Profile
Blog
Photos
Videos
Mer isch mir empfohle worde, am Seeweg entlang zlaufe. Da er nirgends itreit gsi isch, hani kei Ahnig ha wie wiit er mich Richtig Abashiri füährt. Ach ja.. ich han müässe ä Planänderig mache und Abashiri doch noch es Bsüächli abstatte. De Nationalpark woni apeile isch mit ÖV leider nur vom Oste her zuägängig gmacht, dass heisst, die Kluge darf wieder fahren im Zuge. Die Zuglinie füährt alt ebe über Abashiri. Drum ischs hüt nach Norde statt Süde gange. Öppe 10 Kilometer lang hani Chisweg und Feldweg chönne gnüsse. Alles am See entlang dur en Naturschutzwald. Wieder mal richtig zum dNatur gnüsse. Zerschmal hani en offizielle Wanderwegwiiser gse. Süsch hends teilwiis so Holzpföl wo mer azeige söttet, dass i ufeme Wanderweg bin - au wänd de teert isch.
Han so druf blanget villicht hüt das härzige endemische Flughörnli zgseh. Aber kei Glück gha. Defür hani öppe 20 Fischerreiher, zig vo de blöde Chräie, was Milanähnlichs, Entefamilie, Buntspechte, Kormoran, japanischi Bachstelze und no do en komische Vogel wo meh schreit als zwitscheret oder singt. Au de Gugger hani wieder ghört. Süsch hani serschmal öppe sechs verschiedeni Schmetterling gseh und denn no Libellene. Es wär richtig gmüätlich gsi, wenn i nöd demit beschäftigt gsi wär, mich vo Mugge und süschigem Gflüg zbefreie. Zum Teil also nüm so luschtig. Einisch bini no vonere 3cm-Hummel als Landeplatz missbrucht worde. Schrecksekunde. Jedefalls hends mich denn zwinge dWindjagge trotz dere schweisstribende düpigge Hitz azlegge.
Imene chline Fischerdörfli woni verbii cho bin chamer als Attraktion go Eichhörnli und Baumhörnli aluägä - aber ebe nöd die Nager woni gern würd gse. Tja churz dena isch es au ad Hauptstrass und ruckzuck bini am Zeltplatz gsi. SLaufe isch mer hüt recht liächt gfalle. Villicht liits am Chiiswäg, woni ha chönne laufe. Oder i bin so abglänkt gsi vo min Anti-Mugge-Fuchtle-und-Schüttle, dass i nöd gmerkt han wie ich laufe. Oder ich han mir es paar mer Muskle atrainiert.
Fasch churz vor em Campingplatz isch mer no es chliises Kafi am Wägrand ufgfalle, dass usserdem sJapanische Curry serviert. Mis zNachtässe isch somit plant. Nachem Zeltufstelle bini wieder retour gloffe und han zersch mal de Kafi bi Seeblick gnosse und spöter au es Chäs-Hamburger-Curry. Feeeeiiiin. SKafi isch härzig, mit selbschtgmache Spiischarte. SPersonal isch fründlich, aber jetzt nöd uffallend ufmerksam. Wahrschinli au will i die einzig Chundin bin. Aber was natürli gar nöd goht i mine Schwiizer Auge - sganze Kafi isch mit künschtlicher Bluämä ja sogar grüäni Pflanzestöck dekoriert und süsch eher dürftig mit Glacé-Plakat. Ahand de Menucharte sött ja Kreativizät ume si. Aber nöd immer meckere...sCurry isch uuui fein gsi. Nach dem Gnuss laufi wieder zrugg zum Zeltplatz und luägä, dass i fit bin more für dZugfahrt.
ZFuäss 24100; 19.2km
- comments