Am halbi Zwei bini churz use und bin mit em schönnschte Stärnehimmel belohnt worde. Dana bini aber schnäll wieder is Zält, dänn hüt sölls mal es bizzeli id Höchi gha. Damit i dHitz chan umgo, stohni am vieri uf und stoh am Bergufgang am Füfi. Ich bin a de Iwate-Vulkanchetti, wo au de höchscht Berg vo de Präfektur de Iwatesan beinhaltet. Er isch fasch so schön wie de Fuji nur amigs gseht mehrs nöd. Er wär 2038m.ü.M. rein lut Bergplan würd eigentlich au die Bestigig drinliggä. Aber die Ambitione hani nach em erschte Streckeabschnitt müässe ufgä. Ich bin ziitmässig hüt abig bunde, da ich kei Essware debii han muäss i dem Lade entweder poschte oder es het glaub au Curry=). Aber nur bis am Föifi. Das het nur klappt wenni entsprechend schnäll chönnti laufe. Da das nöd de Fall isch channi au no nächli Päusli mache und zMorge ässe und trinkä. Han zwar e chlines Drinkyoghurt, aber süsch nur Tomate, Gurke und so grüüsigs Toaschtbrot. Het nüüt gschiiders gha im Lade wo bergtauglich isch. De Bergplan woni becho han seit no luschtigi Sache, wie: Vom Sässellift chönd dWanderer Bluämä gse, wod Pionier pflanzet hend. Lift? Wanderer? Denn wäreds drüü Sässellift ufe. Dä erschti isch vo de Längi her für dChatz. Da würd mer i de Schwiiz nödemol en Entwurf mache. Inere Halbstund wär mer dobe. Aber ebe ich bin hüt mal Wanderi und laufe die knapp 1000 Höhemeter. Am Afang hets mer fasch abglöscht, öppe 200 Meter Stäge ufe. Ich has nöd gärn wänn mir öppert Schrittlängi bestimmt. Süsch sind no normali Wanderwäg gsi. Relativ vill no rutschig. Erschtens wäg em letschttägige Wätter und zweitens will so e lehmartigi Schicht grad als zweits chunnt. Die isch schmiärig wie nüt und dunkelorange. De Marder findet die Wäg au super und erledigt paar mal sis Gschäft schön id Mitti.
Bim Zmörgele het au grad de Specht näbetra ghämmerlet. Trotz mine villschichte a Chleidig isch es no überraschend chüäl. Muäss drum recht ufpasse bim päusele. Underwägs hets no e riise Warntafle. Ich verstoh nöd vill aber anschinend dörf mer e Strecki nöd dure und bi de andere hets gföhrliches Vulkangas. Da ich mich ja geschter nöd hä chönne bi de Ortsansässige informiere, wird i sowieso nöd de Weg go.
Nach schier endlose Ziit gsehni denn de erscht Mänsch: eine vo de Bähnler wo ab de 7ni Sässeli müäss bediene. Unterdesse macht sich sToaschtbrot bemerkbar. O wiä gärn hetti so es feins Walliser Roggebrot. Vom Bähnli gohts no e Halbstund bis i uf em Berg Inukurasan bin. Dana isch denn die vermeintliche Durchgangssperri. Er isch zwar nur 1406m.ü.M. aber defür hani de ganz Namittag no zum gnüsse und pfuuse. Ich bin nämli tierisch müäd und jetzt fangt au no de recht chlii Zeihä a weh mache.
Inukurasan heisst übersetzt Hundelagerberg. An det wo sich denn dWäg vo de Wanderer und Sesseliwanderer chrüüzt hend, hets wieder so blödi Stägene gha und au süsch nächli usepützlet mit Holzsteg und so. Uf em ufewäg hani den no schöni blaui Bluämä gseh. Zu minere Überraschig sinds Enzian gsi. Aber nächli anderi Sorte. Uf em Hundelager obe hets än 300m Rundweg um dSpitze ume. Leider gseht mer nüt. DWulche sind underdesse da und verdecket alles schön. Dezuä chunnt, dass es 200m unedra en Schwäfelschlund het wo recht raucht. Also Panorama gleich null. Uf dem Berg hani denn au die erschte Wanderer troffe. Die sind underwägs uf de Iwatesan, ebe de gross schö Chegelvulkan. Erstunlich so spat. Sisch underdesse ja scho Achti gsi. Aber die wohnet wahrschinli i de nöchi und hend es Auto. Anschinend sind die Warntafle eher Hiwis als Verbot. Interessanterwis het eine vo de Wanderer mit chline Luutsprecher Radio laufe lo. Ich han en druf agsproche und er het gseit, dass machet no vill zJapan.
Es isch mer denn nächli zschwäflig gsi zum länger det warte bis dSicht besser isch. Drum bini zrugg id nöchi vom Sässeli. Bim Abelaufe isch mer völlig unerwartet, e Schlange e Schrittlängi vor mir dure. Sisch fascht en Meter lang gsi. Und ich bi erschtens verschrocke und zweitens ischs mer chalt de Rugge abegloffe. Dunne bim Plätzli hets zwei Bänkli und es Gländer, damit mer guät zu dene Schwäfellöcher abegseht. Ich bi denn det länger ghöcklet und dUussicht gnosse. Au wänn si nöd so schön isch gsi, wie die vo de Onsen-Terasse une. Jedefalls hani denn det no anderi Lüüt troffe. Die Erschte hend gmeint, dass das jetzt scho de Inukuraberg seg. Ich ha si den müässe enttüsche. Aber sisch göttlich zum zuäluäge. Di sind besser usgrüschtet gsi als ich: mit Aktivchleider, Bergschuä, Sunnehuät, Wanderstöck - hend eifach usgseh, als hettets e Tagestour vor sich. Anschinend währends scho zfride gsi mit dene 100 Meter liechtem Astig. Diä andere sind nur bis zu de Plattform cho. Ich nimm a si hend au gmeint, dass seg jetzt dä Berg. Da si aber Halbschuä agha hend und dobe no de eint oder ander Teil rutschig gsi isch, han si i dem Glaube lo. Si sind scho so huärä begeischteret gsi. Nach drüü Minute sind wieder zrugg zum Sässeli.
Ich bin denn au am Nüüni zruggloffe. DHöigümper sind underdesse au wach. Aber ich schrecke jedes Mal uf, will i meine es seg wieder e Schlange. Stattdesse hauts mi öppe 10 Mal fascht uf de Latz. Han mega vorsichtig müässe laufe.

Am Zähni bini retour im Zeltplatz gsi. Da une hani jetzt sbeschte Panorama und langsam wird fasch heiss. Die andere Familie sind grad mit em Zmorge färtig und am Zelt abbreche. Si hend gstuunet, dass i scho det obe gsi bin und das gloffe. Als Unsportlichi wie ich tönt das au nöd schlächt. Es het sich glohnt ufstoh=) Ich han für en Tag au no es Souvenir vo dere Wanderig: E Blatere am rechte chlii Zeh. Churz mit Lavendelöl verarztet und mich süsch frisch gmacht. Dana bini is Bsuächeezäntrum vom dem Nationalpark. Da hät vo Stei, Pflanze, Vulkanismus, alti Schneesportusrüschtige alles gha. Vo da bini jetzt au sicher, dass i Marderkot gse han und ebe die Enzian. Denn hani eigentlich churz wellä is Zält ligge. Es isch aber sooo heiss gsi, dass obwohl ich sUssezelt zum durlüfte ufgmacht han. Also hani no dChleider vo hüt morge usgwäsche und bin bim Onsen go Curry ässe. Äs Iwate Kogen Curry mit so Art Sudfleisch drin. Göttlich. Kogen wird die Ziit im 12Jh. bezeichnet. Ich chan mer aber chum vorstelle, dass det scho so feini Curry kennt hend. Meine die müsstet ja scho Curry und Cacao gha ha. Villicht isch damals eher was für richi gsi? Han no Schwein gha. Jetzt gsehn i, dass si sÄsse nur bis am zwei usgebet.
Dana hets no es Glacé ghä und numol mit em Aneligge probiert. Es bizzli chüäler ischs unterdesse. Nachher bini no vors Zält ghocket und han mi als Holzschnitzer versuächt. Bin nöd talentiert, aber luschtig ischs. Wos wieder afange rägne het, hsni drin halt alles ufgrumt und aktualisiert. Sowie min Plan für die letschte drüü Täg vor Akita-City schmiide.

ZFuäss: 21000, (15km, aber das stimmt ja hüt nöd, will ich bim wandere natürli chlineri Schritt mache, so sinds wohl nur 8km)