So ben früäh us de Fädere cho, no churz es Souvenir poschtet und los bini. Chum de erscht Rank gmacht, a de Autocamper verbi, het mer öppert grüäft. En ältere Herr het völlig überrascht verzellt, er meini er heg mich churz vor em Kap Soya gseh. Ja, det bini ja au mal gsi, bi dem chalte russische Wind. Nacheme churze Schwatz wini wiiters. Ha glaub dMuskle glich nonig vo dene ich verzellt han. De Rucksack fühlt dich wieder schwär a. Schad, het die ganz Reis agnämer gmacht. Es paar Kilometer wiiters hupet mir eine und im Auto hinedrii Sitz dFrau wo am Vortag im gliche Bus gsi isch. Si isch uf em Wäg gsi zum go Kanufahre. Han si richtig drum benide. Ich ha dank de lokale Tourischtecharte schön es paar Nebewäg usgmacht. Es isch zwar toll gsi, nöd länger a de Hauptstrass müässä zlaufe, aber de ander isch halt en rechte Umweg und genau glich teert. Ich ha gofft no ab und zuä chönne am Fluss entlangzlaufe. Leider nöd. Churz vo de Brugg hani chöne en Blick ine wunderschöni Böimallee werfe, wo sich über de Fluss bügt. Es muäss hammermässig schön si mit em Kanu über das Wässerli zgleite. Naja ich gseh villicht ja no schöns. Am Afang hets no so drüü Hüser gha, wommer gmerkt, da het sich öppert en Traum erfüllt. De Erscht isch dusse am Rasemähie gsi, e riise kanadischi Holzhütte het er gha mit Fischerutensilie dusse und en Hummer stoht au no vor em Huus. De Zweit het sich glaub en ganze Park poschtet, Birkene apflanzt und es so es wiises Design-Drüüecks-Huus drii gsetzt. Also eis mit em Dach bis zum Bode. Das alles im tüüfschte Wald anere Strass wo so wenig los isch, dass ich es paar mal so es blöds Spinnenetz a mir gha han.. Tja, nachere Ewigkeit bini enere Landwirtschaftsschuäl verbi und dana e riiiiselangi Strass. Ich meine riiiiiiselangi Strass. Zersch hets si sich no liächt amigs boge und denn schnurrgrad. Ich säg öi die het und het nöd wellä ände. Es het zwar teilwiis Wald gha, aber da es gäg die Mittag zuägamge isch, hani nöd Schatte gha zum Laufe. Es isch soooooo heiss gsi. Und sooooo langwiilig. Ich ha mi bemüät mich gedanklich abzlänke, aber bi dere Hitz hani mich schnäll usdenkt. Ab und zuä gseht mer ä Chräie und Schmätterling susch nüt. Nach über vier Stund laufe (öppe 2 Stund uf dere Ewigkeitsstraass) bini denn wieder id Hauptstrass iboge und bi nur no 4 Strassekilometer vo mim Ziil entfert gsi. Natürli wieder ohni Wasser. Nach 2 Kilometer hani grad bim erschte Huus nach Wasser chönne fröge. Bin grad wieder fit gsi. En Kilometer gloffe, da fahrt eine an Strasserand und winkt mer zuä. Mer händ üs ufem Campingplatz am Vorabet droffe gha. Er hät mi denn grad zum Bahnhof gfahre. Bini grad froh gsi. Will so hani grad no chönne uf de Bus gumpe, woni denn au no de Mashu-See ha chönne go aluägä. Han e Privat-Erchlärig vo de Reiseleieri uf Japanisch becho, will die andere Gäscht gschlafe händ. Wennis denn verstande hetti, wäri jetzt au schlauer...De See isch u schön, So es richtig schös düüfs Blau hets gha. Zrugg am Bahnhof hani no nächli mit de Tourischtinfo gschwätzt. Anschinend wohnt öppert i de Schwiiz wo vo ihrem Dorf chunnt. Nachher hani no zwei Kilometer zum Camping müässä laufe. E Qual. Sogar us de Tolledeckel hets grüchet. Okay die natürli nur weg de heisse Quelle vo det duregleitet wird. Aber es isch immerno susch gnuä heiss gsi.

Uf de letschte 50m zu de Reception isch mer no e Dame entgegecho, wo vorgeschter au am Abashiri-See zeltet het. Mir hend det no churz gschwätzt. Si het mer us luuter Fröid no wellä Kafi schänke. Ich ha ihre denn chönne erchläre, dass ich selte heisses Wasser han und drum nächli schad wär...Denn hets si mich zum Zmorgekafi am nächschte Morge iiglade. Uf dä hani mi denn diä ganz Nacht gfröit. Aber jetzt gohts schnäll is Näscht. Bin nämli totaaaal müäd. De Tag het mi richtig gschluchet. Zersch i dere Hitz go laufe, denn no Bus fahre und zuälose und denn grad numol laufe zum Zeltplatz. Ich bin sogar fasch bim Mätteli ufblase, igschlafe. Denn wieder ufgschreckt, will de Nachbar luuthals singt oder mit sich sälber schwätzt. Das wird wohl wieder e luschtigi Nacht...

ZFuäss: 33100; 26.5km, Bus: 28km, Auto: 1km