Profile
Blog
Photos
Videos
Hüüt wird wieder e Strecki abgloffe. Ich starte am Morge vo Sendai, de Stadt mit de allerhärzigschte Kappa-Figure. Es goht recht lang dur Industrie- und Shoppinggebiet. Relativ langwilig. Aber was sölls. Me gseht glich seint oder sander. Nach drüü Kilometer wirds denn doch no nächli ländlicher. Obwohl i sGfühl han, alles isch irgendwie verbaut usser sHügel. Han no churz es Schwätzli ghalte mit e Gruppe Pensionäre, wo wohl grad versuecht hend zsegfinde, was die bescht Entscheidig für ihres Beet isch. De eint het mit mir afange Chinesisch rede. De Witz dra hani nöd chegget, aber mer het mal glachet. Es bizzeli wiiters bini a Riisbuure. Die hend grad ihres Riisfeld mitere Dreschmaschine bearbeitet. DMaschine macht denn grad no chlini Büdeli us em Riishalm, wo denn numol tröchnet wird. Dummerwiis hani vergässe zfötele. DFraue hend nebetra grad de zMittag uf de Picknickdecki parat gmacht. Si hend mi eigentlich iglade, han aber müese ablehne. Trotzdem hani no zwei drüü Minute mit ine gred. Si hend au zwei chlini schnüsdigi Meintli gha - zwei und füfi. Relativ schnäll ischs wieder belebter worde. Drüümal sind Familieautos verbiigfahre, Fänschter offe und dChild strahlend und winkend es 'hello' usegrüeft.
Nach 17Kilometer bini denn im Städtli Ichki acho. Bin det amene chline Frucht-Gmües-Lädeli verbii. Han eigentlich wellä was poschte, nur bini k.o. gsi, wom Laufe i dere Hitz. Han drum schnällschtmögli welle zum Bahnhof und in Schatte sitze. DBsitzeri isch denn aber grad usecho, het mi gseh und mir Mikan id Händ druckt. Bin so kaputt gsi, dass i verpasst han no öppis Gmüäsigs zposchte, aber churz gredt hemmer.
Mit em schöne sibrige Pendlerzug, wo anschinend in ganz Kyushu umedüset, bini nach Kagoshima gfahre worde.
Im Hotel bini mit überraschende Gaschtfründschaft willkomme gheisse worde. Irgendwie herzlicher, natürlicher als i de letschte Hotels.
Am Tag druf ischs uf Stadtexkursion gange. Es paar Pärk, riisige überdachti Shoppingmeilene und Schrein. Wieder immens vill Bruutgschäfter. SEinte Schaufeischter hani denn eifach müässe fotographiere. En Traum wohl für alli Barbiefans: Es Barbie-Hochziitschleid. Anschinend hüratet sBarbie hützutag nüm i Wiis. Recht lang bini no am Hafe gsi und han de Wind und de Blick uf dVilkaninsel Sakurashima gnosse. Ich han en bsunders heisse und sunnige Tag verwüscht. Dass de Vulkan uf Sakurashima zuedem nöd no Asche schpeit isch wohl selte gnueg. Es isch eine vo de aktivschte Vulkan vo Japan.
Hinder mir im Hafepark, oder wies sis nennet Delfinpark, isch wohl grad en hawaiianisch aghuchte Event gsi. Alles Lieder ala Blue Hawaii, sechs Tänzerinne-Gruppe und es Sängerpaar. DSängerin isch teilwies hinder Kulisse und het de Text vom Natel abglese. Het fasch en Lachafall becho.
Am früe Namittag bini scho kaputt retour is Hotel, nachdem Bsuech vom Schrein grad nebetra. Interessanterwiis hets det grad no sowas wie Taufene gha und am Iigang en Riisekranich useme Baumschnitt. Naja es isch eher symbolisch, aber ich has jedefalls erchennt.
Au de südlichscht Bahnhof Makurazaki und das Kap wär uf mim Plan vom 12.10. gstande. Ja, jetzt isches verschobe uf unbekannt. Stattdesse wird usgruebet und mit em grosse Geburtstagschind skyped.
ZFuäss: 30600, 22.5km, Zug: 30km
ZFuäss: 9000, 6.3km
- comments