Am Morge rassig uf und zum vier Kilometer entfernte Bahnhof vo Abashiri gloffe. Nachem Billetchauf hani dStund Warteziit usgnützt, um bi de Bahnhoftourischteinfo no nächli zschnäugge. Mit de Mitarbeiteri hani denn no nächli chönne quatsche. Naches Ziitli het si bi mir nachegfröget, wies bi öis mit em Militär isch. Anschinend will de Premierminischter Abe sMilitär kapfbereit mache. Obwohl mer sGägeteil i de Verfassig nach em 2.Weltchrieg feschtgleit het. Kei Ahnig vo dere News ohni Internet. Anschinend wend si sich sogar mit Amerika militärisch verbünde. Das dönt us minere Sicht ziemli abschtrus. Denn müänds ja ständig in Iisatz im Nahe Oschte und wohl au in anderi Brännpünkt. Und si setzte sich ja scho bi de Nato i - und det für de Wältfride und nöd will e Grossnation sich bedroht fühlt. Si isch schlussäntli zfride gsi mit minere Antwort zum Schwiizer Militär und hofft, dass Japan es au schafft so zverblibe. Vor luuter Schnorre hani no de Bahnhofserinnerigsstämpel vergässe..aber da gits Schlimmeres. Es isch wieder en Ein-Wage-Zug gsi. So ä Fröid hani. Dur schöni Naturidyllene simmer gfahre bis ich den in Kawayo-Onsen usgstige bin. Vo da us sötts en Bus ha in Nationalpark. So ganz eifach isch nöd gsi oder eifach huärä verwirrend für mich. Schlussäntli bini stolzi Bsitzeri vo Akan-Passport für zwei Täg. So ä Art Gäschtecharte für 15.-. Damit chani au imene Bus fahre wo mich zum Campingplatz bringt. Was i denn gmärkt han: Äs isch en Tourischtebus. De het e japanisch sprächendi Reiseleiteri gha und het a drüü veschiedene Attraktione für es Ziitli gstoppet. Bi zersch nächli überrascht gsi, hans denn aber no glatt gfunde. Zersch simmer anen Schwäfelberg Io. Richtig tüüflisch hets zischt, gälbi Rauchfontäne und halt wie immer a dene Ort en wunderbare Schwäfelgstank. Drufabe zum See...Mann, isch das vollgstopft gsi vo Zelt. Han mer nächli Sorge gmacht um de Zeltplatz meiner Wahl. Ich han nöd vill verstande, aber de See gfrüürt anschinend nöd weg de heiss Quelle und sinteressante: es söll sich es Nessie drin befinde...So en Dino-artige Schnüggel wos Kuschscha-tschan nännet.

Es isch sersch Mal, dass ich Japaner gseh Schwümme so wie bi öis au im Summer. Wahrschinli sinds wählerisch und händ liäber en ufgwärmte Bergsee als sMeer oder en normale See. Jedefalls het mer chönne im Sand nächli grabe und me het es Fuässbad gha mit 30Grad Wasser. Nebetra hets es Souvenirlade gha. U huärä schöni Tierschnitzereie. I han mi müässä zämänäh nöd grad es paar zposchte. Nachher isch swiiters gange zoberscht uf de Bihoro Pass - i dem Teil vom Nationalpark die schönscht Ussicht. Tja und dummerwiis wär das mis Laufziel gsi für more, aber so isch natürli dSpannig wäg. All andere Wanderweg sind ame andere Egge vom Park und dVelorundweg startet ab 45km, wo grad die Stecki abdeckt, woni jetzt gfahre bin. Somit gohts morn wieder talwärts. Ahh unterwägs simmer no am Fluss verbii wommer Kanu chönnt fahre - so was vo schön. Wänni nöd elei wär würdis glatt probiere.

Nachem Pass isch mer denn retour zu de Hotels und Campingplätz.

Schnell no bevors dunkel wird, bini no en Spaziergang go mache uf dHalbibsel Wakoto. Wirklich en wunderschön, fascht zperfekte Waldwäg. Äs Eichhörnli hät mich 100m begleitet. Hammer wie das vo Ascht zu Ascht gumpet isch. Zrugg am Zeltplatz hani mal das Luxusresort erkunde. Also sehr schöni WC-Alage, Münzwöschmaschine und Trockner sowiä ä Münzduschi. Naja es rächtfertiget nöd de doppelti Platzpris, aber es schint eifach beliebt gsi und so chammer dMänschemängi au stüüre. Au dä Priis isch natürli günschtig im Verglich mit Hotels und dGlegeheit vo de Wöschmaschine hani au gnutzt. Es isch usserdem zimli alles nöi und es het es grosses Informationzentrum mit emene Naturlexikon. Mit stuune hani feschtgstellt, dass da au Eichelhäher und Wiedehopf händ. Ich versuäch innerno usezfinde, was das gnau für e Raubvogel isch woni de ganz Ziit gseh...

Nach emene Riisballe und schwarze Bohne bini denn go pfuse.

ZFuäss: 17800, 14.25km, Bus 45km, Zug 80km