Profile
Blog
Photos
Videos
Oops, da hani länger nüm brichtet. Die Täg sind so schnäll verbii, aber ich han nöd würkli was zverzellä.
Am 11. hani sInternet so lang wie mögli usgnutzt im Hotel und bin den numol nächli durs Städtli am Streune gsi. Schlussendlich bini uf de andere Bahnhofssite glandet. Imene Iichaufszäntrum. Es isch hätzig gmacht gsi, aber rein kulinarisch nöd interessant. McDonald, Starbucks und no en Italiener. Det hani mi au Stolz uf ä Pizza gfreut. Ja, die sind relativ nöd pizzamässig da. Aber ich han grad mini ich-mag-grad-keis-japanischs-Ässe-gse-Täg. Ich hetti am liäbschte Mal wieder was anderes gha. En feine Kebap oder es Thai Curry. Mit Schwiizer Köschtlichkeite fang i gar nöd erscht a. Die da zässe wär ja sowieso ä gschmacksverstuchendi Aktion. DPizza isch nöd ganz so schlimm gsi, immerhin besser als die woni in Kyoto gha han. Sie hend sogar jedem äs Pizzarädli ghä und än Löffel. Kei Ahnig was mer mit dem het sölle. Äs Rätsel für mich. Nachem ZMittag bini no is Buächabteilig. Det isch mer es Chinderbuäch grad is Aug gsprunge. SBuäch vom Frédéric, sMüüsli wo statt en immateriellen Wintervorrat ahüüft.
Nach dem chline Spaziärgang bini wiiters is nächschte Hotel in Maebashi. Am Namittag hani denn einigi Sache organisiert für mini witeri Reis. Also ich han meh mit mim Laptop kämpft. Min Koffer hani für die zwei Nächt wieder und so au de Laptop. De isch numol es Stückli unbruchbarer worde siit em letschte Mal und laaaaaangsam. Bin überhaupt nöd vorwärts cho. Denn no nächli fürs Klassetreffe organisiert bevor i is Bett bin. DNacht isch churz gsi. Bin ersch so am drüü Iigschlafe und am 5.50h bini vom Erdbebe gweckt worde. Es het erstunlich lang duuret. SEpizentrum isch i de nöchi vo Tokyo gsi. 5.6 uf de Richterscala. Da es aber tüüf une gsi isch, het Tokyo nur no es 4i gha und ich in Gunma es 3. Aber isch no interessant so im 11. Stock vo 11.
Nachem Erdbebe bini numol igschlafe und han de Wecker nöd ghört. Ersch sNachbebe churz vor de 12i het mi gweckt. Damit isch min Uusflug id Bärge au gschriche gsi. Ich han denn no nächli gfuulänzt und numol nächli organisiert.
Am Sunntigmorge hani no alles nächli umpackt. Da ich bis nach mim Koreareisli sicher kein Zeltplatz ufsuäche, hani was gange isch in Koffer gstopft. Au no nächli städtischeri Chleider mitgno. Praktischerwiis hani denn de Koffer direkt a de Recéption zum Hostel vo Fukuoka schicke.
Min Grobplan isch nach Tokyo zgo, denn churz Kyoto und mit de Fähre nach Korea, Busan. I dem Land blibi bis am 25.9. und nimm demn sSchnellboot nach Fukuoka. Also zu südliche Hauptinsel vo Japan.
Vo Maebashi ischs mit em Shinkansen nach Tokyo gange. Mis Hostel isch en Huusblock näbet em Tokyo Skytree.
SZimmer hani miteme Chines teilt. Er het mer vill kritischs und interessants über China verzellt, aber e chli e Memme isch er. Es isch ä Kakerlake im Zimmer gsi. Er het sich in entgegegsetzte Egge verchroche, während ich dem Viech e gratis Strudelbahn id Kanalisation gschänkt han. Süsch issets doch de ganz Ziit so Insektviecher und dä isch halbe usgflippt. Ich has jedefalls eher luschtig gha.
Am nächschte Morge bini eigentlich schö am 8i uf und han e Halbstund min Schlüssel gsuächt. Ich han gwüsst, dass en im Zimmer han. Schliesslich hani am Vorabig nachem zNacht ässe, sZimmer ufbschlosse. Naja mini Suächi isch nöd erfolgrich gsi und so bini eifach ohni Schlüssel us em Huus. Es het än längere Flussspaziergang gä bis nach Ryogoku. Det isch nämli die national Sumoarena. Und das isch min Tagesplan. Ich han mer nämli Tickets ergatteret, was eifacher gsi isch als erwartet. Nacher hani au gseh warum. DSitzplätz sind nämli voll vo Usländer gsi. Anschinend ischs nöd eso ungwöhnlichi Idee gsi...
DArena isch am Zähni no praktisch leer gsi. Bin nächli verwundert gsi. Ich weiss, dass die Guätä erscht am Namittag chömmet. Aber isch fasch nächli unfair für die no nidrigere Räng. Churz zur Erchlärig. Es het im Sumo 10 Räng. Die sind zimli schwär zum sich erkämpfe. Wämmer nämli imene Turnier schlächter abschnidet, als die Sumoka mit glichem Rang, wird mer wieder zrugggstuft. Zum de 10. Rang zerreiche bruchts mindeschtens vier Jahr und me muäss durchgehend gwünne. Aber selbscht denn, chunnt mer de 10. Rang als Yokozuna nur über wenns shöchschte Sumogremium dem zuästimmt. Die hend denn en Art Heiligestatus und müänd sich au entsprechend benäh zwüsse.
Zurziit sind es sogar drüü Persone, wo sich japanische Schwingerkönig dörf näne. Aber die chömmet wie gseit ersch am Schluss vom hütige Turniertag. Die ganz Verastalig goht zwei Wuche, wobi jede Sumoka eimal am Tag es Duell het. Ich has mega interessant gfunde. Will Sache woni ghört und gläse han, hani live gseh. Nur chumi nöd drus wieso de Schiedsrichter und Zweikampfasäger sich immer gönd do umzieh. Ich chennt schwöre, es sind zumindersch teilwiis die gliche gsi.
Ab de zwei häts dZuäschauer denn gä. Au mini leer Reihe het sich gfüllt. Ich bin uf de höchere Tribüne gsi, die hend normali Sitzreihe. Die andere unedra sind boxene mit vier Sitzchüssi. Das hetti nöd so lang usghalte.
Näbet mich isch denn no en Belgier und en Ami ghocket. De Ami het anschinend en Scheiss gmacht mit de Buächig und isch trennt worde vo sine Famili. Damit er wenigstens de Brüäder zum Quasle het, hani mit em Brüäder de Platz gwächslet. Somit bini denn bin Vater und em dritte Brüäder ghocket. Si chömmet vo Alaska und de eint vo sine Söhn hüratet zwei Täg spöter ä Japaneri. Ich nimm a die werdet dich rächt wundere. Es isch nämli ä traditionelli Shinto-Zeremonie, wo vo Fettnämpfli nur e so triifet. Die Famili hend sich nöd uf das vorbereitet. Au is Sumo-Stadium sinds ghocket, ohni sich zinformiere über de Sport. Ich bin also meh oder weniger ihri kulturelli Reiseleitig gsi. Aber hends luschtig gha. Luut ihne bini die Sumo-Expertin gsi und si hend mer nöd glaubt, dass ich serschtmol es Duell live gseh.
Es isch irgendwie komisch wieder vo so vill Usländer umrundet zsi. Die Amerikaner uf de andere Site vo mir hend no weniger Ahnig gha. Si hend gäge Ändi usegfunde, dass die Person gwunne het wo nöd de Ring verloht und nöd de Bode mit andere Körperteil als dFüäss berüährt. Also wämmer doch scho so öppis goht go aluägä. Sött mer doch es bizzeli sich iiläse. Ich han aber beschlosse, si zignoriere. Schliesslich willi au no de Match gse. Die letschte zwei Duell sind die beide höchscht Rangierte gsi. De erscht het verlore. Drufabe sind dSitzchüssi gfloge. Es het super usgseh. Aber andersch als bi öis, wo das eher es Zeiche vo Fröid isch, hend die so ihri Frustration kundtuä. Das hani aber erscht dur nachträchliches Nacheläse erfahre.
Nach de Abschlusszeremonie bini zrugg is Hostel g'eilt. Det hani natürli wieder sProblem mit em Schlüssel gha. Han en andere chönne cha. Da ich ha müässe stresse zum zNacht mit mine Brest-Tokyo-Kollegine, hani zu nüt gross Ziit gha. Han nämli uf die ander Site vo Tokyo dörfe. Mer hend denn zDritte imene französisch aghuchte Reschti i de nöchi vo Iidabashi Yakitori gha. Alles verschiedeni Spiässli. Riisig fein. Bin denn am Obig müäd zrugg is Hostel go schlafe.
Am nächschte Tag hani eigentlich wellä ziitig los. Nur het mer de blöd Schlüssel wieder ä Strich dur dRächnig gmacht. Da ich de ja schlächt im Dunkle han chönne suäche, hani müässe warte bis de Chines ufwacht. Das heisst, ich bin ersch am Nüni würkli uf wieder erfolglosi Suächaktion gsi. Am Zähni hani denn halt uschecket und bin schnällschtens uf die ander Siite vo Tokyo is Swiss House. Det hani no mis Souvenir verbii bracht und hoi gseit zu mine ehemalige Arbetskollege. Denn schnellschtens zum Hauptbahnhof und in nächschte Shinkansen nach Kyoto gschrige. Han zersch gmeint, ich werd Müäh ha, da ich nüt reserviert han. Zu mine Überraschig fahrt all 10 Min eine die 500km. Unglaublich.
De Shinkansen isch nach em zweite Bahnhof voll gsi. Ich han aber en schöne Fänschteeplatz chönne ergattere.
In Kyoto hani mi uf en Namittagswii troffe. Da üse Italiener nonig offe gha het simmer halt is Brittish Pub. Det hämmer gschwätzt bis dDunkel gsi isch. Uf em Wäg zur UBahn simmer no am ehemalige Schuälkolleg vo Taiwan uf de Strass begegnet. En riise Zuäfall. Ich bin den no wiiters zu mim Hostel gloffe. Es mega schös. Hammer. Han mi richtig wohl gfühlt. Und denn isch au scho mini letscht Nacht uf em japanische Feschtland abroche. Zuminderscht für ä Wuche.
ZFuäss: 62000, 50km, Zug/ Ubahn 687km
- comments