Profile
Blog
Photos
Videos
Früäh ufgwacht, chli zämägrumt und uf en stündige Spazierrundi dur de Wald gange. Ganz schön gsi.
Druf abe hets min lang ersehnte Kafi gä. Die hend es ganzes Arsenal a verschidene Sorte gha - von Brasilie, Europa,... Ich ha mi für de Kilimanscharo entschide. Mer händ es gmüätlechs Schwätzli ghalte. Si sind scho zum sächste Mal rund um Hokkaido am Campingreise mache. Am halbi Elfi hani alles färtig zämäpackt und bin uf zum Bahnhof. Am Vorabig hani vo de Campingwartin erfahre, dass zum nächschte Zeltplatz woni gern agstüret het, kei Busverbindig het. 37 Strassekilometer sind zFuäss nöd realistisch und wär kein Spass meh. So hani halt e anderi Campingplätz im Kopf wo ich i de nöchi vo de Zuglinie sind. Ergo, hanis légère gno hüt morge, will de erscht Zug sowieso erscht am Viertel vor Zwölfi fahrt. Bim Bahnhof hani mi ad Tourischtinfo gwändet zum usegfinde, wo ich die gröschte Chance han dKranich gseh. Das Ganze het natürli no machbar müässe si mit Camping und laufe. Nächli sehr kompliziert gsi. Aber denn wär de Plan gsi zumene chline Dörfli Hasooka zfahre und zum Zeltplatz e Stund laufe. Am nächschte Tag hets den wieder mit em Zug zwei Statione wiiters sölle, wo mer amigs diä Kranich chönnti gseh. Ich bi den schnäll go sBillet poschte. Da hani erfahre, dass de 12i Zug gnau i dem Hasooka nöd haltet und ich drum uf de 2i Zug ha müässä. Also bini go zMittag ässe im Städtli und rächtziitig zrugg no nächli mit de Tourischtinfo gschwafflet. Debi hani usegfunde, dass es ab hüt Obig, zwei Täg söll durerägne und rächt heftig. Dänn hammer sGanze numol müässä überleggä. Will das würd heisse ich müssti drüü Nächt i dem Zeltplatz im Nirgendwo übernachte, wohl de ganz Ziit Sudoku mache und sNatel anstelle zum Strom spare. Usserdem bini überzügt, dass mis Zält nöd meh als zwei Nächt im Vollrägä überstoht. Also alles numol umdänke. Ich ha denn de Zug bis Kushiro gno und wellä det 2-3 Nächt bliibä. Uf em Wäg hani natürli ghofft, en Kranich vom Zug us gseh. Leider nöd...Aber ich han de Norokko-Zug gseh. Ich muäss definitiv numol da ane chon im Winter und all die Züg zfahre. In Kushiro han mi den wieder ad Tourischtinfo gwändet. Die sind sZweite de ganz Tag inere 2x2m Box ine. Ich ha ihne denn no nächli vo Lozärn und dLozärner Tourischtinfo vorgschwärmt. Ich ha mi denn mit de Hotellischte uf gmacht zur Zimmersuächi. Bin chrüüz und quer dur Kushiro gloffe, bis mer nach 5 Hotels abklappere glangert het. Ich han mi denn zum 400-Zimmer grosse Prince Hotel ufgmacht. Nächli türer gsi als die andere aber nöd vill meh als das eher schäbige, wemmer das so dörf schriibe, in Memanbetsu. Han mi denn druf gfröit entli wieder chönne sNatel richtig bruche und mini reschtliche 8 Reisetäg da zplane. Also die erschte zwei fallet ja scho mal is Wasser. Und das mit em Wifi het au nöd wellä klappe. Mis Grätli het zwar wieder voll Empfang, aber mis Natel cha glich nöd ufs Netzwerk zuägriffe. Zgliche mit em Hotelwifi. Das macht mer nächli Sorge, nach all mine Natelumesekklete in Kyoto het ich jetzt so gar kei Luscht mich no irgendwie um e Reparatur zkümmere. Naja luäget mer halt Baseball, dass isch schliesslich au en wichtige Teil vo de japanische Kultur. Au nach zwei Stund luägä, tschägg i immernonig was an Ballpunkt git und wenn en Strike isch. Tja und de Tag isch au scho ume. Ich trink jetzt no min Tee fertig und go denn go pfuuse. So en Tag zwüschet umplane, Zugabentüür und Zimmersuächi macht gad so müäd wie 20km laufe.
ZFuäss: 14200, 12.6km, Zug 89km
- comments