Profile
Blog
Photos
Videos
Min eigentliche Plan zum andere Bergort zgo, hani scho am Morge chönne an Bode stampfe. Es het e Bergstrass vo Oigamionsen zum Onumasee (ja er heisst glich wie de schöö See in Hokkaido), aber die isch mit 25 Strassekilometer ufwärts nächli lang und es het kein Bus. Also müssti wohl oder übel rundume mit de ÖV. Da die aber unregelmässig fahret und ich drüü Büs und ei Zugverbindig müsst nä, chämti sehr spat a. Nach dem Rägä isch es au sehr unsicher, dass de Zeltplatz zeltbar isch. Er isch grad näbem See und ich het denn um diä Ziit kei Alternative meh. Also gohts hüt gmüätlich zum Wasserfall und denn vorwärts nach Maebashi.
Zersch aber go Zmörgele. Hüt ischs erscht ab de Achti und nöd i Gruppe teilt. Am Nüni hani uschegget und han voller Erstune feschtgstellt, dass es anschinend während em Zmorge ufghört het rägne. Welch ein Wunder. Mini Händ fühlet sich so leer a ohni Schirm. De Wäg isch zersch dur sDörfli gange und denn ad Hauptstrass. Zum Glück nöd die eng Bergstrass. Diä isch nämli uf de andere Flusssite. De Ort het es paar Öpfelplantage. Aber irgendwiä wachset die nach abe. Händs wahrschinli extra so gmacht, dass kei Leitere bruchet. Au nachere Stund rägnets nonig und es het sogar en sehr hellgraue Fläcke, wo erahne loot, dass es dSunne no git. Susch hets nüt Speziells gha. Relativ schnäll bini im Dorf vom Wasserfall gsi und han uf em Ortsplan voller Fröid entdeckt, dass es än gmüätliche Rundwäg am und über de Fluss het zumene Schreinfelse. Die Fröid isch denn meh oder weniger is Wasser gheit, als mer i de Wasserfall-Raschtstätt gseit worde isch, dass de Wäg wäge Überschwämmig gschlosse seg. Dumm gloffe. Aber bin den glich no dur sDorf gloffe, mä gfindet ja au anders Spannendes und irgendwo loot sich sicher en Blick uf de Fluss erhasche. Ich bin drum glich zu eim Wegigang gange. Uf em Parkplatz isch grad äs Päärli acho und ich han dene erchlärt, dass de Wäg anschiinend gsperrt seg. Die hend so tuä als würd sich dWält nümä dreihä und hend mi öppe drü Mal gfröget, wos denn än Uussichtspunkt jetzt hegi. Hend mi nächli gnärvt. Vo wo sött ich das wüsse? Bin au grad ersch acho und Tourischtin! Wo sis denn kapiert het, bini wiiters uf mine Expedition und han tatsächli hundert Meter wiiters en chline Weg zunere Terasse mit herrlicher Sicht uf de Fluss gha. De Fluss
het so vill Wasser gha, dass de Wasserfall Fukiware, wo susch en recht stolze isch (30m breit, 7m höch), nur no en halbe Meter abeplätscheret het. Nachem Fötele bini wieder retour. Im Auto sind mer die andere bede vo vorher entgägegfahre cho. Ha se aghalte und die fröide Nachricht übermittelt. Dana ischs zrugg gange zur Wasserfall-Raschtstätt go en Moscht trinke bis de Bus sött fahre. Ach wie gärn hetti so en richtig feine Schwiizer Moscht. Aber es het sicher no es Glas voll übrig, wänni hei chum.
De Bus isch denn pünktlich cho. Zu minere Überraschig isch das de allererscht Bus woni erläbe, wo bi Ample de Motor usstellt. Bin fasch chli verschrocke. Aber grosses LOB, findi genial. Underwägs häts wieder agfange rägne...
Zrugg in Numata hani die nächscht Verbindig nach Maebashi gno und bin det vor em Checkin no wägäm Onumasee go fröge. Am Samschtig sött schös Wätter si und villicht chani denn numol en Versuäch wage als Tagesusflug.
Im Hotel hani dNews igschalte und bin grad nächli verschrocke. E riise Überschwämmig. Han zersch gmeint, es seg in China, will de Taifun underdesse nach Weschte abdriftet. Den hani verstande, dass es Ibaraki-Präfektur isch. En grosse Fluss hets de Deich wäg de Wassermängi durbroche und en Stadtteil überschwämmt. Hüser sind in anderi inekracht und vo de Autos gseht mer no knapp sDach. Mit öppe sechs Helis vo Rettig, Polzeibund Armee sind am Lüüt vo Balkon und Huusdächer am Rette gsi. Das Ganze 90km vo mir entfernt. Imene Gebiet woni wohl jetzt wär, wänni vo Aomori us dOschtküschte durab wär. Bin richtig gschockt und han wohl e Stund pauselos zuägluägt, bis mer in Sinn cho isch, dass i wohl no sött uf Poscht. Morn sötti min Koffer ha und det isch au das coole Souvenir vo Hokkaido, woni immer nonig weiss, öb i das id Schwiiz dörf nä. Und so sitzi wieder es Stündli i de Poscht, während de Poschtbeamti umetelefoniert. Dana bini nöd schläuer.
Han riisig Luscht wiedermal öppis nöd-japanischs zum zNacht zässe. Das het sich schwiriger usegstellt, als agno. Defür hani grad no en chline Stadtspaziergang gmacht. Wird nonig ganz schlau us dere Stadt. Es het sehr schöni gpflegti Ort wie e Flusspromenade und Busbahnhof. Aber süsch, also Gebäude sind alt, nöd gpflegt und grüsig. Ich glaub die sind grad nächli dra am Verschönnere. Aber au süsch so die vilä Ramen-Reschtis hets praktisch nöd. Ganz komischi Stadt.
Zrugg im Hotel hani wieder dNews igschalte. I de Präfektur nördlich vo Gunma hets ime chline Onsendörfli vom Hotel de Onsenbereich abgrisse und in Fluss abgsackt. Wänn bi Origamionsen nöd eso ä natürlich tüüfi Bucht gha hetti, wär das guät au mögli gsi. Es isch anschinend sogar uf de andere Site vo de Bergchetti, wo dPassstrass vo Oigamionsen anefüährt. Also reins Glück, dass ich mich für Gunma entschide han und nöd für e Hauptachse nördlicher.
Denn hets vomene Säuri-Vorfall bim nächschte grosse Bahnhof verzellt. Han zersch gmeint seg hüt gsi. Will ich bin hüt gnau die Strecki gfahre. Han denn im Internet erfahre, dass das wohl im April gsi isch. Irgendeine wo bi de Bahnhöf Shibukawa, Maebashi und Takasaki und de Bahnhofnahe Konbinis nächli Säuri a Fraue gsprützt het. Nächli beängstigend de hütig Tag. Aber sie hend ebe im Fernseh vo de hütige Polizeiüäbig verzellt, drum ischs hüt cho. Isch verruckt. Chum het de Süde de Taifun 16 überstande, isch Zentaljapan mit Nummer 18 beschäftigt und morn wird Hokkaido mit em 17 kämpfe. DHuusratversicherig muäss da huärä tüür si.
Ab Obig hani versuächt mini Koreareis nächli zplane..det ziehts mich nächscht Wuche ane. Mal en Kulturwächsel mit em Näbetziil Japan numol für drüü Mönet zdörfe bereise.
ZFuäss: 16100, 13km, Bus 17km, Zug 36km
- comments