Am Sunntig Morge simmer ins beruehmte Restaurant "Ken's Pancakes" go Zmorge aesse. Uf das haemmer uns scho vo Afang a gfreut kha! Hi,hi.

D Silvia het e riiieeese Portion beko (siehe Bild) und ich ha scho mit zwei Pancakes z kaempfe kha! Aber isch fein gsi und das isch jo d Hauptsach! Moege dued me in Amerika jo sowieso nie alles…, irgendwenn gwöhnt me sich dra... Aber nur schwer! ;o)

Nach dere "Stärkig" (hmmm.... naja, eher s Gegeteil), hämmer unser Verdauigsspaziergang in Lava Tree State Park verlegt. E kleine Wäg füehrt e paar Bäum entlang, wo d Lava zwar usse zerstört het, aber dr Baum im Innere het könne witer wachse... Dorum sehn alli Bäum wie kleini Punks us, will oberhalb vo dr Lava dr Baum het könne witerwachse, und weniger wie Lava Trees...

Isch interessant gsi und öbbis Neus für mi :o) Dank em guete Root vom Kuma!

Aschliessend hämmer diversi Pflichte miesse erfülle; unseri zwei Tiechli vom Hotel zruck bringe (die hän uns ganz schön blöd agluegt und i glaub, sie händs au nit so luschtig gfunde dass mir ihri Badtiecher zu Strandtiechli umfunktioniert hän, aber egal!), in Candys Shop (Schoggi vo Big Island) go Souvenir kaufe für unseri Gastfamiliene, Tanke (s Mietauti het miesse voll zruck geh wärde) und denn ab an Flughafe. Nachdäm mr alles umpackt hän simmer pünktlich bim Check-In gsi und sogar ohni Drogetest durch d Security ko! ;o) Jupie!!

Unser Fiasko mit dr Heimreis mitem Bus vom Flughafe lömmer mol unusgsproche - das würd mängs Fluechwörter enthalte und das wämmer jo nit... he,he.

SILVIA, ISCH E SUPER WEEKEND GSI! UF UNSER NÄCHSTS WEEKEND UF MAUI IN ÖBBE 2 WUCHE!...