Profile
Blog
Photos
Videos
Am füfi am Morge erdröhnt de Luutsprecher. Nöd würkli öppis verstande. Han mer aber au nöd Müäh gä. Nach numol einmal umchehre, hani mi mal über Memanbetsu informiert mit de Infos wo ich am Vorabig no am Bahnhof becho han. Es het mi würkli anen schöne Ort verschlage. Riisegrossi schöni Bluämäfäder hets - nur blüähnds jetzt leider nöd. DTemperatur isch vom Vortag 32 Grad uf 17 Grad abegheit. Bi dem Temperaturwechsel bini froh um mini Mammut-uusrüschtig.
Grad vor mim Zelt het dHauptattraktion vom Juli stattgdunde. DBevölkerig isch go Süsswassermuschle go sammle. Das dörf mer ebe nur im Juli - und unter Kontrolle vo de Stadt. Es isch ganz amüsant gsi die verschiedene Technike azluägä. Die einte sind mit Fischerwasserschutzchleidig cho, anderi mit churze Hose und alte Sandale und wieder ander mit wiise Söckli.
Nach es bizzeli schwätze bini no e rundi ums Städtli go mache. Au willi en Ort gsuächt han, um mis Natel ufzlade. Ä Dame i de Stadtbibliothek isch so liäb gsi sNatel en drittel ufzlade, aber damit chani am nächschte Tag nöd is Unbekannt laufe...
Zersch mal bim Schrein verbii. En schöne. Si hettet wahrschinli au en Stempel ghä, aber dVorhäng sind all zoge gsi und das het mi nöd motiviert zlüüte. Wiiters zum Strassebahnhof. Isch zwar wie immer en interessante Ort, aber natürli gnau jetzt kei so es Natelufladegrät. Aber jetzt vom Stadthighlight no es Föteli go mache. Äs heisst Märlihügel oder meruchennooku. Also si bruchet würkli sWort Märchen. Es sind es paar Böim vor e Hügelkulisse und devor Herdöpfelfelder. Mit dene Bluämä gsehts denn ebe wie im Märli us. Es bizzeli höcher hend bo es grosses Sunnebluämäfeld - aber da bini au ziitlich fehl. Nachem Bsuäch i de Dorfbeck hani no es e herzigi Beiz gfunde namens Sunnebluämä wo Japanischs Curry serviert. Ui hani das scho vermisst=) Denn isch es au scho zrugg zum Zelt gange und no min Rucksack zum dritte Mal gflickt. De Wind het scho rächt is Zelt zoge. Trotz minere Antiwind- Muur woni gmacht han bini am nächschte Morge mitere Erchältig und Chopfweh ufgwacht.
ZFuäss 13700; 12.3km
7月16日/17日
Denn hani zwei Täg im Hotel näbetra verbracht um mini Energie wieder zlade.
- comments