Hoi Zämme!

Letscht Fritig isch scho ziemlich truurig gsi... Ha mini lieb gwunnene Fründe, dr Danniel us Brasilie und d Eda us dr Schwyz miesse verabschiede. Aber so isch das halt, neui Lüüt kömme und anderi göhn... bi mir isches in 3 Wuche sowiet, oje, mir grauts jo scho... ka wohl mini Träne nit zruck halte denn... Wobi's denn gar nüm so viel Lüüt git wo mi könnte verabschiede - usser, i lern nomol neui Lüüt kenne, aber so intensiv wie mit de andere wirds wohl nit wärde... Doderfür bini jetzt viel z fescht mit Lerne oder mit Umereise mit dr Silvia beschäftigt (gäll?!) hi,hi.

Aber s Abschieds-BBQ isch mega gmietlich und lessig gsi und e paar Lehrer sind sogar au derbi gsi (wenns gratis Zässe git...) ;o) nei isch gemein, aber bitz dr Wohrheit entsprichts glaub scho... hi,hi. Egal, es sind jo tolli jungi Lehrer!

Uf jede Fall hämmer bis kurz vor de 10i bim Army Beach könne fyre und sind denn no bitz an Strand ghöcklet mit de Räschte vo Chips und Bier. Alkohol Trinke am Strand isch zwar nit erlaubt, aber mir hän uns zwüsche Böötli versteckt, das het wunderbar klappt!

Am Samschtig hani bitz usgschloofe und glernt und bi denn am Nomidaag go Souvenir-Shoppe. Ha jo zwar no Zyt, aber will ich bald e Päckli will Heime schicke, hani möglichst scho alles wölle erledigt ha. Zwar hani das Ziel nit erreicht, aber wenni tatsächlich alles Heime schick woni do nit bruuch, isch fascht nüt me in mim tatsächliche Reisegepäck... hi,hi. Vo däm här kani e Teil Souvenirs immer no spöter kaufe (uf Molokai, Lanai oder Kauai...) ;O)

Am Sunntig simmer ändlich im Restaurant Bill's go Zmorge ässe! Mhhh isch das fein gsi! Ricotta Pancakes mit Banane, Honigbutter und Maplesirup. Mjami! Aschliessend simmer miteme Mietwage and North Shore gfahre (yap richtig, bereits scho zum zweite Mol)! Aaaaber halt - mir sind diesmol an e ganz neue Ort gfahre, nämlich zur beliebte Schnorchel-Bucht "Sharkes Cove". Kei Angscht Mami, dört hets keini Haie! Wieso die Bucht so benennt worde isch weissi nit - aber usser ganz viel neuei wunderbar schöni Fisch und hungrige Turtles hani nüt entdeckt wo nur annöhernd usgseh het wie e Hai! Muess sage, isch e grossartige Spot zum Schnorchle und alli wo mol uf Oahu unterwägs si wärde, mien unbedingt dört ane go Schnorchle! Do's ebe nur im Summer möglich isch zum go Schnorchle wäge de Wälle, hämmer so lang uf das Erläbnis miesse warte. Und s Warte het sich definitiv glohnt, denn geschter hämmer perfekti Bedingige kha!

Nachdäm dr Shogo plötzlich immer wie ruhiger worde isch (do er mega Hunger kha het), simmer denn 15 Minute ins Auti gsässe und sind zu de beriehte "Shrimp Trucks" gfahre wo alli schön näbenander an dr Stross uf hungrigi Mühler warte. Mhhh isch dr Hammer gsi und nachere witere Stärkig mit Pies bi "Ted's" simmer nomol zruck ufe "Verdauigs-Schnorchelgang" in dr Sharkes Cove.

Aschliessend hämmer e schöns Nacht-Panorama über Honolulu vom "Puu Ualakaa State Park" us gnosse bevor mr denn ganz fürstlich vom Kuma Heime gfahre worde sind (merci Kuma!) :o)

Mis Weekend isch also super genial gsi und mir händs wie immer witzig kha zämme!

Hoff, ihr händ au e tolls Weekend gnosse und dasses euch allne guet goht!

Grosse Schmutz und grossi Umarmig an euch alli!!

Euri Nici