Profile
Blog
Photos
Videos
Wunderbar. Han total verschlafe. De Wecker woni gstellt han, lütet nur a Wuchetage. Wieder öppis woni minere Fehlkonfiguration zverdanke han. De nächscht Zug fahrt erscht am halbi Zwölfi und so han mi uf zum Bahnhof gmacht. Han recht müässe Suäche, bis ich usegfunde han, dass es wohl doch e Zugverbindig zu dem Zipfel use het. Es isch ebe kei Linie vo de Nationale Bahngsellschaft. Und da si au trennti Bahnhöf hends entweder unterschidlichi Spurbreiti oder sind sehr verkracht. DStrecki isch wunderschön zwüschet Meer und Wald gläge. In Tabirahiradoguchi bini usgstige und han mich richtig Meer ufgmacht. Am Hafe hets no es Lädeli mit Gmüäs und Fisch. Alles entweder am Stück oder no lebendig in Wassertrög. Nacheme Kafi ischs wiiters zur Golden Gate Bridge gange. Ja eigentlich heisst si Hiradoohashi - also die gross Brugg vo Hirado. Hirado isch eini vo de Insle vo da vorglageret isch und mer ohni Schiff defür über die Brugg erreicht. Sie isch au rot und hängend wie die vo San Francisco. Natürli stimmt dGrössi nöd überrein. Was no luschtig isch: die chli Insle het acht grossi katholischi Chilene und die gröscht isch am Heilig Franziskus Xaver gwidmet. Klar isch nöd de chlich Heilig, aber zumindescht namentlich nöch dra.
Ich bin natürli uf die Insle und churz nach de Brugg inen Spazierweg abboge. De het mi zersch zumene Strand mit Spillplatz gfüährt und isch dana dur es Gstrüppdickicht gange, wo wohl voll mit Spinne und Schlange gsi isch. Bin so ime chline Wilerli usecho. Nacheme Kilometer a de Hauptstrass bini denn in Schlosspark abboge. sSchloss selber isch recht chli. Es het aber es grosses Areal mit vill chline Türm. Es git en Bestechigsturm, en Marderturm und anderes Kuriositäte. Richtig gross isch de Schrein und de vorglagerti Garte. Es sind recht vill Kirschbäum, drum wird de Park wohl Früählig voll vo Tourischte si. Jetzt isches sehr ruhig. DUussicht vom Schloss isch genial gsi. Natürli het sWetter au däzuä Bitreit. Nachem Schloss ischs uf en andere Stadthügel gange. Det isch dXaverchile. Die isch mega schön gsi. Imene modernere Stil, aber glich vill gotisches. Nächli Speziell hanis gfunde, dass mer nöd richtig id Chile dörfe het. Es het en abtrennte Bereich hine gha, vo wo mer Föteli het dörfe mache. Oder es zumindersch gmacht worde isch. DSpendechischli hends i dnöchi gstellt, aber sWiiwasser inere Muschle isch unerreichbar gsi. Verusse hets no e chlini Maria-Grotte gha und en Souvenirlade. Nebscht Sache wos bi üs a so Pilgerstättene au hetti, hets no es paar kitschigi Nagasaki-Chile Ahänger mit Härzli dra. Süsch vill no Latinisch gschribe, obwohl es da wohl nöd vill verstönd. Sogar no Lourdes-Ahänger häts gha.
SStädtli selber isch en amüsante Mix zwüschet holländisch-chrischtlich und japanische Kulture. Es het traditionelli Hüser, en alte holländischen Hafekontor und Souvenirläde verchaufet Figure in Kimono und in holländische Tracht.
Langsam hani mi müässe zrugg zum Feschtland mache, da dSunne sich am Horizont näheret. Nach de Brugg bini uf de Nagazaki-Sunneuntergangsstrass gloffe und tatsächlich isch dSunne untergange. Zrugg im Bahnhof hani dörfe drüüviärtel Stund warte bis ich denn nach Imari chauffiert worde bin.
ZFuäss: 21100, 17km, Zug: 74km
- comments