Profile
Blog
Photos
Videos
Mal richtig en Tag zum Uusschlafe oder besser mal e Nacht schö duregschlafe. So guät tuät das. Muskelkater hani no nächli, dä Dume will au nonig richtig derfür isch dBlatere wäg. Ich liäbe Lavendelöl=) Isch no erstunlich wiävill mä zwei Händ inklusiv zwei Dume brucht. Vill het e anderi Technik glanget, aber de Zopf hani hüt lo.
Bin wahrschinli ersch so am 9ni los. Es söll hüt mal wieder e Seeumrundig ghä. Kei Ahnig wie lang, aber wird wohl so an die 20km si. Und falls mers nüm gfallt, fahrt au en Bus.
De See gseht Hammer us. Es isch so e spezielle Wätterlag, dass sich dä See i füf verschidene Blau zeigt. Jedes schöner als andere. Tazawa heisst übeigens sovill wie Riisfeld-Sumpf. Es windet ganz schön und rägnet abwächslichswiis mit es paar Sunneschii.
Im Städtli isch no nüt los. Zu minere Überraschig hani e Strandpromenade gfunde und scho richtig Fröid gha. Dä Wäg isch aber nur en Kilometer gange. Nachher hets wieder nüt gschids gha. Underwägs hani einigi Jogger atroffe. Die üäbet wahrschinli für en Halbmarathon. Im Oktober hends da so einigi Laufevents.
Nach vier Kilometer hets numol en Wägwiiser gha mit 'Fussgängerweg'. Ganzi 200 Meter hens en schöne Weg gmacht mit Gländer und den enderter meh oder weniger im Nüt. Bald drufabe bini den vor em grosse Schrein vo da gstande. Er isch nächli erhobe uf de See use grichtet. Heisse tuät er Gozanoishi was so vill wie ehrewerti Steisitz bedütet. Mit de Verwalteri hani glaub fasch es Stündli gschwätzt. Mer hends no luschtig gha und si het mich sogar für morn zu sich Hei no iglade. Aber das isch verbindigsmässig kompliziert. Mal luägä. Mir hend no usegfunde, dass mir i üse Vorname zwei vo drüü glichi Kanjis händ. Irgendwänn bini denn doch no wiiters cho und nach wiitere sächs Kilometer ( exklusiv öppe viär Sackgasse) vor ä berüähmte Statuä gstande. Uf vilne Föteli muäss de See sovill Wasser gha ha, dass de ganz Sockel im Wasser gstande isch.
Au hets no en luschtige Schrein gha namens Ukiki. Ich bin jetzt zimli uf de Gägesiite vom Zeltplatz. Ziit für en Brunch natürli in Form vo Curry. Fein isches gsi.
Kurz vor em Zwei hani die zweiti Hälfi in Agriff gno. Nach wiitere füf Kilometer hani den halt no müässe Kafipause im Teehuus nachehole. Han ersch nachher gmärkt, dass wohl en Tee passender gsi wär. Aber de Ort heisst ebe Kappa-Abgrund. Und de Kappa isch ebe so es berüähmti Legende vo Japan. Isch so es monschterartigs Ding wo amene ufrächte Frosch glicht. Es läbt im Sumpf und isst Chind. Aber wämmer ihn mit Gurke füätteret isch alles in Ornig und er goht wieder. Also wäg dem hani halt fasch numol äs Päuseli müässe mache. I dem Teehuus hani denn no es paar Tomätli poschtet. Dana isch es wiiters gange. Die nächscht Nebestrass hani dasmal nöd gno und bereut. Es wär es super Fuässgängerströssli. Bim nöchschte Zuägang bini ine und han sWägli dur Wald und Riisfälder gnosse. Irgendwänn ischs dänn wieder zur Hauptstrass. Diä druffolgend chli Strass bini natürli wieder iiboge und glatt wieder i de Sackgass glandet. Churz nach de Füfi bini bim Zeltplatz acho und no churz füre i dChrüüzig g'eilt i de Hoffnig sKafi seg no offe. Leider Päch gha. Also wieder zrugg. Am Obig hani no en Spaziergang gmacht und somit die magische 30km erreicht. Hüt aber nur mit liächtem Gepäck.
ZFuäss: 39300, 31.5km
- comments