De nächscht Morge hani no es älters Päärli am Zelte troffe. Die dönd e ganzi Unrundig vo Hokkaido zFuäss mache. Ich hami grad huärä unsportlich gfühlt, als si mit verzellt händ, dass sie au ab und zuä dä Bus nähmet. Usserdem hends no ä cleveri Lösig bim Gepäck. E Chratte hends baschtles wos chönd wire en Schlitte nachezie. Si hend mer denn no es paar Tipps gä und dävo abgrate die nächscht Strecki zFuäss zgo. 10 Stund segets underwägs gsi. I ha mi denn entschide, die erschte rund 5 Kilometer zlaufe und denn uf de Bus umzstiige. Zersch hani es teerets Wägli gfunde, wo mi zwar nächli absiits bracht het aber defür id Natur und Chuäweide entlang. Druf abe hani öppe 10 Kilometer am Strand gmacht. Zum Teil no sträng gsi und au nöd grad en Traumstrand. Ha die ganz Strecki kei Seel troffe, defür aber einigi agschwämmte Kanister, Pet-Fläsche, Glühbire,... Diä meischte Fläschene us e USA. Au no es Kühne-Glas. Ich vermuätä schwär das chunnt au vo det änä. DJapaner chenntet nüd afange mit üsere Art vo Iigleitem. Da hends ihri eigene Rezept. Nach über 15 Kilometer laufe hani dBushaltestell vomene chliine Dörfli erreicht und bin denn am früä Namittag nach Hamatonbetsu chauffiert worde.

A dem Lauftag e wichtigi Lektion glernt. Laufkilometer sind nöd gleich dStrassekilometer uf Google. De probiert me nämli no us öb es Wägli besser wär als sHauptstrasstrotteoir und landet inere Sackgass, me gfindet süsch en Umweg oder meh lauft halt nächli krumm dur Gägend.

In Hamatonbetsu hets äntli wieder en richtige Lade gha - sogar zwei. Da hani chönne feine Sache für de zNacht poschte. DStadt isch berüähmt für dSchwän und drum hends die ganz Stadt druf usgrichtet. Es isch aber glaub mal meh gloffe da. Alles isch usepützlet und igrichtet für recht vill Tourischte. Nur hets Hotels und Läde so usgsehnd als het mers scho vo längerem ufgä. De Campingplatz isch rächt gross gsi und wunderschön am See gläge. Für 2.- häsch wohl faschs Paradis bote becho. Alles beschtens gpflägt, härzigi Brüggli, Eventbühni, deckti Füürstellene, Picknicktisch, WC's (sogar moderni), Wöschmaschine, Trochner, Güselcontainer, Snackshop und no es Reschti. Als denn dä Sunneundergang au no so traumhaft gsi isch, hani mi entschiede zwei Nächt zbliibe. Au dLüüt sind rächt flott gsi.

ZFuäss: 32900; 26.4km, Bus 23km