Am Morge hani no gmüätlich zämägrumt und zwar entli ma es trochnigs Zält. Defür mit beschtem Muskelkater i de Oberschenkel. Am halbi Zähni isch denn de erscht Bus gfahre. Ich bi glaub no niä i sone Schlotterchischte drin gsi. Überall hets quitscht und knirscht und dStossdämpfer sind au nüm das Wahre. Aber anschinend stört sich süsch niämert dra im Bus. Mä gseht in Japan generell sälte nöi Bus, aber so klapprig hanis glich nonig erläbt. Bim usega hani nächli prässiert und so isch bim Rucksack ufhebe de Träger alt plötzli nur no vom Duume ghebt worde. Hanen gad no vor Schlimmerem chönne bewahre. Aber ja, er hät e nöd ganz natürlichi Bewegig gmacht und tuät wohl no es ziitli weh. Jedefalls bini in Koiwai in Bummler bis nach Shizukuishi. Det hani gnuäg Ziit gha zum Geld hole und richtig fein dämpfti Gyoza (Teigtäsche) mampfe. Ui hani die vermisst. Am halbi Zwölfi ischs wiiters gange und zwar mit dem schöne rote Shinkansen, woni scho in Morioka gseh han. Er oder besser Sie heisst Komachi - Schönheit. Bini glicher Meinig. Ich fahr nur ei Station bis Tazawako. Det bini no churz id Tourischtinfo. Die het mer nächli hilflose Aschi gmacht. Ich würd mal bhaupte, dass sicher me als dHälfti vo ihrne Gäscht a de See wänd. Si het aber mir nöd chönne säge, öb de Weg zum See steil seg. Ich has denn ufgä, da es schlussendlich egal isch. Ich laufe sowieso. Aber die guät Frau muäss ja mal det gsi si und sich erinnere öbs e Passstrass gsi isch oder was...

Churz bini no bi de Drogerie verbi. Han dettä no en Verband poschtet, zum min Duume nächli stabilisiere. Er isch natürli scho agschwulle. Aber han ja kein Verglich=)

De Weg isch a villnä schöne Gärte, Riisfelder und Schrein verbii. Und alles ebe. Nach füf Kilometer bini denn vorem Konbini gstande, dä wo ebe au Wifi abüütet. Beschtens. So hani mini letsche paar Täg chönne in Blog tuä und verlüür nöd zvill Ziit demit in Akita. Het aber glaub nächli luschtig usgseh so e Usländerin ufem Randstei hockend und vertüüft is Natel luägend. Nachere Stund bini denn no diä letschte zwei Kilometer zum Zeltplatz gloffe. De isch rächt gross und verwinklet. Nachem Zält ufstelle bini nächli am See entlang und go Souvenirläde agluäge. Also eigentlich bini uf de Suächi nach ämänä gschidere Ortsplan gsi. Aber dä woni han tuäts au. Am füfi hend alli Läde zuä gmacht und ich bin retour is Zält go höckle als au scho wiedermal afange rägälä hät. Denn hani no nächli Rägäluft am See schnupperet und wiedermal es Sudoku glöst.

ZFuäss: 21800, 17.5 km, Zug: 29km, Bus: 15km