Profile
Blog
Photos
Videos
Am Morge bini scho ziitig ufgstande, da lut Plan hüt e grösseri Tour astoht. Weniger zum Laufe, aber vom einte Bergdorf ines anders vomene andere Tal. No lang vorem Zmorge mini i de Lobby Lounge gsi um im Internet sWätter gnöier agüggsle. Det het sich bini Vermuätig vom nächtliche Fernsehluägö bestätigt. Taifun Nummer 18 isch underwägs. Zwar hani kei Ahnig wo oder wänn 17 sött gsi si. Aber das isch ja nöd wichtig. 18 stüret schö Nagoya a und fägt miteme Durchmässet vo Osaka bis Tokyo dur Mitteljapan. Nach de nöischte Wätterdate wird au Gunma i dem Tüüfdruckgebiet si. Das heisst, mini komplette Plän sind dahin. Eigentlich hetti ja no zwei Zältnächt i de Bärge wellä gnüsse. Aber es gseht us, als würd de Dauerrägä no zwei Täg dure. So wie ich vo mim Fenschter is gseh, isch zum Wasserfall ane e ängi Bergstrass ohni Fuässwäg und dä Näbel hanget drin. Also au ufgrund Erdrütsch zgföhrlich und de fesch Rägä würd nöd emol min Schirm überstoh, also eidütig keis Vergnüägä. Drum isch mer dEntscheidig nöd schwär gfalle, aber enttüscht bini trotzdem gsi.
SRyokan het mi gern numol ä Nacht gno und so bini am sibni go Zmörgele. Si hend glaub sganze Huus vollä gha. DGäscht hends i zwei Gruppe unterteilt. Da ich ja eigentlich früäh los han wellä bini bi de 7ni Gruppe gsi. Denn bini zrugg is Zimmer und han no es paar japanischi Poschtcharte gschribe. Diä bruchet immens vill Ziit. Drufabe hani no all diä blöde Prospekt, wo de ander mir in Shibukawa id Händ druckt het, ussortiert. Nach nächli quizzle, Fernseh luägä und döse bini denn wieder abe id Lobby Lounge go gross internetle. Luut de Nachrichte hend immens vill Orte Überschwämmige. Teils meterhöch. Ich bin imene Bergdorf, wo de gross Fluss Gott sei Dank enorm vill Platz het. Er gseht nächli brun us unterdesse, aber au klar bi dem Rägä. Es regnet nöd nur dauert sondern luut Wätterdate 34 Liter pro Quadratmeter pro Stund. Da chönnsch stundewiis es Fass fülle. SErstundliche isch, es will niä ufhöre. De Taifun isch unterdesse nördlicher cho, als mer dänkt het. Kyoto und Osaka hend anschinend Glück gha. Luut mine Quelle vor Ort. De 17-ner Taifun isch no gar nöd cho. Aber er het sich vor em 18ner entwickelt. De wachst ganz schön und stüret d'Oschtküschte vo Tohoku a. Churz devor macht er aber en Schwänker nach Norde und rast über dOschtküschte vo Hokkaido und wiiters nach Russland. Irgendwie no speziell zghöre, dass en tropische Sturm uf Russland zuästüret.
Ich han no verschidenes abgarbeitet und blogget. Ab äm Füfi isch dKaraokebox igstellt worde im Ruum und scho bald sind es paar inecho. Ich han mi denm dezuä gsellt. Die hend es ganzes Telefonbuäch wonnmet cha dLiäder uswähle. Da im Land hets aner nöd grad vill für mich bekannti Liäder gha. Beatles, Abba und co hani vergäbens gsuächt. Amazing Grace, the Power of Love, Can't stop falling in love und The Rose hani gfunde. Alles Herzschmärz und nüt glatts. The Rose hani denn gsunge, aber hinder em Text isch de ganz Ziit en dazuä passende Film gloffe, das het mi verwirrt. Min erschte Versuäch äs japanischs zsinge hani müässe ufgä. Bi dem Karaoke het mer überhaupt kei Stützi betreffend Melodie und ich bin bald verlore gsi. Muässes wohl nächli üäbä. Am halbi Nüni hends denn gnuäg gha. Ich au, aber es het eher a teils rächt schräge Tön gläge. Aber wer Fröid dra het i dem Nationalsport, dem söttmer dFröid loo.
Nachem Onsen bini denn rächt kaputt vom Nöd-Laufe in Futon gkroche. No churz de Färnsee igschalte und sLache nöd chönne verkneife, wos e 87-jährigi nachem Rezept zum gsund Alterwerde gfröget hend: Jede Abig äs bizzeli Biörää
- comments