Also Pearl Harbor hani ächt interessant gfunde zum go aluege und vellicht gangi e zweitsmol zum s Schiff Missouri oder s U-Boot azluege... Mol luege, d Zyt wird immer wie knapper... ;o) Uf jede Fall dörf Pearl Harbor bimene Bsuech in Honolulu uf kei Fall fehle! Dr 20-minütigi Film über dr Agriff und s gsunkene Kriegsschiff Arizona ka me gratis go aluege - für alles andere wie d Missouri, s Flugzüg-Museum (Aviation Museum) oder s U-Boot muess me zahle. Aber scho nur dr Teil wo gratis isch lohnt sich uf alli Fäll.

Zur gsunkene Arizona kunnt me per Boot und i bi völlig baff gsi woni dr Ölgstank gschmeckt ha! Woni ins Wasser gluegt ha, isches mir aber au schnäll klar gsi worum - no immer fliesst Öl us dr Arizona und me hört Gschichte wie "Öl wird solang uslaufe bis dr letscht amerikanisch Überläbendi vo Pearl Harbor gstorbe isch".... Tatsächlich fliesse no hüt 2-9 quarts (ka me sich in 8-36 Tasse vorstelle) Öl us und das JEDE DAG!! Anschienend (bzw. das isch uns verzellt worde...) isch s Öl aber ungfährlich, will s e Art Öl isch, wo wenns and d Oberflächi glangt, verpufft und unwirksam isch... Wenn me abe zum Wrach vo dr Arizona luegt, ka me au ganz dütlich die schönschte Fisch usmache... Also e Funke Wohrheit wirds wohl ha dass das Öl nit schädlich isch für d Umwält...

D USS Arizona het 5.7 Millione Liter Öl an Bord kha und d Japaner hän e spezielli Rakete entwicklet, wo d Arizona effektiv het könne zerstöre. Vo de 1'511 Bsatzigsmitglieder vo dr USS Arizona hän 1'077 "bodies" nit könne gfunde oder identifiziert wärde (1941 het me halt DNA nonig kennt). Me seit, dass e beträchtliche Teil no immer im Wrack sind und es isch anschienend z tüür, zum die alli usezhole... Krass he!! :o/

E kleini Gschichts-Froog: Wenn isch dr Aschlag gsi??? ............ am 7. Dezämber 1941. Das isch e Sunntig gsi und vieli Amerikaner sind am Schloofe gsi (schliesslich isch am Samschtig Obe immer kräftig gfyyrt worde, denn s Läbe uf Honolulu het ziemlich unbedängglich und "fremd" vo allem wo in dr Wält so abgange isch, gwirkt). Uf einige Föteli het me klar gseh, dass d Amerikaner in ihrem Pygama kämpft und sich probiert hän z wehre... Aber das isch unmöglich gsi, denn nomol e interessanti Sach an dere ganze Sach isch gsi, dass d Amerikaner so Schiss kha hän vor Sabotage und dorum alli Flugzüg usserhalb OHNI MUNITION abgstellt hän.

Wo d Amerikaner an däm Morge d Flugzüg ufem Radar wohrgnoh hän, isch nit reagiert worde, will me gmeint het, es siege ihri eigene Flugzüg wo vom Festland zruck kömme... nur isch das nit wohr gsi und das isch wohl die fatalsti Entscheidig gsi! Hätt me d Gfohr erkannt, hätte sie wenigschtens no öbbe e Stund Zyt kha zum z reagiere, aber i glaub nit dass me innerhalb vo dere Zyt so viel hätt könne bewirke... Gmäss dr Meinig vo unserem Guide wäre d Uswirkige vom Aschlag wohrschinlich glych gsi, aber wenigschtens hätt me sich besser könne wehre und so einigi Japaner könne abeschiesse oder was au immer... Es sind nämlich nur 35 Japaner bim Agriff uf Pearl Harbor gstorbe!

So, das wärs vo dr Gschichts-Stund! Ha dänggt, vellicht interessierts euch au e bitz... Sunscht könnet ihrs jo eifach überspringe! Jetzt schriebi nämlich dr Bricht über Maui, dä dörfti für ALLI interessant si! hi,hi.

Aloha

Nici