Hello together!

It's Monday again... D Wuchene goen sooo schnaell ume, das isch wahnsinn!

In dr Schuel laufts sehr guet und i fühl mi immer wie besser uf dr Advanced Test vorbereitet. Mir haen jo jede Mäntig e Test und obwohls ganz klar tollers git, bringes die Test ächt und me kriegt e Art Routine für dr wirklichi Test. Und natürlich lernt me sehr viel us dene Test, das isch super. Bis jetzt hani mi Durchschnitt gsteigeret odr eifach könne halte... Dorum bini also sehr zfriede und mi Lehrer findet, ich schaff das scho! :)

Fascht jede Mäntig kömme e Ladig neui Studänte und dorum hani die Wuche dr Timo us Bayern kenneglernt. Es het generell alles sehr sympathischi Lüt an dr Schuel, isch no faszinierend!.. ;)

Am Fritig haemmer mit dr Schuel e super tolle Usflug gmacht - isch dr tollscht Usflug ever gsi bis jetzt. Sind nach Makapu'u gfahre, das isch uf dr andere site vo dr Insle. Doert hets verschiedeni Ussichtsplattforme wo me natürlich e super Ussicht het. Aber s beschte an daem Usflug sind die natuerliche Pools gsi. Me ka sich das als Vulkanloecher vorstelle (sinds jo wohrschinlich au, hi hi) wo durch hochi Waelle ueberschwemmt waerde. Doert inne ka me denn herrlich bade! Sooo cool! Wenn e Waelle ko isch, het me sich halt miesse neume feschthalte, aber gfoerlich isches ueberhaupt nit (Mami kei Angscht!)
I due denn no Föteli ufe lade wo s Wasser usseht als öbs Schnee wär wills so wyss isch vom Schuum!

Durch d Waelle gits denn au sogenannti Blow-Howles. D Waelle waerde durch Loecher ufedruckt und denn gits wie e Art Geysir/Fontaene. Isch cool gsi zum beobachte.

Ufem Retourwaeg simmer amene Strand vorbi ko wo umrandet gsi isch vo Felse. Vo dene Felse het me denn koenne abegumpe bzw. sie haen wie e Art Holz-Trampolin prepariert, damit me sicherer ka abgumpe.

Isch e aecht tolle Usflug gsi!

Am Samschtig sind d Silvia und ich ins Outlet gfahre mitem Bus. Haen oebbe 1.5 h derfuer brucht - aber mir haen jo Zit nit wohr :o) Sind natuerlich flissig go shoppe und Zobe relativ k.o. in Waikiki ako. Mitem Danny simmer denn go fein Sushi aesse (Michi und Arno: in daem kleine haerzige Restaurant wo mr zweimol zaemme gsi sind). Mitem saelber kaufte Bier usem 7 Eleven (das isch erlaubt!) haemmer denn e fiecht froehliche Obe kha. D Silvia isch so au aendlich mol zumene Bier (oder 2,3) ko, das isch natuerlich super gsi!

Dos die Wuche nit grad super Waetter isch (also was heisst das scho, es isch halt immer wiedermol raecht raegnerisch und bewoelkt, aber wirklich kalt isches jo nie...) haemmer gfunde mir goen ins Museum. Was e gueti Entscheidig gsi isch, wills tatsaechlich immer wiedermol graegnet het. S Museum isch sehr idruecklich und verzellt alles ueber d Afaeng vo dr Bevoelkerig vo Hawaii, dr Zuckerabau, d Kultur, Flora und Fauna. Nach e paar Stund haemmer denn aber nuem moege und sind Heime gange.

Isch e cooli Wuche gsi und jetzt hoffi ganz fescht, dass huet Nomidaag s Waetter mitspielt dassi AENDLICH WIEDERMOL AN STRAND KA LIEGE! :o)

Schmutz

Nici