Profile
Blog
Photos
Videos
Am Morge woni ufgstande bin hani nur wellä schlafe. Das isch mer nämli i de Nacht verwehrt worde. Langsam regts mi uf. Am elfi bini denn unmotiviert uf de Pischte gstande. Erstunlicherwiis hani en schöne Spazierwäg gfunde. Zersch isches anem schöne Flüssli verbi gange. Richtig gmüätlich hets plätscheret. De Fluss isch denn imene See glander und de Weg isch sogar wiiters gange. En chline Verbindigskanal het mi den an Seeweg vom gröschte See gfüährt. Det simmer die meischte Spaziergänger und Jogger begägnet. Au rächscht vill Fischer hend ganglet und Hobbyfotographe mit recht grosse Tele. Da es rechts gschäftig gsi isch hets nöd grad so grossartig Tiär gha. Es Tuubemännli het versuächt es Tuubewiibli zimponiere. Süsch hets anders Vogel und Fischviech gha. Allerdigs isch grad nebetra no en Abentüürzoo gsi. Mit Riiserad, Schinekabine und Elefante. Das hani jedefalls vo usse her gse.
De See het denn wieder en Flussuuslauf gha, wo mich mit es paarne Kilometer Richtig Bahnhof het sölle bringe. Leider hend die natürli gnau denn gstoppt mit Spazierweg. DStrasa nach Südweschte isch kriminell worde. So e ängi und vill befahreni Strass hani nonig vill gha. Es ziitli hani chönne uf die ander Site vo de Leitplanke uswiche. Dummerwiis hets en Wohngebiet nächli näbetra, aber da hesch kei Chance gha, det abe ufs sichere Strössli zglange. Woni es den glich äntli gschafft han, hani glich bald wieder müässe uf die ander Strass, will ich ines paar Sackgassene glandet bin. Denn bini im Industriegebiet glandet, wo ich endli ä Glägeheit gfunde han zum Ässe und süsch Energie tanke. Es bizzeli wiiters gloffe und ich han zwei Wäg zur Uswahl gha. Entweder 15km Hauptstrass mit Trottoir, aber zspat am Bahnhof oder zgliche uf ä enge Strass mit Ussicht uf es paar Busstatione. Mini Motivation isch i dem Moment grad sehr tüüf gfalle und ich han beschlosse zur nächscht grössere Busstation zgo. SShoppingzenter isch grad nebetra gsi und det hani mis Glück versuächt. Han mer en Bus usegsuecht, wo numene südlich glägene Bahnhof fahrt und han no e guäti Halbstund müässe warte. Nebetra sind fasch im Füfminute-Takt Büss zrugg nach Kumamoto. Ich han gwartet und gwartet. Au no es paar ander. Mit zwänzg Minute Verspötig isch er den cho. Damit hetti min Aschlusszug verpasst und so hani mi entschide zrugg nach Kumamoto zgo, natürli grad schön no am Hotel verbi fahre, und mit em Shinkansen nach Sendai. Also het au chönne sGepäck im Hotel lo und um dSee laufe. Het meh Kilometer gha mit em Rückwäg und es wär nöd so niderschmetternd. Und ich han mi gfröit uf en lange Schlaf. Underwägs im Bus hend mi dBauarbeiterabsperrige im Kumamoto-Makottchen Stil es bizzeli ufgmunteret. Es isch es härzigs Bärli, wo perfekt vermarket wird. Vom Lädeli, Design vo de Büs, Transportcharte und und und. Natürli bini i dem Bus glandet, wo nöd ganz zum Bahnhof fahrt. Bi hani gmeint ich heg glueget. Im Busterminal hani no müässe umstige und natürli es herzigs Rundtourbüsli verwüscht, wo dTransportcharte nöd animmt. Obwohl ich die extra füregholt han, damit i möglichscht schnell wiiters chum. Am Bahnhof hets no es luschtigs Polizeihüsli gha. Modern im Emmitalerlook.
Am Viertelab füfi hani de Shinkansen Sakura verwüscht. Mit mim Tagesbudget bini hüt nächli grosszügig gsi, aber spar ja süsch fasch zvill. Ich han mer no überleit, da Lotto zspilä. Wär no cool mit me Gäld hei zcho als mer gange isch. Aber dJapaner sind ja es rächts wettsüchtigs Volk und da eini vo 30 Millione vo Lotto-Teilnehmer zsi, isch ja dGwünnchance gleich null. Und amene Tag wie hüt wohl im Minus.
Mis Hotel in Sendai isch i de nöchi vom Bahnhof gsi. DHauptstrass isch voll gsi mit verschidenschte Brünne und alles voll Kappa-Figure. Sogar uf jedere Lampe hend sich drü Kappas tummlet. Sooooo süess.
ZFuäss: 19000, 14km, Bus: 9km Zug: 108km
- comments