Hallo Zämme! Jetzt isches scho e Wuche här wo d Silvia und ich uf Molokai und Lanai gsi sind. D Zyt goht wahnsinnig schnäll ume! I bi im Ändspurt mit dr Schuel, was e super Gfühl isch - weniger wägem Test wo bald vor dr Tüür stoht (next Fritig und Samschtig), umso mehr dass s Lerne e Änd het. hi,hi. Ihr sind bestimmt gspannt was ich vo dene zwei kleine Hawaiianische Insle halt. Mi Lehrer het au grad als erschts gfrogt kha "Aaaannndddd????"! Also beidi Insle sind sehr ländlich und uf Molokai hets mehr Kieh wie Iwohner (schienz - wobi ich nit sooo viel Kieh gseh ha, aber mir sind jo au nit gross ume ko). Also i glaub i fang mol vo Vorne a!... An däm Weekend wo mr uf Molokai gsi sind isch jo einiges los gsi, dorum sind au alli Mietwage usbuecht gsi. Zum eine sind ganz viel Graduations gsi (Schuelabschlüss), zum andere viel Reunions (Klassezämmekünft) und denn no e grosses Kanu-Renne am Sunntig. Dorum hämmer halt eifach zwei Bikes gmietet und sind so wenigschtens e bitz in dr nöchere Umgäbig ume ko. Wenn me uf Molokai isch, denn erläbt me no s "richtige Hawaii!" Es het überhaupt nit viel Touriste und d Iwohner sind extrem hilfsbereit und nätt. S witzige isch, dasses do hawaiianischi Cowboys het! hi,hi. Im Flugzüg hämmer dr George kenneglernt, e Bewohner vo Molokai, und er het uns im Flugzüg grad einiges über d Insle könne verzelle und er het uns empfohle, unbedingt Schnorchle z go. Sig ein vo de schönste Spots!... Und so isches au tatsächlich gsi! Mir hän super Glück kha mitem Wätter und s Koralleriff isch sogar no schöner gsi als Molokini! Mir hets wahnsinnig guet gfalle und i würds Jedem empfähle!! Zum Krönig hämmer sogar no e Eagle Ray gseh mit wysse Punkt! Yeeeeaaahhh!!! :o) Übrigens simmer mit "Mokulele Airline" uf Molokai gfloge was e mega Erläbnis gsi isch!! Wie me uf de Föteli gseht, het me e grandiosi Ussicht über Oahu und i ha sogar gseh, wo ich wohn! hi,hi. D Flugzüg sind meeega klei (und i mein wirklich klei!! Nur öbbe 11 Sitzplätz) und dr Pilot macht glchzytig au grad d Instruktion und alles. Super! Dr Transfer vom Flughafe zum Hotel hämmer übrigens dank em liebe George gratis kha. Sini Frau het ihn abgholt kha und sie hän uns spontan zum Hotel gfahre kha. Mega lieb gsi - "thats Molokai"!! Unseri zwei Dääg uf Molokai hämmer ohni Auto dennoch super usnutzt und im Grosse und Ganze hämmer doch einiges gseh kha.

Jewiels am Fritig findet e Art "Prob" im Hotel Molokai statt. Alli wo e Instrumänt spiele, träffe sich und spiele zämme. Das isch natürlich für Touriste e super Glägeheit zum die hawaiianischi Musik und Kultur kennezlerne - bsunders uf Molokai! Leider hets an däm Obe mega fescht grägnet kha und wills no Reunions dört kha het, simmer rächt wit e wäg vo allem ghockt, dorum hämmer d Musik fascht nit ghört kha. Aber derfür hämmer zwei nätti iheimischi Fraue kenneglernt und hän bitz mit dene pläuderlet. Mit Hilf vomene kurze Autotransfer (bärguf) vo ca. 2 Meile vomene nätte Iwohner hämmers denn sogar au no zum Postoffice gschafft, wo me e Kokosnuss als Postkarte ka verschicke. Das het d Silvia unbedingt wölle mache und i bi mega happy gsi, dass mr das no anebeko hän. Sie isch ganz glücklich gsi wo sie ihri Kokosnuss het könne amole :o) Mit dr Fähri isches denn nach Lahaina/Maui übere gange und in Lahaina hämmer wieder im glyche Hotel übernachtet (Lahaina Inn). Ich lieb eifach Lahaina! Es isch so charmant und es het so viel tolli Lädeli und Galerie! Zum Znacht hets rächt feini Pesto-Pasta geh und denn simmer au scho rächt frieh go schloofe. Am nexte Morge hämmer d Fähri am 9i nach Lanai übere gnoh. Beidi Überfahrte sind übrigens sehr agnähm und kurzwilig gsi (bsunders wenn me schloft gäll Silvia!) he,he. Witer gohts imene separate Blogg... :o)