Profile
Blog
Photos
Videos
Jetzt rägnet mal de ganz liäb Tag. Aber nöd immer glich starch, dass git mal no e chlini Verschnufpause. Bin froh, dass i a dem Zeltplatz bin. Grad nebet em Autocamping isch nämli diä Wasserjetdöff-Miätstation. En huärä Lärm machet die. Nebet öisem Zeltplatz hets no so en Zorb-Ball für is Wasser. De macht kei Lärm ussert es paar Glächter. Am Zeltplatz isch vill los - isch ja wieder Samschtigabig. Irgendwiä muäss es in Japan msl ä Zälttrophy ghä ha. Die hend alli sgliche Zält. Ich fall richtig uf mit mim chline, violette.
Ich ha am Vortag im Wasserbahnhof versproche, bim italienische Restaurant go ässe. Restaurant isch übertribe. Es isch im Juli zwei Täg offe und drüü Täg im Augschte. Es isch so en Mehrzweckruum wos nächli mit Tischblüämli verziert hend. Aber si hend Fröid gha. Ich glaub eine nächli näbetdra het serschtmal Spaghetti gässe. Er het nämli dKellneri öppis wäg derä Soba gfröget. So ala - die sind nächli speziell. Dana hani wellä nächli go laufe trotz em Rägä. Nur de Wasserfall woni ha wellä gseh isch mal wieder nöd zuägänglich gsi. Es muäss glaub letscht Jahr es rechts Unwätter ghä ha, dass i dem s***suko-Toya-Nationalpark alli spannende Wanderwäg wägä Steischlag und so gschlosse sind. Schad. Apropos Wasserfall. Ich han ja no eine vo de schönschte Wasserfäll vo Japan go aluägä. Es het sogar en Zeltplatz i de nöchi, aber kei Chance mit öffentliche Verchehrsmittel i Laufdistanz zcho. Schad. Drum goni en Tag früäner nach Onuma. Chlammere zuä und zrugg zu mim Spaziergang. Ich bin denn stattdesse de Strass na hügelwärts, amene Spital verbii und denn no falsch abboge. Es het so gschiffet, dass mini Brülle aglofe isch und ich denn halt erscht im letschte Moment de Underschied zwüscheteme Riisewurm undeme Stäcke gseh han. Bin halt schnäller wieder zrugg am Wasserbahnhof gsi, als i grächnet han. Det heisst, Handy uflade, Kafi trinke und de Blog schriibe. Hüt wird wohl nüm vill passiere ussert Rägä...
Am Obig hets glich ufghellt und ich han chönne no zumene chline Inselpark laufe. sFüürwerch hani hüt besser gseh, aber zum Fötele brücht mer än rächte Zoom.
ZFuäss 16300, 13km
- comments