So nöie Tag - nöis Glück. Bin grad los am Morge nach Toyako Onsen, Geld go uselo. Has au übercho, also kei Problem mit de Bank. Han den no es guäts Stündli am See gnosse und Tourischte oder besser die andere Tourischte beobachtet. Denn hets churz nach de Elfi afange regne und ich ha numol für es Stündli im Busbahnhof gwartet. De Bus het mi denn as Dörfli im Norde vom See bracht. Es het abeglärnt und ich han mi denn Grad wieder im Busterminal untergstellt. De heisst passenderwiis Wasserbahnhof. Es het denn en megacoole Lade gha mit allerfeinschte Frücht und Gmüäss vo de Region. Au verschiedenschti handgmachti Souvenir. Sobald es nur no grägelet het, bini loos zunere 2Kilometer entfernte Campingplatz, wo nächli ufere Halbinsel gläge isch. Underwägs hets wieder feschter grägnet, aber mit mine Anti-Rege-Usrüschtig isch das ja keis Problem. Bim Camping hani denn feschtgstellt, dass das en reine Autocamping isch. Kei Zelt erlaubt. Also wieder zrugg im Schiff. En andere Zältplatz liit sehr zentral, grad 200m vom Wasserbahnhof entfernt. SZelt im Rägä ufstelle isch nächli trikky - vorallem wenns kein trochene Understand het, wommers chönnti vorbereite. Has dennoch einigermasse troche gschafft. Bi denn no ä guäti Stund im Zelt ghocket, bis de Räge nachegä het. Denn bini uf de Vorplatz vom Wasserbahnhof miteme Iischalte Zitronesirupwasser gsässe. Es isch nämli grad Dorfkaraoke gloffe. Het eher e Altersunterhaltig gliche, aber es isch luschtig gsi. Die meischte hend au e guäti Stimm gha. Churz nach de Füfe hets wieder afange rägne. Denn het grad Bingo agfange. Mä chönnti es Velo gwünne. Aber was sölli mit dem? Au süsch hets luuter Sache gha wie riisigi Süässigkeitesäck, Campingstuähl, Massagegrät und denn hets no für es paar Vorgwünner je vier Kilo Gmüäs ghä. Hend fein usgseh, aber au nächli vill. Drum hani nur zuägluägt. Isch huärä glatt gsi. Näbetra hends no verschiedeni zÄsse verchauft. Ha scho e Pizza is Aug gfasst, denn hani gseh, dass de Verchäufer si no mit em Bunsebränner bearbeitet hät. Denn isch mer dLuscht vergange und i ha mal dWurscht probiert. Die isch besser gsi als erwartet. Nachem Bingo bini zrugg zum Zält. Da hanis plötzli pfiife und trummele ghört. Nei nöd dBasler Fasnacht, sondern mis erschte Matsuri.

Es hät vier Gruppene gha. Serschte Konschtrunkt chani nöd erschläre, szweite isch so e riise sich dreihendi Laterne mitemene Drache druf mit es paar Trommler hinedruf. SDritte isch e Gruppe vo über zwänzg Damene gsi, wo en elegante Japanische Tanz vorgfüährt händ. Die letscht isch e chlineri Gruppe gsi, mit ähnliche Tänz wie bi de Schüäleruffüährig in Monbetsu. Huärä guät isch gsi. Sogar no en Ängländer isch de bi, wo da au wohnt. DParade het den no umkehrt und hets ganze numol im Rägä dörfe mache. Ich ha mi denn is Zelt zruggzoge, will i no gäre sFüürwärch möchti gseh. Ach das hani vergässe verzellä. Anschinend wird in Toya Onsen (also uf de Südseesite) jede Abig äs Füürwerch verastaltet. Vom Mai bis glaub Oktober. SFüürwerch isch sicher super schön, nur hanis dur de Rege nur gedämpft wahrgno und es isch recht chli vo dere Siite us. Isch halt für die andere Tourischte gmacht.

ZFuäss: 13100, 11km; Bus 14km