.... unseri Määge hän scho knurrt vor Hunger. Dört hämmer bim berüehmte Shrip-Strand "Fumi's" Halt gmacht. Mhhh isch das fein gsi!!!.... Nochär isches denn witer gange zum Sunset Beach (ohni Sunset, will mr am Nomidaag dört gsi sind). I ha mi zwar nit wirklich ins Wasser traut, will d Strömig vo de Wälle rächt stark gsi isch - aber es dueds au wenn me eifach am Strand sitzt und vo de Wälle nass wird ;o) Nach dere "spezielle" Art vo Abkiehlig (und eme kleine Nickerli vo mir...) simmer denn zur Bäckerei "Ted's" gloffe, wo nur e paar Meter vom Beach entfärnt gsi isch. Dr Michi (mi Brueder, falls das öbber nit weiss wo dr Blogg liest) het dört dazumal Shrips gässe und mi Lehrer het vom Pie (Kueche) gschwärmt! Also hani zwei Stück Kueche kauft (e Stück für mi Lehrer). Hüt Zobe wirdi mol dervo probiere, bi gspannt... Ihr sehnt, wenn me an d North Shore goht, denn dört me gwüssi kulinarischi Pünkt nit misse - sunscht isch me nit dört si! Dorum MUESS me au unbedingt e Blick uf d Ananas-Plantage vo DOLE wärfe - wenn au nur e kurze ;o) Für alli, wo denn no möge, gäbts dört d Glägeheit zum Ananas-Glacé z probiere... Muess guet si! Aber bi mir het definitiv kei Platz me kha! hi,hi. S Ganze isch ziemlich touristisch gmacht inkl. eme kleine Zügli wo durch d Plantage fahrte (für schlappi 15 Dollar!...) - isch sicherlich interessant, aber uns hets glängt dass mr kurz dure Ananas-Garte gloffe sind. Händ ihr gwüsst dass e Ananas zwüsche 15-18 Mönet bruucht, bis sie ryf gnueg isch für d Ernte? Krass he! Jetzt weissi worum e Ananas so tüür isch! Zum Abschluss vo dääm Daag simmer ufe Hügel ufe gfahre (i muess d Silvia nomol frooge wie dä gheisse het, das isch nämlich ihri Idee gsi - sowieso isch sie unsere Guide gsi an däm Daag!). Me het e super schöni Ussicht über Honolulu kha und erscht so richtig realisiert, dass Honolulu e ächti Grossstadt isch mit viele Hochhüser! Wenn me in Waikiki isch denn merkt me das gar nit so, will Waikiki rächt klei und übersichtlich isch... D Auto-Rückgob mitem Daniel isch denn au no ganz spannend gsi (er het mi ine Einbahn-Stross ine glotzt und i has halt z spot gmerkt... Ooooh men... ). Aber i bi ruhig bliebe (oh Wunder! Ha mi ächt zum positive gwandlet do, wird nüm so schnäll nervös... Liegt wohl an dr hawaiianische Mentalität, hi hi) und nachdäm i sogar ohni Touriste z überfahre wieder heil und relativ schnäll us dere Einbahn ko bi, hämmer denn die richtigi Ifahrt verwütscht! Puh! Nacheme Bier und Glacé zum Znacht (wow, was für e spezielle Ernährigsplan ich doch an däm Daag kha ha!) simmer denn mitem Taxi Heime gfahre. Dr Taxifahrer (Alex) kennt mittlerwyle scho genau wo wär wohnt und macht uns au e rächt guete Pryys! Zum Glück - will anderscht kämte mr amigs Zobe gar nüm Heime und mir möge beidi die blöde Busverbindige nit - wo meischtens nit wirklich funktioniere... Isch zwar e asträngende Daag gsi, aber e mega spannende und i bi froh, dassi jetzt mol e Überblick vo Oahu gwunne ha! So nach 6 Wuche uf dere Insle isches scho fascht e Schämmer, wenn me nit mehr als Waikiki und die noochi Region gseh het! Aber so Problem isch halt ächt, dass me uf dere Insle soooo viel ka mache und dass halt trotzdäm alles viel Zyt brucht - dank däm Bussystem! ;o) Nei, s System isch jo nit schlächt und dure Daag dure funktionierts rächt guet und d Busfahrer sind alli wirklich mega nätt (und vor allem geduldig! Was die eins pro Daag mien de Touriste hälfe und Frooge beantworte...!) - aber dr Verkehr in und rund um Waikiki isch halt scho ziemlich krass und dorum bruucht halt alles sini Zyt! Zuedäm laufts do eso, dass me s Ticket oder s Abo bim Istiege em Busfahrer muess zeige. Das bedütet, wenn viel Lüüt mien istiege, alli nur durch d Front-Tüüre könne istiege und das brucht natürlich sehr viel mehr Zyt als wenn me eifach irgendwo könnt istiege. Und wenns denn no Passagier git, wo mien zahle oder sogar e Rollstuehlfahrer an Bord möcht, denn muess dr Buschauffeur zescht mol dr halb Buus umstelle, damit dr Rollstuehl fahrer guet und sicher ka transportiert wärde... Jaaaaaa - ufe Art also e gueti Lösig, will me so s Kontroll-Personal ka spaare, uf die anderi Art bruchts halt eifach sehr viel Zyt. Aber do het me jo in dr Regel gnueg Zyt und alli nähmes voll easy! Hawaii halt! I sag dorum nur no "Hang Loose"!! Hug Nici