ALOHAAAAA!! Do kunnt dr Bricht vo Maui :o) Wie scho letscht Mol, simmer diräggt nach dr Schuel an Flughafe gfahre und sind somit bereits scho am friehe Obe in Maui ako. S Auto hämmer bi Alama buecht kha und dr Wäg nach Lahania hämmer beschtens gfunde (isch nur öbbe 45 Minute entfärnt gsi). Unser Hotel, s Lahaina Inn, het sich diräggt im Härze vo Lahaina befunde und somit hämmer nacheme kurze früschmache diräggt ins "Nachtläbe" könne stürze... Sind go Burger ässe! ;o) hi,hi. Und denn scho gly ins Bettli, will mr am nexte Daag Grosses vor kha hän...! Nach öbbe 5 Stund Schloof het nämlich unsere Wecker uf die 3 gschällt- und e halb Stund spöter simmer bereits scho ufem Wäg zum Halekala National Park gsi! Ok - es isch scho bitz arg frieh gsi, aber mit heitere Musik und gueter Stimmig isches überhaupt kei Problem gsi. Schliesslich wämmer auf uf dr höchsti Bärg "beklumme" ha! ;o) Nach 1.5 Stund Fahrt simmer denn im Haleakala Nationalpark ako und hän e wunderbare Sunneufgang könne erläbe. Isch ächt schön gsi und s friehe Ufstoh het sich definitiv glohnt! Nachdäm mr zruck in Lahaina gsi sind het d Nicole e kleins Nickerli brucht... und denn simmer bitz go Lahaina aluege mitem Banyan Tree Square. Denn simmer wieder ins Auti gstiege und sind zum Kapalua Beach gfahre. Dä isch zwar nit umwärfend gsi, aber für uns hets glängt und mir hän e paar schöni Fisch gseh bim Schnorchle. Zobe hämmer unseri neue Kleidli azoge wo mr am Nomidaag inere härzige Boutique in Lahaina kauft kha hän, und sind ins Babba Gamp go ässe. Mhhh ich iss dört immer s glyche, nämlich "Shrimp New Orleans" mit Ryys. Isch sooo fein!!! Ich find das Restaurant eifach dr Hammer und in Lahaina isches mega schön überem Wasser gläge und perfekt für e romantischs Candle-light-dinner inkl. Sunneuntergang... gäll Silvia! :o) hi,hi. Am nexte Morge isch scho s nexte Highight vo unserer Reis agstande - nämlich d Schnorchel-Tour zur Insle Molokin (aha, no e Insle!!) Zerscht simmer zur "Turtle Town" gfahre und hän dört öbbe e Stund könne schnorchle. Gseh hämmer zwar nur 2 Schildkröt, aber es isch trotzdäm schön gsi. Denn simmer zur Insle Molokini wo mr ganz viel Fisch und sehr farbigs Riff hän dörfe bestuune. Isch ächt cool gsi! Unterwägs hets z Zmorge und Zmittag geh (Burger, sehr fein gsi, vor allem so nachem Schnorchle). Dä Trip isch ächt lessig gsi und am 1 hämmer uns au scho uf unseri Witerreis könne begeh. Will mr nit hän wölle zweimol dr glychi Wäg mache, simmer vo Ma'alea via Kuihelani Highway ufe Pi'ilani Highway nach Hana gfahre. Huuuiii, isch zwar wunderschön gsi d Fahrt, aber ziemlich kurvig, äng und teilwys au ziemlich unagnähmi Strosse (unaspaltiert)... Sind dorum froh gsi wo mr denn ähnlich wieder uf gueter Stross gsi sind. Nacheme erfrüschende Bad in de "seven pools" simmer denn in unserem B & B bi dr Arabella ako. Mir hän ihres B & B im Internet gfunde und es isch ächt e Glücksträff gsi. Zwar nit ganz günschtig (125 pro Person inkl. Zmorge), aber jede Rappe het sich glohnt. Denn d Unterkunft isch genau uf unserem Wäg gläge und mir hän uns vo dr Arabella no so gärn mit ihre Spezialitäte und Gastfründlichkeit loh verwöhne - sind nämlich vo unserer Fahrt ziemlich k.o. gsi! Nacheme herrliche Znacht mit tollem Salat, no töllerer Salatsauce, italiänische Würscht und eme Weichkäs mit Cracker hämmer uns e paar Serie vo "modern Family" ufem gmietliche Sofa inezoge. Isch heeerrrlich gsi!! :o)