Aloha !

Hui, das Weekend hani ganz schön viel erläbt und gseh. D Silvia und ich sind immer mega happy wenn mr öbbis vo unserer "Lischte" vo de Sehenswürdigkeite uf Oahu könne abhöckle ;o)

Mir nähmes natürlich nit so sträng, aber schliesslich isch jetzt scho e Monet ume ume mir hän no 9 weekends zur Verfiegig. Es goht ebe scho mega schnäll ume, au wenn mes zerscht gar nit glaubt.

Aaaalso i fang mol mitem Fritig a! Nach dr Schuel sind d Silvia, Steffi und ich mitem Bus ins China Town gfahre bzw. zerscht simmer irgendwo im Industrie-Gebiet glandet bevor mr denn miteme andere Bus im China Town ako sind! hi,hi. Tja, me lernt nie us... ;o)

Dört hämmer e feins Zmittag kha (Vietnamesischi Suppe, hmmmm ich liebs!). Naja, d Silvia het ihri Suppe mit Rindfleisch, Shrimps, Nudle und Fleischbölle nit soooo dr Hit gfunde (isch au ächt e bitz zu viel des Guten) :o)

Denn hämmer s China Town erkundet, was wirklich sehr authentisch isch! Wenn me in lokali Märt ine kunnt, denn "durftets" wie irgendwo in Thailand und me möcht am liebschte so schnäll wie möglich wieder us däm Düftli use... Überall hänge chinesischi Lampene, Duftstäbli rauche eim entgege und trocknete Fisch oder Tintefisch ka me an jedem Ecke kaufe...

Aber am 2 am Nomidaag isch scho ziemlich tote Hose gsi - s Mittagsgschäft vorbi - und dorum simmer denn eifach mol witer gloffe Richtig Meer. Und siehe da, mir hän dr Aloha Tower ganz unverhofft entdeckt!

Dört hämmer denn au gratis ufe könne und dr fründlichi Security Typ isch glaub froh gsi, dass er öbbis z due ka het. Nachdäm mir sis halbe Lääbe erfahre hän und er no mini Nummere het wölle, simmer denn abdampft (nei, natürlich ha ich sie ihm nit geh)!

S Business District vo Honolulu isch no ganz idrücklich mit viele modärne und schöne Gebäude.

Zruck in Waikiki hämmer uns denn bitz an Army Beach glegt und hän relaxed. Uf die 7i hämmer uns denn mit de andere (Lara und Co) troffe. D Lara het ihre letschte Obe im Hard Rock wölle fyre und dorum hämmer dört denn grad Znacht gässe. Isch e mega schöne Hard Rock, voll stylisch und sehr guets Ässe! Ha e Fiesta Burger kha mit Guacamole und so... mhhh...

Am Samschtig Morge sind d Silvia und ich ufe Coco Head ufe gloffe. Manno isch das asträngend gsi! Stäge ka me das Ding wo dört ufe fiehrt gar nit beschriebe... es sind eher zuefällig glegti Tritt.... meischtens so öbbe 20cm bis e halbe Meter hoch. Das goht natürlich ganz schön ind Bei! D Silvia hets in geniale 23 Minute ufe gschafft und ich in 36 Minute :o)

D Ussicht isch gigantisch und jedi Schweissperle wärt! Aber mir hän grad e extrem heisse Daag für die Unternähmig usgsuecht kha... Dorum simmer nochär au heime go dusche.

E paar Stund spöter isch jo denn dr Baseball Match ufem Spiel gstande wo d Schuel organisiert het. Isch ehrlichgseit nit so spannend gsi! E Homerun hani nie gseh, me isch sogar scho froh gsi wenn sie wenigschtens e bitz öbbis gsegglet sind... Aber es isch trotzdäm witzig gsi zum beobachte und au do stoht glaub s Ässe und s Erläbnis im Vordergrund!

Hüt hani ändlich mol könne usschloofe und fuul si! Het mega guet do! Bi no e paar Stündli an Strand gläge (Kawaikui Beach Park) wo sich ganz in dr Nöchi befindet und ha gläse.

Das wärs gsi! :o)

Hoff euch gohts allne guet!

Grosse Schmutz und Aloha!

Nici