Bin wieder mal früäh los mit allem Huckepack. E riise Hitz isch es. Ich han mi am Vortag no a de Ärm und Händ verbrennt und ha halt hüüt müässä langärmlig wiiters in Süde. Mit Siite und Gegewind vo 6m pro Sekunde ischs wieder emol en Chrampf gsi. Defür bini a schöne Buchtene verbi und schöni Gärte. Nach 20 Laufkilometer bini erschöpft bim Bushüüsli acho und versuäch no de Mittagssunne entcho. E älteri Frau het den au no uf de Bus gwartet. Ich ha mit ihr afange rede, aber ihre isch nöd so denah gsi mit mir zrede. Als ich ihri Wörter oder ihren Dialekt nöd verstande han, het si ganz beleidigt mich ignoriert. Ganz gspässig gsi. Im Hauptbushof vo Esashi han mi denn über die Stadt informiert. Ich ha eigentlich vor gha, da imene Hotel zübernachte, da min Handyakkunachlader au ufbrucht isch und ich mal wieder is Mail müsst luägä. I dem Terminal hets aber ganz praktisch e Steckdose gha. Sogar Wifi hets gha - ich han mi aber grad nöd chönne amelde, will die verantwortlich Person ine längeri Pause gange isch. Also bini i dere Ziit id Stadt go schmöckere und nach de Hotels Usschau ghalte. Die einte Hotels hani nöd gfunde und vo de andere het mer scho vo usse gseh, dass es kei Wifi het. Irgendwie sind da aber alli Lüüt änlich gsi wie die älter Dame a de Bushaltestell. Keis Grüäzi, keis Lächle sondern so e Haltig als wettets nüt mit mir ztuä han. I bin denn zrugg zum Busterminal. Zuäfälligerwiis isch wieder die älter Dame det gsi und het mit de andere Lüüt über mich gredt. Irgendwiä zGfühl gha ich seg plötzli imene andere Land. Bisher sind alli üssersch fründlich gsi... Ich ha denn denkt ich beschere die Esashier nöd no mitere Logiernacht meh und ha en nöie Plan gmacht mit em Bus wiiters zgo. Ich han no 1.5Stund gha bis zur Abfahrt und bi froh gsi, dass ich denn au no WLan Verbindig becho han. De Herr isch denn wieder ganz andersch gsi: fründlich. Het denn zämä mit em Busbeamter no usfindig macht, bi wellere Station ich für de Campingplatz in Omu muäss usstige. Das obwohl er enttüscht gsi schint, dass ich nöd in Esashi gcampe.

Im Bus bin nur ich und es paar Schüäler gsi, wo aber au bald usgstige sind. De Busfahrer isch en luschtige gsi und het mer den au no zeiget, welles Strössli ich hindere laufe müäss. Es isch ja scho dunkel gsi - so halbi Achti oder so. Bin en Kilometer hindere gloffe und stoh am Endi vo dere Strass bimene Buurehof. Es het no Liächt gha im Stall, drum bini go fröge. Ha demit grächnet, dass de Platz uf irem Grundstück isch. Naja dem war nicht so. Nächli erschrocke sinds und hend mer gseit de Platz seg i de nächschte Stadt ( ich han aber Strass verstande). Hami denn entschuldiget und bin wieder retour gloffe. Komisch de Campingplatz isch uf zwei Charte azeiget. Fasch bide Strass vorne isch denn de Buur mit dem Auto go ufläse und het mi zum nächschte Campingplatz bracht. Nächli verdutzt bini gsi, woni gmärkt han, dass er mich i die näscht Stadt bringt. Huärä liäb. Ich wär sicher erscht um Mitternacht det acho. Ich wird sicher nüm so schnäll bi Nacht en Zeltplatz astüüre, will meh weiss ja niä öbs dä no git.

ZFuäss: 35800; 29km, Bus: 60km Auto: 15km